龍城冰室 @ 九龍灣 ( 14-AUG-2018 )

蒜香脆皮雞扒飯 ($41)



日式鰻魚炒飯  ($43)



( 14-AUG-2018  TUE )

個天又灰灰暗暗   最緊要唔好落雨就得喇 ~

早餐食照燒汁雞扒包   都幾好味道 ~



菇場唔太忙   又清下啲嘢咁啦 ~

Lunch Time 出去買 2 餸飯   不過唔係咁啱胃口   所以又去番買魚片頭米粉 lu ~

無啦啦勁眼瞓   真係差啲瞓得着   好在 8 卦係咁講嘢   但 4 點半先嚟勁忙囉   好在放工前 5 分鐘搞掂哂咋 ~

今晚里奧大人去聽講座   所以約佢喺九龍灣食嘢 ~

呢間餐廳啲服務真係不知所謂   我係食下午茶餐嘅   我問如果要柚子蜜駛唔駛加錢 ?!   佢答我唔知㗎   睇下架機出幾多錢就幾多錢   (我其實想講妳係咪要幫我去收銀問一問呢 ?!)   之後佢繼續答唔知㗎   有次個客食蛋治十六蚊   之後叫杯嘢飲  加咗佢十幾蚊   個客鬧我   我唔敢答妳幾錢呀   個機出幾錢就幾錢㗎喇   真係不知所謂   講一大輪嘢做乜 Q ?!  價錢點會由我去問收銀㗎 ?!   真係第一次聽到咁答案 ~

我都費事再同佢講   我話要熱檸水   佢又問我係咪凍檸水 ~

咁里奧大人早嚟過我嘛   話有個人叫凍檸茶   但嚟錯熱奶茶   但居然叫個客要呀   不過個客話唔要囉   邊可能咁樣迫個客要㗎   自己落錯單喎 ~

之後又到我睇到啲嘢喇   有一個家庭由 4 人枱轉咗張 6 人枱   原來佢哋係 2 大 3 細   咁個女侍應話人轉枱 (個女侍應係同我落單嗰個)   又話落單轉枱要自己睇住啲食物   又咁咁咁   之後有個類似經理嘅男仔都話   5 人坐 6 人枱好正常啦 ~

食食下飯仲搞笑   聽到隔離個細路仔話要飲紅色嘅好立克   我心諗其實係咪利賓納呀   哈哈 ~

差唔多 6 點半走人喇   里奧大人要出去聽嘢   咁我就行陣商場同 Taste   之後番屋企 lu ~

番到屋企諗住沖涼   點知好似每月一到   我又要去睇醫生   拎定假紙 ~

滕嚟滕去好鬼攰呀   抖到 8 點幾先沖涼   哈哈 ~

里奧大人差唔多 10 點就番到屋企   我睇多陣電視   10 點半都自己瞓先喇 ~