蕃茄海鮮扁意粉 + 蒜蓉豬仔包 ( 8-may-2012 )

( 8-may-2012 tue )

唔知會唔會有一日   每日番工心嘅情同星期五番工嘅心情一樣咁振奮呢 ~

早餐食奶醬多   甜甜地嘛 ~

菇場忙喎   所以唔覺眼瞓   又覺得好快 lunch time 添呢   今日食 7-11 叮叮星洲炒米   乾到呢   超級難食   咁啱另一個同事食波仔星洲炒米   8 卦話成個 pantry 都係星洲炒米味喎   食完個口好苦   好在我有里奧大人食剩嘅蛋糕   當飯後甜品 ~  

又忙忙地喎   總知隻手無停過咁啦   所以呢   又好似好快放工咁喇 ~

今晚放工坐熱九   send sms 比家姐話坐熱狗   又平 5 毫   點知家姐睇完電視話我知   熱九聽日退役喇   咁我咪好好彩囉 ~

去完超市買嘢就番屋企   拎哂材料解凍就即拖地   唔知點解今晚好想拖地   拖完就煮晚餐喇 ~ 

是日懶餐 - 蕃茄海鮮扁意粉 + 蒜蓉豬仔包

蕃茄海鮮扁意粉 - 清埋半包扁意粉   再清埋冰格半包嘅青口同蝦   之前喺菇場附近有間生果檔賣百合茄好甜架   不過無得賣   所以買罐罐頭蕃茄黎煮   一罐都要 $17.8   之得買磅半車厘茄好過   都係 $18   我仲加多半樽蕃茄醬架   不過我都係鍾意新鮮茄多 d ~  

蒜蓉豬仔包 - 星期六買咗個大豬仔包   不過無時間焗黎食   所以今晚一定要清埋佢   不過蒜蓉豬麻麻地   個包唔得乾呀   定係因為太耐唔新鮮呢 ~

里奧大人差唔多 9 點番到屋企   佢覺得我煮咗晚餐好奇怪咁   我係唔得閒同埋好攰好攰好攰先唔煮啫   唔係嘅話   我可以晚晚煮嘅   問佢好唔好味   佢話無咩味   咁又係嘅   我都無咩點過調味   又無新鮮茄不過就鍾意食扁意粉   真係丫   記得第一次煮話唔鍾意食   但呢兩次又話鍾意食   想點呀 ~