蕃茄雞扒 + 金銀蛋紅莧菜 + 炸魚皮 (外賣) ( 29-SEP-2016 )

( 29-SEP-2016  THU )

感恩呀   尋晚瞓得好好呀   唔知係咪同徑步有關呢   里奧大人話佢次次徑步都瞓得好喎   我都希望係咁啦 ~

餓呀   食奄列餐   但個奶油豬超級極度難食   根本唔係脆豬   唔知佢哋邊度入貨   餐包同呢啲包都好難食   我見好多人都會走包呢 ~

菇場唔太忙   爽呀 ~

帶咗支雞骨草番工飲   都幾好味   我覺得都幾重羅漢果味

Lunch Time 唔餓   但照食麥皮   已經過哂期架喇   唔想再擺咁耐   不過都仲要起碼食多 8 次先食完   慘   哈哈 ~

菇場無啦啦又忙   仲要係煩嗰隻 ~   

忙到 4 點幾就拿拿聲食埋個雞尾包   其實唔餓   但唔想又留番聽日食 ~

放工去街市買菜   之後飛番屋企喇 ~

洗菜都洗咗咗差唔多 10 分鐘   水費貴過菜   哈哈   開埋機洗衫就抖喇    唔想晚晚熨衫   所以依家多數一熨就熨 2 機嘅衫   咁其中一晚就可以抖喇 ~      

7 點幾開始煮嘢喇   里奧大人 8 點先放工   佢番到屋企   我先啱啱煮完咋 ~   

是日晚餐 - 蕃茄雞扒 + 金銀蛋紅莧菜 + 炸魚皮 (外賣)  

蕃茄雞扒 - 清埋星期日買嘅 4 個蕃茄   煮埋出嚟好鬼多汁   真係唔想嘥   所以留番起佢   聽日整意粉 ~

金銀蛋紅莧菜 - $5 有 4 扎呀   超級勁抵   同埋冰姑成日叫我食多啲紅莧菜   但我話香港唔係成日有囉   所以今晚見到即買喇 ~

炸魚皮 (外賣) - 無啦啦勁想食   買開果檔又無開   咁去買另一檔   呢檔係有埋雲吞水餃買嘅   估唔到都幾好味   唔係剩係得個脆字   里奧大人好搞笑   我問佢好唔好食   佢話今次好食   不過無阿喂買嗰間咁好食   食親炸魚皮就一定聽到阿喂個名   哈哈 ~

洗埋碗都 9 點   今晚都好想徑步   所以抖 15 分鐘就去徑喇 ~

徑下徑下   其實好快就 25 分鐘   今晚涼涼地   徑步真係好舒服呢 ~

番到屋企即沖涼   睇埋電視   11 點 40 分先瞓呀 ~