雜豆炒帆立貝 + 煎煙鯧魚 + 粟米蛋花湯 ( 14-AUG-2015 )

呢個 Beef Pho 喺越南買嘅   湯底同 Pho 24 差唔多   都幾妹味   

( 14-AUG-2015  FRI )

今朝天氣都係唔好   不過好在無落雨呢 ~

食完早餐   睇下報紙   話咁快就要番工 lu ~

菇場做下停下   里奧大人 3 點會喺大陸見客   所以佢 11 點半打黎話同我食 lunch   但其實菇場都比較隔涉   同埋我都攰   唔想行咁遠   我都叫佢唔好過黎   但佢係都要過黎食   仲要 12 點半先到彩虹   唉   我食 12 點半家嘛   今日又星期五   度度都多人   咁我去彩虹啦唯有 ~

其實我都發緊掹憎   去到都唔係咁好面口啦   之後我同里奧大人講下次唔好黎搵我食飯   因為菇場隔涉難搵   我又唔想行去彩虹   我又辛苦   點知佢話下次會早 15 分鐘到   但其實佢本來真係可以早 15 分鐘到架   不過熄部 Laptop 嘅時候要更新   最慘係唔比熄機   所以搞咗 15 分鐘囉 ~

之後里奧大人無啦啦又話下次會早 15 分鐘到   我就唔駛發掹憎   丫   之後我都同佢講對唔住啦   佢特登黎搵我食飯   我唔應該咁呢 ~   

星洲炒米都 OK 啦  

但呢個蝦醬炒通菜牛肉係完全無味嘅 @@

羅宋湯又係無味 @@

食完就各行各路   諗住 hea 到放工   4 點又開始超勁忙   不過仍然放工即走   呵呵 ~ 

里奧大人 5 點 20 分已經喺落馬洲   咁我都唔去街市買菜喇   經過萬寧幫里奧大人買剃鬚膏   再買薄荷糖比家姐   之後里奧大人打黎話已經喺屋企附近   問食唔食雞蛋仔   我話是但啦   其實佢次次問親想食嘅嘢   即係佢自己想食囉 @@

$8.8 有 75折   折實 $6.6   真係好抵   家姐鍾意食藍色   話無咁辣   真係無諗過家姐會鍾意食薄荷糖   我就咩薄荷嘢都鍾意食   呢個習慣真係由細到大都無變過

難得里奧大人咁早番到屋企   我都唔敢怠慢喇   哈哈   終於一個鐘先食得   都算快架喇 ~

是日晚餐 - 雜豆炒帆立貝 + 煎煙鯧魚 + 粟米蛋花湯 

雜豆炒帆立貝 - 唔想得一樣餸   所以求其整多碟   哈哈 ~  

煎煙鯧魚 - 依家襯新鮮就煎埋黎食   唔係又擺到唔知幾時 ~  

粟米蛋花湯 - 無菜就係粟米湯   真係好好味呢 ~

洗完碗就熨 2 機衫   里奧大人話佢今晚特登早 d 番黎就係諗住熨衫   不過我話唔駛喇   叫佢抖下   始終佢平時做嘢辛苦   有時間就一定比佢休息呢   反正我食到咁飽   今晚又徑唔到步   所以熨衫當做運動喇 ~   

叫里奧大人快 d 沖涼   之後我沖埋涼都只係 9 點   今晚做咗好多嘢   但里奧大人早番   所以 d 時間好好用呀   食埋生果就睇電視   11 點幾就瞓覺 ~