今朝 8 點幾起咗身 之後開機洗衫再入房瞓 但瞓唔着 lu 估唔到個幾鐘都瞓唔番 咁出去晾衫算喇 ~
等埋里奧大人起身就落去食早餐 食完番屋企抖 不過我今日唔想番教會 叫里奧大人自己番 ~
咁啱家姐 12 點打嚟話想比生果我哋 咁又好喎 我又可以比袋衫比佢工人 我哋喺停車場交收 佢工人好搞笑 由泊車到落車係咁望住我 話我瘦咗同個樣好多嘢諗 我話瘦就一定唔係啦 唔肥已經偷笑 家姐話佢一見到我已經話我瘦咗 家姐叫佢自己同我講 呢個工人好得體㗎 唔會亂講嘢 同埋佢知我一講媽咪會喊 佢就唔會講 仲會話鬼媽咪工人 唔好再講 我覺得佢好搞笑 ~
番到屋企放低生果 里奧大人就打嚟話崇拜完畢 咁我哋要去 mega BOX 拎雪糕月餅 但今日好鬼熱 我坐小巴 里奧大人自己行去 我哋差唔多時間到 諗住食嘢 但我未餓囉 所以最後拎完就坐 Shuttle 番九龍灣 ~
之後我仲要去美心皇宮拎流心奶皇月餅 尋晚里奧大人姐夫又送咗盒東海堂月餅比我哋 一係無得食 一係有排都食唔完 始終月餅好漏嘛 ~
番到屋企就執下啲冬天褸 唔要就比家姐工人 咁唔浪費之餘 最緊要係佢哋唔駛特登用錢買褸 同埋我啲褸唔會係殘殘舊舊嘛 乾洗完先比佢哋 就算唔要嘅 Tee 都熨埋先再比佢哋 我接受唔到成啜菜咁比人囉 同埋同佢哋講 唔鍾意可以捐出去 最緊要唔好浪費呢 ~
3 點幾先落去食下午茶 食完都番屋企喇 好鬼飽呀 所以熨衫當做運動 ~
成個冰格都放哂雪糕同月餅 所以要清咁啲嘢 本來想買燻蹄 但最後都係清埋包雲吞 佔嘅位置唔係多 但係清得就清啦 哈哈 ~
是日懶餐 - 東東雲吞出前一丁 + 粟米蛋花湯
東東雲吞出前一丁 - 我仲好飽 所以 Share 食一個麵算喇 ~
粟米蛋花湯 - 懶得買菜 又粟米湯啦 ~
心情唔好 洗埋碗就自己落去行陣 去三聯睇書 睇咗本書 話預期事實唔會改變 倒不如接受現實 好好享受另一個結果 咁我都知 但要睇下咩現實先得㗎 ~
睇咗半個鐘 越睇越凍喎 所以都係番屋企喇 ~
沖個熱水涼就抖喇 今晚差唔多 2 點先瞓呀 ~
沒有留言:
發佈留言