大快活 @ 九龍灣 ( 9-AUG-2015 )

( 9-AUG-2015  SUN )

今朝里奧大人 9 點唔夠醒咗   我其實都醒咗   不過懶床到 9 點半先起身呢 ~

沖埋涼就落去食早餐   之後去 Taste 買果汁比媽咪   咁我打比家姐問媽咪想飲 d 咩   我收完線就放番電話喺袋啦   之後家姐打黎   話聽到電話入面 "時時 sa sa" 聲   嚇死佢   以為我喊呀   其實我應該未收線就放入袋呢   實在太論盡喇 ~   

買完就番屋企   諗諗下又喊   嗚 ~

今日特登早 d 番教會   因為我想搵傳道人為媽咪急切祈禱   不過佢無番   所以即搵牧師   祈禱完之後    心情又平靜番好多   之後入去崇拜喇   不過諗諗下又係喊 ~  

心情唔係咁好   經過 Circle K 見到梳乎蛋   所以買呢個筆盒 ( $29.9 )   因為呢期好鍾意呢隻梳乎蛋   覺得佢好樣衰             

仲有 4 塊曲奇   

坐陣就去舖頭   順便約埋姑奶食 lunch   佢又順便比埋 d 喉糖同蜜糖我地呢 ~

家姐之前喺香港買 1 包大嘅好似要 2百幾   所以我叫姑奶幫我買   澳洲買平好多呢   不過呢包係細嘅   我都唔記得問幾錢添     

本來我要 2 樽大嘅 UMF 10+ 蜜糖   不過姑奶佢買咗 5 樽   但佢放喺 Hand Carry 嘅喼   所以比海關充公哂啦   其實佢仲特登買咗 1 支大嘅防敏感 cream 同沐浴露比里奧大人架   點知最後都比海關沒收哂啦   嘥咗心機同 d 錢   唯有作為一個教訓啦   因為里奧大人一早同佢講咗話 Hand Carry 唔可以帶液體嘛  

姑奶又送咗呢 2 個  Stubby Holder 我地   話喺  Penguin Tours 買嘅   我睇到價錢牌係 AUD7.99   但唔知香港買幾錢呢 



食完嘢   申請埋信用卡   拎埋嘢就打的番屋企   今日好鬼熱   里奧大人着件 tee 嘅膊頭位係黑色   所以佢話膊頭位置比 d 陽光曬到辣肉咁呀   之後我話佢衰啦   成日唔比我買白色同灰色衫   話我着到好肥好肥   買黑色又話件件一樣   所以只能夠買深色衫   所以妳要知我真係好鬼熱   成日要開冷氣咁解囉 ~

喊得多真係好攰   5 點瞓着咗呀   好在 5 點半醒咗   因為要去探媽咪呢 ~

今晚接埋工人一齊去探媽咪   啱啱好 6 點去到   咁媽咪就可以即刻有得食魚蛋粗麵呢 ~

我見佢差唔多 "北" 哂 d 魚蛋魚片   咁我見到好開心呀   叫佢食多 d   因為佢之前食嘢係樣樣食一啖咋   驚佢無力   抵抗力弱呢 ~   

之後里奧大人去搵姑娘   姑娘叫佢入病房等   咁啱我出黎   我話不如喺出面等   好感恩姑娘啱啱番到黎   姑娘好詳細同我地講   話佢尋日啱啱接更睇媽咪   但其實 file 都未開黎睇   媽咪就喊哂同姑娘講    話醫生同佢講會死   姑娘第一時間話好肯定醫生一定唔會咁講   咁我都相信醫生唔會咁講   媽咪應該係好驚先會亂哂龍呢   最搞笑係媽咪隔離床嘅婆婆同姑娘講   話醫生無話會死   只話媽咪心臟發大咗   同埋可能要洗腎呢 ~

姑娘話心臟發大會導致氣喘同腳腫等等問題   咁腎功能唔好就真係有好多因素影響   但如果洗腎   一日要三次或四次   同埋一定要屋企人清楚點洗   唔好靠工人   因為佢地會唔做同埋會放假嘛   所以一定首要係屋企人知呢   之後話今朝已經轉介去腎科   但因為醫院無腎科醫生   所以唔知幾時先黎   咁醫生評估完就再到護士評估病人適唔適合洗腎   因為病人唔可以洗洗下唔駛呢 ~

如果媽咪無乜事   咁都轉去靈實   但依家幫佢排咗靈實先   因為佢驚媽咪喺屋企唔安全呀   姑娘真係超級細心   佢解釋得好清楚比我地知   差唔多傾咗 20 分鐘呀   聽佢講解完   我個心定好多呢 ~

入番房就第一件事同媽咪講   叫佢唔駛驚   總知唔好當自己係病人   有咩嘢我幫妳頂   唔駛驚   其實講完我都差 d 喊出來   不過點都要忍住 ~

之後同埋里奧大人同工人一齊急切祈禱喇   工人都係信主   佢話尋晚見到家姐喊   佢叫 "太太唔好喊   要祈禱   記得要祈禱   唔好喊"   我覺得場面好搞笑   係架   工人成日都為媽咪祈禱架   我超級感恩有呢位非常心地善良嘅工人   我依家叫媽咪聽佢話   工人係佢媽咪呢 ~

媽咪食咗半碗魚蛋麵   我勁開心呀   咁我買咗細細盒蘋果汁比佢嘛   佢又自己開黎飲   起碼佢肯食肯飲   又話要飲啖熱水   又肯郁   我真係開心到就黎暈呀   哈哈 ~

咁工人幫媽咪抹身   我又幫下手   佢真係好細心   抹得好乾淨   我自己真係無佢咁細心乾淨   真心覺得自己正一死女包呢   剩係惡死鬧媽咪   只係識得嘈嘈嘈鬧鬧鬧 ~

同媽咪一齊睇電視啦   啱啱做 "街坊廚神"   喺韓國介紹甜品   咁工人見到個盆哉甜品   我同佢講話個盆哉係朱古力整   可以食得嘅   點知食到最後   個盆哉係一個真盆黎嘅   哈哈   超勁樣衰啦我 ~~~~
呢張相係上網搵嘅   因為尋晚介紹嘅盆哉甜品就係用呢個黃色盆哉   但我地就睇唔到 banana tree 嘅字樣   遠嘛   睇到個樣已經勁   呵呵      



媽咪隔離床嘅婆婆個工人應該係新請番黎   因為婆婆個女教佢買雲耳   但佢完全唔明   所以問媽咪工人   突然覺得工人好勁   做翻譯喎   哈哈   之後睇睇下電視   我聽到婆婆個女叫個工人   唔識就打比 xx   我嚇一嚇啦   同媽咪工人一樣名呀   我以為佢比咗電話號碼人地呀   之後我叫佢唔好亂比電話號碼人地   我地唔識   唔知佢係咩人   一陣有嘢就麻煩咯 ~

無啦啦黃雨警告   之後睇住閃電   所以 7 點 55 分走喇   同埋工人一齊打的   一上車就落大雨喇   所以去大快活食嘢算喇 ~

諗住徑步   依家唔駛啦    咁就沖涼啦   哈哈   其實我都有 d 攰 ~~~~

睇下電視   諗住 11 點瞓   點知 me me 摩摩 11 點半先瞓呀   慘 ~