腸仔炒手打烏冬 + 青紅蘿蔔粟米栗子豬骨湯 ( 17-JAN-2023 )

( 17-JAN-2023  TUE )

尋晚幾乎去咗 10 次廁所咁滯   所以都知係尿道炎   本來我都諗住番工   但個人真係好似無瞓過咁   最後都係請病假休息好了 ~

8 點幾都起身   刷埋牙就去買麵包   屋企其實有方包   但真係唔想嘥時間焗熱呀 ~

食完早餐就打番去菇場請病假   之後即刻打去掛號睇醫生   感恩 10 點有得睇呢 ~

抖多陣就出發睇醫生   今次都要等呀 ~

醫生話我抵抗力弱呀   加上又有主婦手   我次次一有主婦手就知道身體唔多好囉   唉 ~

睇完都即番屋企沖涼洗頭   頭先無洗頭沖涼真係周身唔聚財咁   但我覺得好凍同埋唔想沖完又沖囉 ~

食完藥都休息下   其實都係睇 Youtube   因為瞓唔到呀   哈哈 ~

里奧大人 1 點半先放飯   所以佢買埋 Lunch 番屋企陪我食呢 ~

錯有錯着   因為比少一樣餸呀   因為突然間唔係咁想食

里奧大人見我着件長袖珊瑚絨睡裙就好開心咁   因為佢成日覺得我會凍   但我話着得佢就代表我唔舒服啦   哈哈   不過我今日真係覺得個人好寒先要着囉 ~

里奧大人食完都要即番工   趕住去開會   真係辛苦哂佢喇 ~

我就 3 點瞓到 4 點半   之後又睇下電視咁 ~

里奧大人 5 點 20 分番到屋企   佢話特登早啲番嚟睇下我喎   話打咗幾次電話都無人聽   原來我飛線部手機太細聲   我完全聽唔到呀 ~

今晚 7 點幾先開餐   其實晏畫食完碗車仔麵都仲係好飽   但今晚點都要清埋隔夜嘢   唔係真係唔想煮囉~

是日晚餐 - 腸仔炒手打烏冬 + 青紅蘿蔔粟米栗子豬骨湯 

腸仔炒手打烏冬 - 最終都係食剩少少   唯有掉啦  唉 ~

青紅蘿蔔粟米栗子豬骨湯 - 湯反而飲到   同埋一定要食哂紅蘿蔔   因為今晚無菜食呀 ~

洗完碗就沖涼   之後休息喇 ~

今晚睇猛鬼酒店 Youtube   里奧大人話唔驚瞓唔着咩 ?!   我話食藥好好瞓   所以唔驚半夜起身   哈哈 ~  

本來 10 點半先食藥   不過我問里奧大人如果早半個鐘食得唔得 ?!   佢話得就即刻食   因為我好眼瞓   所以今晚 10 點唔夠都瞓覺喇 ~