黑椒牛扒 + 菜心 + 蘋果沙律 ( 17-oct-2012 )

( 17-oct-2012 wed )

星期中喇又   今朝班車早咗   所以就食米粉餐喇 ~

菇場唔忙   細老闆同另一個阿 head 又唔喺度   所以 8 卦就比較得閒   同我 m   一望個鐘已經 12 點   快到呢 ~

今日 lunch box   食完陪 8 卦出去睇 card   番到菇場都差唔多要開工 lu ~

放工去買菜   不過諗唔到有咩想買   所以都走喇   估唔到可以坐番平時放工班次嘅 van 仔   實在太感恩喇 ~

番到屋企即浸菜   之後就拎沙律比家姐   等埋佢上車就走 lu ~

今晚無咩嘢煮   所以拖地先   之後淥菜   食埋尋晚嘅意粉   再煮埋聽晚嘅餸   咁聽晚可以多 d 時間做其他家務 ~

是日懶餐 - 黑椒牛扒 + 菜心 + 蘋果沙律

黑椒牛扒 - 媽咪之前買比我試下嘅   我用光波爐焗   不過都 over cook   無計   我驚生嘛 ~ 

菜心 - 家姐工人之前買到 $10 / 2 斤哈哈笑菜心   我覺得超抵   又大條又靚   但我今晚買唔到   仲要係 $10 / 斤   之後見到有 d 係 $7 / 2斤   價錢差咁遠嘅   不過我買呢斤菜心都好甜   同埋無渣   咁都好 d ~  

蘋果沙律 - 用 5 個蘋果 + 1 罐紅腰豆 + 1 罐椰果 + 2 罐粟米   整埋都一大盤   好在可以同家姐 share   唔係又要食到驚 ~

里奧大人 9 點幾先番到屋企   食完飯   睇下電視抖陣就沖涼   佢 11 點唔夠就瞓覺   所以我見到佢嘅時間只係個幾鐘   如果我地係夜鬼就可以見耐 d   不過我都係鍾意早瞓多 d   咁早瞓個黑眼圈都咁勁   再夜 d 瞓仲得了嘅   咪搞 ~