臘味 + 菜心苗 + 齋滷味 (外賣) ( 25-JAN-2016 )

( 25-JAN-2016  MON )

仍然咁寒呀   包到實哂都覺得好寒呀 ~

早餐食餐蛋治   飽到上心口   食出前一丁麵餐都無咁飽 ~

菇場忙呀   仲諗住收爐之前都唔會忙添 ~

Lunch Time 都未餓   行到 1 點先買嘢食   咁 1 點 15 分先開餐   但其實都唔餓   食幾啖就算喇   剩番就打包今晚食   唉   之後唔買嘢食啦 ~

仍然忙忙忙   一望個鐘原來已經 5 點 20 分   時間過得勁快 ~

放工即走   去 Taste 買菜   無諗過全部菜咁貴   我一入大堂   管理員問我啲菜係咪貴咗 3 倍   我話唔知喎   我只知道樣樣菜都 $20/斤囉 ~  

番到屋企浸完菜就拖地   難得天氣咁乾爽嘛   所以用清水拖地   之後諗住抖下   點知里奧大人 7 點打黎話放工   我都要預備定喇   因為要蒸埋兩條粟米   我將粟米放喺生果格   估唔到塊葉都結冰   駛唔駛咁凍呀   哈哈 ~     

家姐打嚟話媽咪應該要買部氧氣機   因為媽咪慣咗血含量低嘅生活   咁其實唔好   所以覺得係聞住氣好啲喎 ~

是日懶餐 - 臘味 + 菜心苗 + 齋滷味 ( 外賣 )  

臘味 - 懶呀   同埋咁凍天氣食臘味咁先有 Feel   哈哈 ~   

菜心苗 - 呢度 $20   勁貴   但想食菜囉   同埋唐生菜 3 棵仔要 $20   我買菜心苗好過 ~  

齋滷味 ( 外賣 ) - 想食酸嘢   又買黎食下喇 ~

里奧大人一番到黎同我講話晴晴電話應該整唔番   之後再同我講話   姑奶話如果要番啲資料   間舖頭叫佢哋去 Apple 整啦   但要 $8,000 ~ $25,000 囉   但未必可以拎得番出嚟㗎   咁里奧大人咪話叫佢比晴晴大陸手機號碼比佢   問佢係咪所有資料都咁重要 ?!   一係比 Password 再幫佢 Link 下睇唔睇到   不過姑奶話唔好問晴晴喎   錢解決到問題就比錢   但我咪話囉   人哋話未必可以拎得番出嚟喎   都唔知晴晴 Daddy 同間舖頭講咗啲咩   居然比人索價到 $8000 都制   但其實如果晴晴啲資料唔係緊要得咁犀利   可以問人拎番嘅   都唔需要比人整啦   咁點解唔比里奧大人問下呢 ?!   核心問題唔係錢呀   咁都唔明   之後我哋話唔好鬼理佢哋喇   佢哋錢多無計 ~   

今晚真係要開熱水洗碗喇   平時開熱水好快就有   今日等成 30 秒啲水先熱呀   凍得幾緊要呢 ~

搞掂哂就沖涼   食埋生果就睇無心法師   但天氣實在太凍   11 點唔夠就要瞓喇 ~