梅菜蒸鯇魚 + 雜丸炒菜心 ( 11-AUG-2015 )

( 11-AUG-2015  TUE )

呢兩晚雖然一覺瞓天光   但感覺都係瞓得唔好咁   奇怪 ~

早餐食奶油多   是但啦   但其實想食鹹嘢   但鹹嘢樣樣都大份   所以唔敢想食呀 ~

菇場唔忙   繼續寫越南 blog   依家年紀大   每日再寫 d   咁先可以又記番 d 咁   實在無乜記性   哈哈 ~

想食牛呀   所以去食牛腩河   最搞笑係番到菇場   阿齋同 8 卦問我係咪去食粥   佢地聽見我話食牛腩河覺得好出奇呀   咁又係   我一係食粥一係酸辣米線一係車仔麵嘛   哈哈 ~

放工去買餸   之後幫里奧大人買麵包   買完即番屋企預備喇 ~

浸菜之後就即開機洗衫   我次次入親廚房整嘢   基本上我會拎埋跟身   咁如果里奧大人打黎   我可以即煮飯嘛   今晚邪啦   浸兩次菜都係電話跟身   一唔跟身就電話響 @@

咁差唔多 7 點   我就去餐枱整下嘢   整到 7 點 20 分   咁仲未收到里奧大人電話   咁我都煮飯啦   想徑步嘛   點知一開個電話   有 7 個 miss called   又有 whatsapp   原來我未教番去響音呀   再睇睇電話   家姐 7:05  7:13  7:15 打黎    阿奧就 6:53  6:58  7:02  7:10 打黎   再睇家姐同阿奧 whatsapp 就喺 7:11 同 7:16 叫我 call 佢地   咁我即打比阿奧啦   佢話已經喺九龍灣   激死我   如果我有聽到電話   就可以一早開飯呢   咁再打比家姐   佢先搞笑   話阿奧打比佢   問知唔知我喺邊   又問我煮唔煮飯   家姐一定唔知啦   之後家姐即打比媽咪工人   問我有無去媽咪屋企   好搞笑 ~

咁里奧大人番到黎   我話佢做咩唔打屋企電話   原來佢話有呀   不過我關咗房門   所以聽唔到囉   咁我即睇下電話啦   阿奧 7:01 同 7:03 打黎   家姐就 7:09 打黎   真係唔好意思喇   搞到佢地咁緊張添   阿奧啦   又唔記得我話今晚煮飯嘛   所以佢驚我唔知乜事   係咪暈鬼咗   因為佢知我呢排成日頭暈暈呢   算佢啦   驚失去我   嘩哈哈哈哈 ~ 

是日晚餐 - 梅菜蒸鯇魚 + 雜丸炒菜心  

梅菜蒸鯇魚 - 好似好耐無食鯇魚   咁我又懶呢   所以蒸魚最好   今次買咗 $28   都幾大件   叫里奧大人食多 d   因為我次次整完魚   其實都唔想食   哈哈 ~

雜丸炒菜心 - 驚里奧大人唔夠飽   所以加咗 10 粒雜丸   同埋我又可以帶 lunch box 嘛   不過 d 丸係差唔見無食過咁滯   咁又係嘅   里奧大人差唔多食哂成碟魚   都幾飽架 ~

里奧大人話攰   所以都唔圯徑步   不過我話我會徑囉   之後洗完碗出黎   佢瞓着咗添呀   咁我晾埋衫   諗住去徑步   點知佢又話一齊徑   9 點先出去徑   徑咗半個鐘就番屋企喇 ~

沖埋涼   食埋提子   抖陣都已經 11 點   要瞓喇   今日好攰咁呢 ~