嘉華大酒樓 @ 官塘 ( 19-AUG-2015 )

招牌小炒皇

菠蘿生炒骨

豉汁蒸黃立鯧

( 19-AUG-2015  WED )

今朝里奧大人上大陸   又早起身   之後我就瞓到鬧鐘響   刷牙沖涼   搞掂哂都係 7 點 50 分   早過平時 10 分鐘   可能尋晚又拎埋番工衫   咁就唔駛諗着咩   快好多架 ~

早餐食芝腿治   次次食芝腿治就提醒自己   唔好成日話人地食嘢悶   其實自己都係咁   嘩哈哈哈哈 ~

菇場忙呀   搞掂哂又 11 點   可以抖下喇 ~

Lunch 食尋晚食剩嘅節瓜肉碎   再叮多個超米   食完就落去行陣   條街好焗熱   所以行咗 15 分鐘就番菇場喇 ~

放工去媽咪屋企   差唔多 7 點先到酒樓   一坐低睇下個 menu 就見到家姐 lu ~

唔知點解   今晚好攰咁   成日講錯嘢   打完比里奧大人   之後叫咗家姐做老公   食緊紅豆沙   同家姐話下次都係唔食西瓜   之後工人話我呀   頭先同佢講話佢家姐黎緊   哈哈   真係攰到唔知自己講咩呢 ~

食完就同家姐去藥房買紙膠布   再去萬寧買嘢就番媽咪屋企喇 ~

今日喺 OK 買架   唔記得係特價 $5.9/盒定 $6.9/盒   咁比盒家姐啦   家姐話係咪假嘢   佢好小會咁講家嘛   佢話個盒好似假嘢喎   所以我即刻睇原產地   估唔到原來係 Product of PRC    唔怪得咁平啦 @@  

工人依家好搞笑   成個婆仔咁   頭先一見到家姐   已經話分好哂藥   要家姐 double check   咁我地一入屋企咋   工人已經拎哂 d 藥盒出黎   叫家姐即 check   我同定姐都忍唔住笑佢   真係好驚我地唔記得咁喎   而事實   真係未必記得   哈哈 ~

拎埋湯   差唔多 9 點就走喇   里奧大人去徑步   我唔徑喇   番屋企沖涼 ~

等佢番到黎   沖埋涼就食龍眼   食咗幾晚龍眼喇   我本身買咗 2 磅   媽咪又比 2 磅   依家食到有 d 驚喇 ~

我 11 點自己瞓先喇   真係好鬼攰呢 ~