海南雞 (外賣) + 咖哩雞扒 (外賣) + 炸魚皮 (外賣) + 蕃茄南瓜湯 ( 16-AUG-2018 )

( 16-AUG-2018  THU )

尋晚瞓得唔係咁好   但起身又好 OK 喎 ~

依家食緊藥   希望每月一到有改善   我可以每月唔駛請假   同埋最緊要可以做任何事奉   唔駛成日驚出席唔到呢 ~

早餐食吞拿魚治   8 卦話今朝會遲   咁我都唔等佢 lu ~



所有大粒唔喺度   我同 8 卦都好開心諗住可以抖下   點知我地就忙到死死下 ~

Lunch Time 出去買飯   收銀聽我話要飯   佢個樣好驚訝   之後阿姐比盒飯我   佢又好驚訝話今日食飯呀 ?!   要唔要辣椒油呀 ?!   我話食飯唔要辣椒油啦   哈哈   我次次買粉麵   阿姐佢哋都知我會再加辣椒油   因為外賣辣椒油啲份量係好少嘛 ~

食到好飽   反而精神喎   哈哈   連 8 卦都話我今日無講眼瞓呀 ~

我覺得係身體開始適應咗啲藥   所以今日好好多   一開始食嘅時候   真係覺得食完個幾鐘之後就好攰   完全係無動力   但我又唔想停   始終身體要時間適應嘛 ~

仍然忙啦   真係笑死   諗住 Hea 但點知更加忙   哈哈 ~

放工即走啦   番到屋企即滾湯喇 ~

頭先大食 Whatsapp 我   講佢同學咁咁咁   又成日怨天怨地   之後我嘅結論係對方首先要改變自己   唔係佢只會一世喺困局入面   永遠活在昨天的今天呢 ~

佢同學又係啲講極唔明   講極唔聽嘅人   但講到合乎佢嘅答案呢   就覺得啱聽   要是唔啱聽呢   就話妳地唔明   呢啲人真係自我中心得好緊要   我直頭覺得連價值觀都錯埋   呢個世界唔係圍住妳轉嘛   真係要醒下囉   自怨自艾完全無意思 ~

里奧大人今日去舖頭整嘢   終於搞掂哂   所以 6 點幾就番到屋企 lu ~

咁水姑買咗海南雞同咖哩雞扒比我哋做餸   所以我就咁滾個蕃茄南瓜湯就可以了 ~

實在係好奇妙感恩嘅一件事   我依家只食白肉嘛   估唔到水姑會買咗雞比我哋做餸   佢話屋企附近開咗間泰菜店   覺得好好食   所以買比我哋食   當中我覺得神真係好保守我   好似樣樣安排哂比我咁   所以真係好感恩 ~

煮埋個丁麵比里奧大人   都差唔多 7 點 lu   不過我今日食咗個飯   仲係好飽   所以食咗少少咖哩雞扒同炸魚皮   同埋飲咗幾啖湯   成碟海南雞完全無掂過   所以留番聽晚食 lu ~

沖埋涼就休息   之後叫埋里奧大人快啲沖涼   咁就可以一齊睇恩雨之聲喇 ~

一睇就睇到 12 點   其實我仲想睇架   不過聽日要番工   所以都要瞓覺 lu ~