( 28-JUL-2013 SUN )
今朝瞓到 10 點半呀 里奧大人 10 點已經醒咗 佢咁啱開房門見我醒咗 如果見我仲未醒就由得我瞓 不過就一定番唔到教會囉 ~
我起身即沖涼喇 之後食早餐就番教會喇 ~
崇拜完畢之後我就去街市買餸 里奧大人就番屋企換魚缸水 咁我番到屋企抖陣就一齊出旺角買魚仔喇 ~
坐巴士出旺角 食埋 lunch 就行女人街 因為里奧大人想買番支去污膏呀 ~
豬油渣刀削麵 - 之前喺另一間分店食好煙韌 呢間唔煙韌嘅
豬油渣酸辣米線 - 湯底好味
韭菜餃 ( 5 隻 ) - 好味呀
辣菜甫 - 唔辣嘅 @.@
第 1 次見拚音 "請勿吸煙"
之前買咗枝 Tide 都無料到 d 漬仲喺度 所以我突然諗起不如去埋花園街 真係好感恩喺花園街有得買呀 最搞笑我買 2 支大 再送多 1 支細 ( $100 ) 同埋萬用抹布 ( $100 / 7 條 ) 隔離阿姐問我係咪好好用 我話用開真係去到漬 我話我唔係 "媒" 黎架 佢話我個樣都唔似 "媒" 樣 話 d "媒" 唔係咁 我覺得佢講得好搞笑 不過我真係親眼見到呢 d "媒" 架 特別係買 d 乾貨果 d 個 "媒" 企喺度慢慢執 但對眼係周圍望架 咁家姐見過就係個 "媒" 扮買 買完又比番檔主 一日來來回回咁囉 不過乾貨食物就真係唔會喺街邊買 真係來歷不明 好驚囉 ~
買完就去買飯盒袋 之後去買魚仔同水草 今次買咗包 "金十字" 阿姐話係中性魚 因為我依家條 "克四間" 太大食喇 蝦到我果 3 條紅米奇無啖好食 但魚缸得 4 條魚真係好空 nel nel 所以先買多幾條魚仔囉 ~
買埋拿玻崙同椰撻就坐 van 仔番屋企喇 都已經 4 點半喇 我要即刻煲香茅茶 煲完就預備晚餐喇 ~
是日晚餐 - 豉椒排骨 + 豉油王炒麵 + 節瓜鹹蛋排骨湯
豉椒排骨 - 今日 d 餸係滕 lung 瓜 瓜 lung 滕 呢碟排骨係滾完湯嘅排骨黎架 加埋三色椒同蒜蓉豆豉一齊炒 當一碟餸都唔錯架 ~
豉油王炒麵 - 懶得煮飯 所以炒麵
節瓜鹹蛋排骨湯 - 家姐上次論論盡盡整跌哂我盒湯 所以里奧大人無得飲 咁唯有我煲啦 自從媽咪成日煲埋湯比我 我真係好耐無喺屋企煲湯喇 ~
諗住徑步 點知落大雨 又無得徑咯 ~
里奧大人呢兩日每餐都食到好飽 真係睇住佢個肚凸咗出黎 佢嗌哂救命 不過我其實見佢肥番都開心架 話哂佢工作壓力大 平日唔係食好多嘢 只係星期六日或者假期先有胃口架咋 ~
家姐 8 點幾上黎拎拿破崙 傾咗陣就走喇 襯無雨好走 落雨濕濕真係好煩呢 ~
里奧大人餵魚 話紅米奇唔食呀 唔知係咪驚得滯 又話我係都要買金十字 咁問佢買唔買 佢又話好 真係好憎佢成日都係咁 買咗有事就賴人 咁當初你唔想買 我都唔買夾硬買啦 之後我即刻話將 d 金十字比大姑奶 不過原來大姑奶已經無養魚 咁即打比水草阿姐 佢叫我唔駛驚 因為佢地未適應 起碼要 2-3 日先適應 我聽完都安樂 d 希望佢地和睦共存啦 ~
好想食甜嘢 所以食之前買嘅 Cheese Cake 之後再食車厘子 d 車厘子係大姑奶尋日買比我架 媽咪又買咗比我 呢期唔駛買生果都得咯 呵呵 ~
好靚 又一口一啖夠方便 不過無咩芝士味囉 @.@
沒有留言:
發佈留言