燒汁豆腐卜 + 辣椒芝士香腸 + 蒜蓉蒸脆肉瓜金菇 + 辣炒蝦米糯米飯 ( 2-JUL-2020 )

( 2-JUL-2020  THU )

尋晚一覺瞓天光   感恩感恩 ~

買埋麵包就去食早餐   今朝食芝腿治烘底   好想飲凍奶茶   但都係忍忍口先   嘻嘻 ~

菇場超級勁忙   做足半日   所以 Lunch Time 真係要抖抖 ~

話咁快又 7 月喇

Lunch 食健康餐   藜麥紅豆 + 芝麻麵包 ~

仍然忙呀   仲要做長命 Report   做到對眼好攰呀 ~

放工即走   番到屋企都預備晚餐 ~

我 6 點開始煮嘢   但完全唔記得問里奧大人幾時放工   哈哈   佢真係要 7 點先番到屋企   咁算啦   一陣再蒸熱去 ~

里奧大人一番嚟就話今晚 8 點半要開會   佢又唔記得今晚要開會定啦   好在我整好哂咋 ~

是日懶餐 - 燒汁豆腐卜 + 辣椒芝士香腸 + 蒜蓉蒸脆肉瓜金菇 + 辣炒蝦米糯米飯

燒汁豆腐卜 - 尋日喺 Aeon 超市買咗包豆腐卜   豆制品真係要快快整   唔想特登去買鯪魚肉   所以就咁焗喇   最後掃啲燒汁   脆卜卜又濕濕地   唔錯唔錯 ~

辣椒芝士香腸 - Johnsonville 呢個牌子嘅香腸係好味道   但真係細條咗咁囉   但價錢就越來越貴   我由最初 $36 開始買   去到依家 $63   真係痴鬼線   所以上次一田特價   好似 $7x 有兩包   咁就抵喇   正價一定唔會食囉 ~

蒜蓉蒸脆肉瓜金菇 - 又喺 AEON 超市買咗 3 條脆肉瓜   都只係 $10 咋   今晚食 1 條   用金菇墊底   里奧大人唔鍾意食整條嘅金菇   咁我就特登切碎墊底   佢又真係食好多喎   我話佢好似啲狗仔咁   要切碎先食   哈哈 ~   

辣炒蝦米糯米飯 - 我真係好鍾意食糯米飯   但依家食到有啲驚   尋日芒果糯米飯   今晚要鹹食   辣炒蝦米係阿 mi 買比我嘅手信   成日已經想食   但想食嘅時候   里奧大人又話唔想食辣   今晚唔理喇   照開來食   原來好鬼辣   所以配糯米飯一流 ~

食完就唔洗碗住   同里奧大人一齊睇阿獴   但睇完之後好攰呀   哈哈 ~

我超級鍾意阿獴㗎   細細隻好得意   之前喺長隆動物園見過佢哋   真係望到唔捨得走

開埋機洗衫就沖涼   每日番到屋企就係最期待沖涼   哈哈哈哈 ~

8 點半開會   9 點左右開完   今次算好快喇 ~

今晚仍然睇 Eric Sir   佢真係好勁   好了解人同狗   我叫家姐搵佢啦   但一定要儲定錢先得   Berry 咁黐線   肯定有排教   哈哈哈哈 ~

里奧大人 10 點 45 分都瞓   我就睇多陣   11 點先瞓 ~