打邊爐 @ MIMI 屋企 ( 16-SEP-2016 )

開餐咯 

鬼馬油炸鬼 - 好味道呀   阿 mi 話可以兩食   不過我齋食   脆卜卜仲好味   呵呵     

桶蠔 - 開嗰陣都有蠔味   不過口感就好粉囉    

龍躉 - 呢度 $80   魚佬話無哂腩   不過阿喂想買魚   所以照買   阿 mi 一食落口就話: 好 "鞋" 呀   係妳最鍾意嘅口感呀   呵呵   我真係鍾意食 "鞋" 魚㗎   唔係講笑呢  

蝦滑 - 睇住阿 mi 整到成個雪糕球咁   但最搞笑我明明仲見到有啲喺個盒度   心諗係咪特登留番整啲咩裝飾   不過見佢整到最後都唔知咁   咁我同佢講啦   原來佢話睇唔到

鮑魚 - 好彈牙呀 

象拔蚪一樣係咁彈牙   因為阿喂負責灼熟   講明 20 秒就要撈上來

豚肉 - 每人好似食咗 2 塊咋   真係好飽食唔落   所以堅持唔買雞係啱嘅 

菜心 / 蓮藕 / 唐芹

炸魚皮 - 阿喂話特登買比我㗎   之後佢都會加句   佢其實都好鍾意食   哈哈     

炸芋片 - 好味呀   我望到阿 mi 一放入口就話 : umm 好味呀   真係話時話   佢猛咁夾嘢比我哋   我掛住食   真係好少望到佢食咗啲咩咁

椰子湯底 - 個湯好甜呀   勁好味道   所以飲咗幾碗   唔飽就有鬼   哈哈

椰汁芋頭西米露 - 凍食好味道呀   所以話打邊爐唔好買咁多料   留肚食糖水好過   呵呵

無諗過芋頭粒口感係煙煙韌韌   勁似芋圓咁㗎   勁正   最衰講緊鬼故   嚇鬼到唔記得 "北" 多啲芋頭   哈哈

( 16-SEP-2016  FRI )

今朝 10 點鐘自然醒呀   即刻刷牙落樓食早餐呢 ~

就咁 Share 食都幾飽

食完早餐就番上屋企沖涼   約咗阿 mi 喂 12 點半左右喺飯堂等   不過我哋 11 點幾出發去荃灣喇 ~

去到係 12 點左右   所以去旅行社睇下資料   之後阿 mi 話準備去飯堂   咁我哋都即去飯堂喇 ~

無諗過飯堂咁多人   好在真係到咗先咋   又係坐番嗰個卡位   已經第 3 次坐果度喇   其中 2 次仲要係同阿 mi 喂一齊添   搞嘢 ~

一齊睇下有咩好食   但我知今晚一定又食餐飽   所以我話 2 個餐 Share 食最好   之後阿 mi 又話整咗麻辣豬手比我拎番屋企   實在太有我心喇   阿 mi 同冰冰同家姐一樣   次次一聽我話鍾意食就會又買又整   所以我好驚同佢哋講我鍾意食啲咩   但我真係鍾意食嘅話   又實會同佢哋講家嘛   因為大家鍾意食   到我又可以買黎比佢哋一齊 Share 食   但依家阿 mi 又係咁   真係頭痕   哈哈 ~

鴨肉湯金邊粉 - 依家 Load 相先知   我只夾咗金邊粉咋   無食到鴨肉呀原來   因為我已經諗咗好耐   真係無印象鴨肉係咩嘢口感同味道   哈哈

我諗住食闊身河粉   不過老闆話係新鮮金邊粉仲好食   果然無介紹錯呀下   真係好滑呢 

無骨海南雞飯 - 我主打係個汁   真係好鬼正   

泰式鳳爪沙律 - 咁啱阿喂都想食鳳爪   咁就叫喇   因為里奧大人唔食呢啲   我自己一個人又食唔哂呢 

炸蝦餅併春卷 - 香口嘢最愛   里奧大人今朝已經話要飲芒果沙冰   佢真係好鍾意飲   好少見佢一早講定中午飲啲咩呢   哈哈        

阿喂月尾生日   所以我想喺佢哋去旅行前   Cheap Cheap 哋請佢食餐飯仔   等佢番嚟之後   我再請佢食好啲   哈哈 ~

食完一齊去街市買魚   阿喂本來想買雞   我哋話唔好   驚食唔哂   本來連魚都唔想買㗎   因為真係驚好飽   但阿喂鍾意食魚   強調話每人唔係食好多   咁就得喇   因為上次食到好飽呀   唔想格硬食   同埋佢哋又去旅行   真係一定要清哂所有嘢囉 ~ 

我覺得呢張相勁有旅行 Feel 呀   

買完就坐小巴去阿 mi 屋企   一入屋就勁想灘喺梳化   呵呵 ~

阿 mi 搞笑   話要換褲先   唔係我又會話佢   其實我次次去家姐屋企   又係叫佢快啲換褲先啦   因為佢哋着老牛   真係睇見都熱呀   哈哈 ~

今年收到好多月餅呀   我都拎啲比阿 mi 佢哋食   無辦法   我依定當佢親人   食唔哂會叫佢幫手食   哈哈哈哈 ~

人參果唔夠熟呀   激死我

之後一齊傾偈   又食生果食薯片飲果汁   阿 mi 仲話食月餅   我話咪呀   一陣食唔落嘢就慘   我雖然肥   但依家真係無以前咁有食力㗎喇 ~

4 個人食下傾下   啲時間都過得好快   咁大家都想 6 點食嘢   咁我陪阿 mi 整嘢   佢哋兩個男人就好浪漫咁相對望傾偈 ~

阿 mi 又話我臉色唔好   話個咀唇紫色呀   個幾鐘之後話好啲   個咀唇係白色   笑死我啦   臉青唇白呀   仲以為話我咀唇好咗少少添   不過無辦法   我呢星期心情好差   瞓得唔係咁好   有時仲暈暈哋添呀 ~

里奧大人入廚房睇下有咩嘢食   佢第一句話咁多 ?!   所以要影相留念   哈哈

最鍾意睇阿 mi 煮嘢   因為佢會順便教埋我點煮   哈哈   不過佢煮嘢好有條理   我就唔係   所以煮嘢時間實比佢地耐囉 ~

食到咁上下   阿 mi 又煎芋頭   咁我一定會陪佢   唔想佢一個人又煮又洗   我哋好似大爺咁等食 ~

今晚飲咗半支啤酒   真係有啲眼瞓咁㗎   下次都係唔飲   同埋好在阿 mi 會入廚房煮下嘢   咁又企下傾下   又精神番啲   哈哈 ~

嘩   一路食一路傾   之後又食糖水   所以真係次次喺阿 mi 屋企食飯   真係飽到上心口 ~

今晚堅喇   講鬼故   全部真人真事呀   嚇鬼死啦大佬   所以我話我要登大對眼   要有殺氣呀   哈哈哈哈 ~

差唔多 12 點走喇   打的番屋企   16 分鐘番到九龍灣   真係算好快 ~

沖埋涼   抖多陣   1 點幾即瞓喇 ~