燒排骨 ( 外賣 ) + 蒜蓉豆豉炒皇帝菜 ( 31-oct-2012 0.5 A/L )

( 31-oct-2012 wed )

嘩   突然凍咗好多呀   呢 d 天氣真係超舒服呢 ~

今朝去另一間餐廳食早餐   其實之前都有去嘅   但覺得唔夠冷氣   係有 d 焗嘅感覺添呀   夏天好辛苦啫   同埋等早餐好耐   試過有次等咗 20 分鐘   又要趕頭趕命咁食   唔想囉   人地明明預咗好多時間食家嘛   咁見今朝又早咗   天氣又凍咗   所以又食番喇   但味道已經無以前咁好味 lu ~

次次 off 都係臨放工前一個鐘先忙   好在搞得掂咋 ~

同媽咪飲茶   之後再去買餸   原來已經 4 點   咁我都番屋企喇 ~

番上屋企放低嘢又要出去拎鞋   超級攰呀   見行開德福   順便去 Piago 買蛋糕比里奧大人   我推車仔啦   第一時間放對鞋落籃   之後再放手袋   咁買咗 2 盒蛋糕就比錢走人   再上樓上睇保溫杯   睇睇下覺得點解好似兩手 fing fing 咁得閒咁   原來我唔記得拎對鞋呀   即飛落收銀處   佢地話啱啱拎咗去客戶中心認領處   嘩   感恩拎得番咋   唔係我唔想 $1300 買 2 盒蛋糕囉   同埋實比里奧大人鬧死都似呀 ~

番到屋企已經 5 點半   抖陣就抹書房   執鞋柜   搞掂哂都差唔多 7 點   煲落飯先   個人太攰真係會唔記得煲飯架 ~ 

里奧大人 8 點幾先放工   又要 9 點開飯   咁我都等埋佢一齊食   反正晏晝都好飽   遲 d 食都無問題 ~ 

是日懶餐 - 燒排骨 ( 外賣 ) + 蒜蓉豆豉炒皇帝菜

燒排骨 ( 外賣 ) - 有新鮮出爐燒排骨   里奧大人好鍾意食   咁媽咪又話靚   所以買咗半斤   懶得煮餸 ~  

蒜蓉豆豉炒皇帝菜 - 喺佳寶見到 $12 / 2斤又抵喎   所以同媽咪 share   之前喺酒樓食過   用蒜蓉豆豉炒好鬼惹味   不過一到我手就惹味程度起碼減半   無計   唔識煮嘢係咁架喇   里奧大人話 d 菜嘅味道好腥臭   好似唐萵菜   其實我以前不嬲最驚唐萵嘅味道   但依家覺得味道好特別   都幾鍾意   年紀大喇   口味都唔同哂 ~