豬扒炒手打烏冬 + 腐皮卷 (外賣) + 西蘭花 ( 9-JAN-2023 )

( 9-JAN-2023  MON )

感恩一覺瞓天光   瞓到 7 點 15 分都醒 lu ~

早餐食芝士夾甜餐包   我鍾意甜甜鹹鹹   之後家姐都話甜甜鹹鹹都好味㗎   但里奧大人就唔鍾意咁食呢 ~

菇場忙呀   之後 8 卦無啦啦話我中午會好開心   因為佢中午 A/L   我會開心喎   我話日日都開心   再話就算佢喺度   都係當佢無到㗎啦   佢又喺度笑   真係唔串唔鬧唔安樂   哈哈 ~

阿花焗曲奇   仲用 NOONNOO 摸   真係好靚呀

Lunch Time 出去行下   之後買雞翼紅薯粉番菇場   阿齋話紅薯粉份量好少   但我話啱我   始終 12 點幾都係早食囉   同埋我係要小份   所以佢覺得少咁囉 ~

菇場忙呀   集中精神做   對眼係超級攰   我又成日唔眨眼   所以更辛苦 ~

放工即走   里奧大人剪完頭髮都番到屋企   我番到屋企都要即刻晚餐了 ~

是日晚餐 - 豬扒炒手打烏冬 + 腐皮卷 (外賣) + 西蘭花

豬扒炒手打烏冬 - 喺凍肉店買咗 3 片蒜蓉豬扒   再買 1 磅手打烏冬   加個大洋蔥一齊炒   又好味喎 ~

腐皮卷 (外賣) - 突然好想食又買嚟試下   我覺得好味過一田買嗰間呀   蘸喼汁真係勁正㗎 ~ 

西蘭花 - 本身諗住煮 2 個   但最後都係煮 1 個算喇 ~

洗埋碗就開機洗衫   再食紫米露   我哋覺得好食   同埋都幾多紫米   算係真才實料呢   我自己又唔會煲   依家好怕煮少少買一大包   我寧願買嚟食好過   唔駛煩 ~

抖陣就沖涼   8 點幾先同里奧大人睇 "黑暗榮耀"   估唔到都幾好睇   所以我自己再睇多 1 集   里奧大人就做睇其他嘢 ~

今晚有啲攰   所以 10 點半左右都瞓覺喇 ~