鴛鴦餃 + 油麥菜 + 超甜南瓜粟米栗子豬𦟌湯 ( SEP-2007 )

尋日同里奧大人食完 Tea   就周圍行下再去街市買餸就番屋企 lu   里奧大人由讀書開始我哋最大嘅娛樂就係手牽手行百佳 街市   因為近屋企   可以快啲番屋企做功課嘛 ~

番到屋企真係做到無停手   醃肉 煲藥 煲湯 燙衫 執嘢   統統都係我一手一腳搞掂   因為里奧大人要拚命做功課   我都想讀書做功課   但真係無時間可以插得入   所以決定全日做屋企嘢   留番星期日先讀書做功課   我幾為頭家呢 ~

是日晚餐 - 鴛鴦餃 + 油麥菜 + 超甜南瓜粟米栗子豬賬𦟌湯

鴛鴦餃 (韭菜豬肉水餃 + 粟米南瓜豬肉餃) - 霎時間諗唔到想整咩餸   所以就整餃喇   里奧大人成日話水餃皮好厚身同好飽肚   所以今次好好彩咁買到雲吞皮喇 ($5/半斤 - 約 30 塊)   見次次都係單整一樣餃   又見煲湯材料都有多   所以試整下幾隻粟米南瓜餃無咁悶   同埋好似好健康咁呢   不用雲吞皮真係有難呀   啲皮太薄喇   同埋我唔想剩雲吞皮   包咗好多餡   包到脹卜卜   最慘我唔識包雲吞嘛   求其封口楂埋一舊就當係雲吞包法   點見人呀   我都接受唔到咁核突啦   所以求鬼其對摺就算喇   之前仲特登死搵爛搵個餃子夾   原來四方型既雲吞皮係唔得㗎   要圓型餃子皮先用得呢個餃子夾咋   今次落左雞粉嚟做湯底   感覺無咁淡   但我覺得啲味好似我細個病嘅時候   媽咪煲通心粉啲味咁   超難頂呀 ~.

油麥菜 - 係大前日剩嘅   放咗喺雪櫃無謂嘥嘛   掉咗又黃又老嗰啲都食得嘅   就咁淥嚟食就算 lu ~

超甜南瓜粟米栗子豬𦟌湯 - 買咗 3 斤南瓜 ($9) + 豬𦟌 ($22) + 栗子半磅 ($5) + 粟米 3 條 ($10)   由於我會煲好呢個湯   所以就好有心機好辛苦咁將啲粟米續粒續粒咁拻出嚟   啲南瓜又切到細細件   之後煲咗兩個鐘就搞掂 ~

開飯喇   見到里奧大人狼吞唬嚥咁掃啲餃   係好開心呀   但係啲皮太薄好易散哂   所以好難夾呢   下次都係用番餃子皮包好啲   包同食都方便嘛   而個南瓜湯呢   真係好茸好甜呀    杰撻撻咁好正呀   最正係啲粟米係脹卜卜   咬落去係 "必" 哂啲湯出嚟㗎   真係辛苦都值得呀   個菜就無特別啦 ~

洗埋碗沖埋涼成 10 點   睇下電視又到 11 點幾   之後里奧大人話食埋個冰皮月餅喎   見佢咁有興緻   咪陪佢食囉   臨瞓前食嘢   仲係要甜品添 ~

~~~~

今朝 10 點要起身喇   因為唔想成日趕頭趕命咁食完野番祟拜   早啲起身慢慢食好過呀   我哋又去熟食街市食點心   食蝦餃 + 雞扎 + 春蛋燒賣 + 山竹牛肉 + 馬拉糕 ($38)   唔知係咪今次唔係咁肚餓呢   我同里奧大人都覺得啲野麻麻哋   下次應該唔會再喺度食點心㗎喇 ~

祟拜完之後就行下大眾書店   好開心呢   因為會員買野有 8 折   所以買咗記事簿同 Schedule Book 同 Jungle Emperor Leo 記事簿係我精心挑選比里奧大人㗎   因為我好鍾意呀   嗰隻獅子既動態好似我深愛嘅朱朱咁呀   里奧大人都話好得意   但一話係買比佢用就好大反應   話男人點用呀 ?!   我陰陰咀笑話喺屋企用又唔係帶出街駛咩驚啫   同埋佢見我楂住咁耐又唔放手   所以好無奈咁話唉好啦   唉比人知道就死   粉紅色的記事簿 ~

之後又差唔多時間 Tea 喇   去咗大家樂食 Tea   我食咗燒鴨瀨 + 涷奶茶小甜   里奧大人就食咗叉燒瀨 + 可樂   滿足滿足滿足 ~

孤獨三寶 (牛丸河 + 菜心 + 可樂) ( SEP-2007 )

尋晚一放工就走   諗住時間啱啱好啦   點知等左半個鐘頭車呀   心急死我咩   想行一陣街家買啲嘢家嘛   打亂哂我啲計劃   激死 ~

我覺得尋晚好大風   幾驚落雨呀   拿拿埤聲去食嘢之後番學喇   因為我唔想買遮又唔想淋濕個身軀呀   求其搵間麵舖食   食咗我嘅孤獨三寶牛丸河 + 菜心 + 可樂 ($22)   我真係好攰   想食米粉   點解叫咗河粉   激死   因為食河粉個胃會好脹   如我所料   食咗半碗粉個胃好脹   抖咗陣再慢慢食   好在食哂啫 ~

番到學校已經覺得好眼瞓好攰   番咗幾堂我都無呢啲感覺   所以好驚會瞓咗   因為我坐係較前位置   實睇到妳個衰樣   個 Hall 又涷   個 Mic 又差   窒下窒下咁   又少咗同學比反應   .種種因素下   我一路 "中" 一路聽牧師教講義   我估我應該可能瞓着   真係極度樣衰呀   如果唔係晏晝同同事 Farewell Lunch   我絕對唔會喺要番學既日子出去食飯   因為一出一入好攰同好熱㗎   唔攰至奇   對於我嚟講 ~

終於放學喇   好好彩一出去就有車   所以都好快番到屋企仲買咗辣魚蛋 + 燒賣 + 白蘿蔔 ($12) 番屋企同里奧大人一齊食   唔知係咪因為聽日係星期六   所以心情好好   啲嘢都好味呢 ~

之後同里奧大人傾下偈   傾到我火都嚟埋   事緣係我話同同事朝早喺 Pantry 洗杯時傾咗咗 10 分鐘偈   里奧大人第一句係語氣重重咁話 "妳哋都好得閒傾成 10 分鐘偈   無野做嘅咩 ?!"   大佬   吊頸都要抖下氣啦下嘛   我好反感同里奧大人講   好討厭好討厭你講呢句說話   講真嗰句   傾偈唔代表妳得閒   忙仍唔代表妳多嘢做   如果我同家姐咁講   佢會好開心咁話 "妳就好啦   可以傾下偈   我好多嘢做呀阿妹"   我真係感覺到佢感受到我嘅開心囉   所以係咪一定要用埋啲咁嘅語氣呢 ?!   老細見到同事傾偈都唔會咁講啦   激死   男女大不同呀 ~

~~~~

由於星期六既關係   車程特別順暢   真係可以慢慢嘆早餐喇   點知去開果間無開到   去咗另一間   食咗沙爹牛肉拚炸菜肉絲麵 + 涷檸茶 ($19)   我有個好奇怪既習慣   就係食出面嘅炸菜肉絲同雪菜肉絲係唔會食啲肉絲   我覺得食完之後個身會好污糟   試過食 1 條仔咁大把   搞到我周身唔舒服   所以以後唔會再食啲肉絲   其實都幾煩   因為要嘥喺時間撩走啲肉絲出嚟 ~

番到公司有野做   但無 Mood 呢   突然有班大陸廠嘅管理級人員到咗 Office   成班自由行呀   最肉酸係企定定比老細介紹比佢哋識   仲要上鏡呀   星期六我係超無敵 Casual 家嘛   又唔 Jel 頭   今期塊面又多粒粒   仲着埋灰色衫添   又肥又肉啦   由於佢哋成班人要去飲茶   公司要清人   所以 12 點 55 分可以走喇   5 分鐘都好過無啦 ~

諗住同里奧大人食 Tea 平啲嘛   橫掂番到屋企都要成 2 點   無理由唔食 Tea 吖   但仲有成 15 分鐘先到 2 點   咪同里奧大人行百佳買嘢囉   諗住買豬𦟌   點知買下買下又百幾蚊   之後同里奧大人食 Tea 喇   食咗星洲炒米 + 涷奶茶同豉椒排骨飯 + 涷檸茶 ($48)   之前食係$18 (涷飲加 $2)   依要 $22 呀   貴咗 $4 呀   咩都加好慘呀   真係要慳啲洗喇 ~

金龍船 @ 官塘 ( SEP-2007 )

鴻運乳豬全體 - 好好食   啲肥膏入口即溶   但啲乳豬醬好鹹

柚皮魚湯浸龍躉球 - 啲魚好腥呀

蒜香龍躉頭腩 - 無咩特別   又無野點嚟食   乾爭爭

XO 醬帶子螺片 - OK 啦   XO 醬好食嘛

威尼斯海鮮卷 - 好脆   但好油

鮑蔘翅肚羙 - 無咩特別   旨在食醋

珍珠軟殼蟹 - 啲蟹唔脆嘅   但啲珍珠米好甜囉   可能連埋粟米粒一齊食

鹽焗黃油雞 - 雪藏嘅   因為有血   好得人驚呀

清酒一口小籠包 - 咩味都無

三文魚石窩湯麵 - OK 啦   好熱囉   因為太飽喇

南北杏燉津梨 - 我啲雪梨水好飲過佢多多倍

迷你蛋撻仔 - 唔熱唔鬆脆嘅   等我仲叫媽咪襯熱食鬆脆啲添

尋晚放工真係異常興奮   因為可以見到深愛嘅朱朱同埋可以同親愛晚屋企人食晚飯 ~

放工即搭車番媽咪屋企見深愛嘅朱朱   當然仲要同佢狂影相啦   次次都影到張 Memory Card 差唔多爆哂   不過無計啦 ~

之後同埋媽咪 工人一齊去酒樓 lu   無幾耐家姐 姐夫同里奧大人都到 lu   家姐仲醒咗我 2 支余均益辣椒醬添呀   我哋得 6 個人   所以叫咗個龍躉乳豬宴 (半席 $950 包 6 罐汽水同半支紅酒)   個名就勁   但係啲嘢食就一般   因為好多炸野呀   我哋一路食一路傾   不知不覺咁已經過咗 2 個鐘 lu   係時候埋單找數喇   講明話我同家姐補番同媽咪做節 Share 家嘛   點知家姐係都要搶住比   塞番啲錢比佢又唔要   激死   咁唯有下餐我請番啦   一人一次嘛 ~

番到屋企都即刻沖涼瞓覺 lu   好攰呀 ~

~~~~

今朝早咗一個字番到公司附近   所以可以慢啲食我嘅早餐   腿蛋治烘底走牛油 + 熱鴦 ($15)   好耐無試過慢慢食喇 ~

今朝居然有嘢做   不過又係好快做完呢 ~

晏晝同 8 個同事一齊同 V V Farewell Lunch   去美心皇宮飲茶   但無野食嘅   來來去去都係果 3 架車   我食咗 1 粒干蒸牛肉 + 1 件魚雲 + 1 隻韭菜餃 + 1 隻素餃 + 半條牛腸 + 半件芋頭糕 + 1 個奶皇包 + 細細件蛋散 + 4 條菜心 + 半個糯米包   唔夠飽呀   要狂飲茶先得呀   人家 Expect 會好多野食家嘛   番到公司又要種菇喇 ~

晚要番學呀   得自己一個人孤零零食嘢   如果里奧大人可以相陪我就好啦 ~

雪菜火鴨絲燜米 + 蒜泥油麥菜 + 牛蒡甘筍豬𦟌湯 ( SEP-2007 )

瞓到成 11 點呀   好在太興嘅早餐時間係至到 11 點半咋   唔係又要我出手煮丁丁㗎 ~

同里奧大人 Share 食黑椒雞扒配厚多士 + 熱檸茶 & 火腿絲通粉拚蛋配多士 + 熱檸茶 ($42)   好 Relax 呀   我勁鍾意同里奧大人喺太興食早餐   其一啲嘢食有水準   其二係啲坐位好舒服   唔駛咁逼狹   食完就逼里奧大人同我去超市買嘢   再去街市買重型物品   鴨梨 + 豐水梨 + 富士蘋果   講真   我自己一個人真係唔會買咁多生果   因為實在太重喇   而且里奧大人好自豪有對強而有力既雙臂   這樣子   無謂嘥左佢啦 ~

番到屋企之後   又要再去家品店買啲嘢   買完野行經飛髮舖時   里奧大人見到無咩人剪髮   所以話想去剪髮喎   難得放假又去剪髮   好在我番到屋企都好忙   因為要拖地 抹嘢 執屋等等   仲有燉肉汁   煲川貝雪梨水   無一刻停過呀   時間過得真係好快   沖埋涼已經係 3 點幾   又要食晏喇   所以就咁煮咗東東水餃 + 魚腐 + 生麵就算喇   食完坐多陣又到 4 點半喇   又要開始煲湯喇   整完睇左陣報紙又開始煮飯喇   我覺得真係好充實呀   無嘥過一分一秒呀   由於里奧大人想跑步操 Fit 身型   所以我要早啲煮飯 ~

是日晚餐 - 雪菜火鴨絲燜米 + 蒜泥油麥菜 + 牛蒡甘筍豬𦟌湯

雪菜火鴨絲燜米 - 米粉浸軟   雪菜浸半個鐘   我試過浸咗一陣   食嗰陣時好鹹呀   再將燒鴨 雪菜 韭王切絲   我多數會放哂材料兜一陣先放米炒   再加老抽同生抽嚟炒炒炒   炒到我認為熱為止就上碟 ~

蒜泥油麥菜 - 刴碎蒜蓉再加少料磨豉醬嚟炒   簡單又方便 ~

牛蒡甘筍豬𦟌湯 - 牛蒡同甘筍係上次剩咗嘅   唔好嘥   加多舊豬𦟌 果皮同幾粒蜜棗煲個幾兩個鐘搞掂   我係用日本出嘅炭煲煲嘅   好處係只需煲 1 個半鐘 (大火半個鐘   之後細火 1 個鐘)   同埋唔會流失湯嘅營養   但我見有時間   所以煲咗成 2 個幾鐘   嘥氣   咁駛鬼買呢個煲咩 ~

我覺得次次整雪菜火鴨絲燜米都好好食   可能我由細到大都好鍾意食   里奧大人唔駛講都實鍾意食   之後食菜時   我望到里奧大人食到擰擰頭   原來佢話無咩點做嘢就無咗成日   嚇死我咩   仲以為好難食添   無理由吖   用蒜頭磨豉醬黎炒無理由難食家嘛 ~

又係咁   里奧大人又係話等我洗碗啦   我又係咁話"唔駛啦   我洗得喇   人家講下啫   你可以再問多一次家嘛 ~

抖左半個鐘就同里奧大人出去跑 lu   不過街好焗   跑半個鐘就番屋企   沖埋涼就食埋之前買嘅綠茶紅豆蓉冰皮月餅喇   跑完步食甜野係好好好容易吸收㗎   所以跑咗等如無跑 ~

~~~~

今朝食芝士火腿菠蘿包 (走皮) + 涷奶茶 (小甜) ($15)   其實走皮既菠蘿包係咪真係無咁肥㗎 ?!   我唔想肥肥上加肥喎   而 Lunch 就係尋晚啲米粉呀   好悶呀呀呀呀呀呀   番工又悶 (但可以賺錢)   食飯又悶 (但可以慳錢)   咁唯有諗好果方面囉   無野做真係好慘好慘呢   真係搞到悶悶不樂同埋反應都遲鈍啲㗎   又唔方便成日周圍行喎 ~

不過我依家好開心   因為今晚同媽咪 家姐 姐夫 里奧大人去金龍船食晚飯   補番同媽咪做節   咁今日先叫做有番啲人生樂趣咋   唔係都唔知點捱到 5 點半呀 ~

酒樓做節 ( SEP-2007 )

由於尋日中秋佳節放 4 點   所以就約埋里奧大人 水姑同晴晴去 APM Food Court   食雪糕再出發食晚飯   嗰度既雪糕係 $20/Scoop 同埋 $25/Double Scoop   咁我當然食 Double Scoop 啦   多 $5 多款口味喎   所以食咗 Mint Chocolate & Ritz Cheese 都幾好食   之後傾多陣偈就出發同里奧大人屋企人食晚飯 lu   好慘呢   因為好多好多人等車   排左成半個鐘先上到車咋   仲係坐下層倒頭車嘅位添呀   好在我唔怕啫   唔係又要再等下架就死囉 ~

去到酒樓真係好多人呀   做節既食肆真係好旺   仍即係代表會係食垃圾   所以我最憎正日做節   又逼又唔好食服務又差   簡直係貼錢買難受呀   佢哋叫咗沙薑雞 + 椒鹽豬扒 + 蒜蓉西蘭花 + 鐵板茄子 + 薑蔥蟹   仲有幾款唔記得喇   通通都難食   所以費事 Show 個名出嚟   不過點難食都好   始終都會再去呢間酒樓   因為里奧大人屋企人有咩節目都會去呢間食   食咗 8 年喇   好佩服佢哋可以唔悶㗎 ~

食完番屋企 lu   奧大人好開心話快啲沖涼先   要趕住睇電視喎   原來係 Cable 做 "鬼馬狂想曲"   其實之前喺戲院睇咗   之後再喺 Cable 度睇   依又睇仲一路睇一路喺度笑   唔係化   睇 3 次都咁好笑 ?!   不過我都好開心嘅   難得里奧大人放低功課 Relax 下 ~

茄汁蝦碌 + 梅菜蒸肉餅 + 油麥菜 + 豆腐魚頭湯 ( SEP-2007 )

尋晚終於可以睇中醫喇   睇到 7 點   咁啱家姐要開 OT 到 7 點   所以可以一齊番媽咪屋企食飯   又見到我深愛嘅朱朱喇 ~

由於太肚餓   所以去超市買啲零食   買咗兒時回憶嘅童星點心麵 薯片 朱古力 仲有榴槤添呀   因為里奧大人唔係咁食   所以我襯人多食就即刻買   太肚餓喇   所以坐車時食咗包童星點心麵   點知番到屋企唔想食飯   但唔食會比媽咪鬧死   好在啲餸都 OK 咋   有茄汁蝦碌 + 梅菜蒸肉餅 + 油麥菜 + 豆腐魚頭湯   個湯好好飲呀   因為係奶白色   但真係唔明點解我次次煲魚湯都唔係奶白色嘅   我依足方法嚟煲㗎噃 ~

~~~~

尋晚好攰呀   10 點 40 分就瞓喇   同埋我 7 點要起身同家姐 媽咪 深愛嘅朱朱食早餐呀   同家姐Share 食腿蛋治烘底 + 五香肉丁火腿雞翼米 + 熱鴦   好飽呀   因為我平時唔會咁早食早餐㗎 ~

番到公司做咗少少嘢就開始種菇 lu   但有好消息   就係今日中秋節放 4 點 ~

晏晝同同事 VV 食粉   又係食粉   食咗牛孖筋米粉 ($17)   本來唔想出去食   但佢做埋今個星期尾   咁算啦   咪一齊出去食囉 ~

祝大家中秋節快樂

赤丸 @ 德福 ( SEP-2007 )

尋日實在太攰   所以都無番到教會喇   瞓到 11 點先起身   出面已經無早餐食 lu   所以就煮咗丁丁   加多杯咖啡   又慳錢又方便   之後喺我洗碗其間   里奧大人就主動話熨衫喇   因為我哋又要趕住出去陪深愛嘅朱朱喇 ~

由於要幫媽咪去東海堂買麵包同蛋糕   所以要去地鐵站入面買   里奧大人突然行得好快話等陣先   我心諗   我唔夠瞓已經掹掹哋啦   仲有   地鐵有咩野好睇呀 ?!   之後見到里奧大人喺服務中心排隊   原來係換 Tamama 比我呀   真係又一驚喜呀   好感動呀   怪錯咗佢添   原來星期六係買 Giroro 嘅 Last Day 嚟㗎   好在里奧大人有先見之明買咗比我咋   唔係我就慘喇 ~

為咗深愛嘅朱朱   要再去大排檔食嘢   好悶呀    不過見到妳開心   里奧大人又見到我開心   佢都應該好開心嘅   我真係唔想再食粉喇   .所以食咗快餐   黑椒牛扒腸仔飯 + 涷奶茶 ($20)   已經叫少飯   但都食唔哂   好嘥呢   不過無辦法   真係無咩胃口 ~

番到媽咪屋企已經成 4 點   咁即係代表抖個幾鍾又要出發探媽咪喇   其實我之前計劃好星期日唔探媽咪   想休息同執下屋   點知主診醫生約咗星期日晚 8 點講解裝機情況   咁無計啦   最慘都係家姐同里奧大人   因為家姐星期日都要開 OT   唔開唔得   而里奧大人又做唔到功課 ~

去到醫院   見到有護士主管同媽咪講解點解要裝接駁器呀   個接駁器係點等等問題   好在咁啱到咗咋   真係感謝神呀   之後再同護士主管講約咗主診醫生 8 點   講解病人需唔需要裝機喎   佢話咁不如睇下主診醫生會唔會早啲嚟啦   點知主診醫生 7 點就嚟咗 lu   話睇番病人情況唔係咁急切要裝機   因為喺可能病人兩年前入院   入院嘅時候有好多病一齊引發左出嚟   例如血壓高或者哮喘   咁啲醫生咪將每一種病嘅藥都加重咗令到心跳慢咗   所以依兩日幫番病人減輕番啲藥   而病人心跳 OK 番好多   無咁慢   可以食藥控制到   不過裝機都係遲早嘅事   而裝機好處係會幫妳調節到正常嘅心跳   唔好處喺病人可能幾年後先裝機   但依家裝咗   部機幾年後已經無哂電   要換電池   即係要再做多次咁解   天呀   你想我點呀   又係你哋 3 個醫生見議裝   之後主診醫生你話唔係咁急切裝機   裝唔裝係睇下家人嘅意願   醫生   我見你係想聽你意見咋噃   咁樣我哋仲有無信心聽你哋講野呀   一時一樣咁   有無離譜啲呀   真係人都顛呀   不過聽醫生啲語氣   再加上食藥可以控制到   所以決定唔幫媽咪裝機喇   媽咪聽到話唔駛裝之後開心到不得了呀   咁我哋都係開心嘅 ~

之後同埋家姐一齊去 APM 嘅赤丸食烏冬   家姐話啲烏冬煙煙韌韌好好食   咪試下囉   好在等咗 20 分鐘有位   3 個人叫左熱烏冬加大 + 兩個冷烏冬 + 吉列朱扒 + 日本餃子 + 燒排骨 + 煎肉腸 + 脆爆雞粒 + 天婦羅日本南瓜   個冷烏冬真係好好食呀   煙煙韌韌再試下食熱烏冬   好腍呀   一啲口感都無   好在里奧大人話食熱啫   唔係 Share 就慘喇   不過見自己同家姐食啲烏冬咁好味   而里奧大人個烏冬又腍劈劈   覺得佢好似好慘咁   其他小食都 OK 呀   細細碟又快   因為間舖頭好細   同埋選擇野食又唔多囉   不過我覺得好抵喎   埋單 $115 唔駛加一   我下次會再去   因為啲烏冬真係好好食呀 ~

~~~~

今朝遲大到呀   所以買咗 $10 燒賣粉果番公司食   再沖多杯咖啡 ~

晏晝無咩胃口   所以去咗食白粥 + 炒米粉 ($13)   抵呀 ~

今日 CC 放假   無得 MSN   公司又無嘢做   悶死我囉 ~

好在媽咪今日出院   唔駛再樸嚟樸去咁辛苦喇   不過我都會去媽咪屋企食飯同過夜   因為里奧大人本應要喺廠開夜會同過夜   但有個客突然間話要第日早上見   所以咪可以趕番嚟香港囉   但之前已經同媽咪講咗話會過夜   同埋啲功課又放咗喺媽咪屋企度   所有費時滕嚟滕去   索性瞓埋呀   橫掂里奧大人好恨好恨有自己嘅 Free Time ~

鴻星 @ 紅磡 ( SEP-2007 )

星期五晚要番學   所以要自己食晚餐   又係食牛丸米 + 腐乳通菜 + 可樂 ($22)   食到好悶呀   因為實在太早食飯喇   唔食又唔得   因為 9 點半先放學   番到學校真係好攰   好想番一半就走   但唔得呢   因為里奧大人接我放學呀 ~

一出學校門口無幾耐   見到有巴士   即刻跑跑跑去追啦   跑到站度佢居然開車呀   激死人呀   兩副老骨頭散哂喇   嗰晚又焗喎   見到里奧大人一路企一路流汗   好心痛呀   因為我覺得佢好似好老好辛苦咁   好在等咗無幾耐就有車咋   喺車度傾下傾下好快番到屋企lu ~

好想食糖水潤下   所以就去咗屋企附近度食糖水   食彩虹同雜果涼粉   食完真係好心涼   但好赤呀   大拿拿四十八蚊呀   所以我哋只可以每季豪一次食果度嘅糖水咋 ~

星期六 Off   所以瞓到成 10 點先起身   即刻洗頭沖涼換衫走人   去見我深愛嘅朱朱   去到媽咪屋企附近先行食早餐   奶油多 + 涷央 ($13)   後就上媽咪屋企坐下   讀下書等里奧大人放工   再一齊同埋深愛嘅朱朱食 Lunch 喇   差唔多 2 點就去大排檔等里奧大人   離遠見到里奧大人   仲見到佢拎住細細嘅紅色盒仔   係 MTR 既 Giroro 嚟㗎   好開心呀   之後拿拿臨叫嘢食   其實我早餐都未落格   但唔食又比里奧大人鬧   所以就食咗碗齋米算喇   清清哋   食完又拿拿臨走喇   因為實在太熱熱熱喇 ~

食完就上番媽咪屋企抖一陣   再出發探媽咪喇   好好好好攰呢   見到媽咪都好精神   心情都唔錯.都好啲   因為住醫院真係會好悶同埋好驚嘅   明白明白   我哋探到 7 點就要走喇   因為約咗家姐一齊去紅磡嘅鴻星同婆婆等人做節呀   去到差唔多 8 點   諗住有得食   但差唔多成 9 點先開席   大佬   星期日唔駛番工啫   但都攰㗎   所以好怕同婆婆飯局   左等右等但都係唔齊人   都係一路食一路等   咁點解唔 8 點食呢 ?!   開席時個個都好肚餓   食咗乳豬全體 + 帶子 + 龍蝦 + 蟹皇翅  +   個個都仲係覺得好肚餓   搞笑   之後就嚟魚 + 鵝掌 + 雞   就開始叫做飽喇   好驚訝呀   因為有我最鍾意食壽包食呀   心諗做節會有壽包嘅咩   然後突然成隊兵楂住酒杯咁入嚟   向我阿姨一個人敬酒   原來婆婆訂位時話阿姨生日要加壽包   真係第一次見㗎咋   婆婆又幾細心噃   哈哈 ~

食完成 11 點 20 分呀   番到屋企沖洗完成點幾呀   好攰呀 ~

鉄板 TEPPAN @ APM ( SEP-2007 )

刺身盛合 8 款 / 大阪長芋 - 雜錦燒餅 / 鐵板日式餃子 / 燒雞軟骨串 + 雞腎串 / 鐵板雞扒湯拉麵

尋日成日都喺度種菇   種到收工   之後就即刻搭車睇媽咪喇 ~

好好彩即刻有車   但我叫落車時   個司機係舉手應我   點知去到醫院附近唔停仲行多成條街   我咪話醫院有落喎唔該   佢喺半路中途停比我   仲係度細細聲依依哦哦   我真係頂頂頂頂頂頂佢個肺吖   自己衰咗仲咁樣   唔係見你係阿伯同埋   唔係我趕住見媽咪   鏟到你飛起呀   當我落咗車發覺四圍都無行人燈   啲車係咁飛嚟飛去   啲司機又喺度好疑惑咁望住我   唔係以為我係傻嘛   唔係以為我想自殺嘛   極度樣衰呀我   連黑兩嘢   係咪咁呀 ~

去度醫院好在見到媽咪都精神又食野   個心都定啲   之後又係話好驚好驚   搞到我又驚   我一驚就會控制唔到情緒係咁鬧係咁話家嘛   其實覺得自己都好衰   因為比着我   我都有少少驚嘅   係少少咋噃   之後心諗我之前做手術係全身麻醉添啦   我唔驚做手術   最驚係要種豆同吊鹽水   啲感覺好恐怖   因為我動作大   好驚扯斷呀   但同媽咪講都係唔明㗎喇   佢嗰一刻係唔洗咁驚   因為有人傾偈分散左注意力   之後咪又係一樣驚餐飽 ~

無耐里奧大人同家姐都嚟埋   同埋媽咪傾下偈   眨下眼就 8 點喇   要走 lu   媽咪呀媽咪   妳知唔知妳一入院我就頂級擔心㗎   呢幾日我真係身心俱疲   個頭又好重重重呀 ~

好想食日本嘢   所以去咗 APM 既 TEPPAN   橫掂未試過   一望無咩人既 ?!   唔通唔好食 ?!   APM 既食肆無理由會咁靜㗎噃   不過唔理喇   照衝入去   我哋 3 個人   坐喺兩張拚埋一齊嘅二人枱   最頂癮係得 3 張椅囉   古古怪怪咁   由於里奧大人生痱滋   所以特登叫咗碗鐵板雞扒湯拉麵   因為拉麵得兩款   另外一款係吉列黑豚肉   咁熱氣   咁無計啦   而家姐又極度極度肚餓   所以 Order 咗最快既燒雞軟骨同雞腎串先   後再 Order 鐵板日式餃子 + 刺身盛合 8 款 + 雜錦燒餅 (厚燒)   Overall 都 OK 嘅   除咗件雞扒 (乾爭爭)   同埋個燒餅   唔係唔好食   係因為好鬼厚啫   成 2 吋厚呀   簡直係成底糕咁   不過我哋唔想嘥嘢   咁就每人 Cut 啲 Cut 啲咁格硬食哂囉   所有野都清哂   呢餐家姐係都爭住請   話係補番里奧大人生日嗰餐飯喎   好在食滿 $220 用恆生卡有 88 折   原本 $420   折咗就 $370 搞掂   雖然係家姐請   但我都覺得好貴呢   因為一個人比哂   不過我食得好好好開心喎   可能同埋家姐一齊食啦 ~

呢幾日好好瞓呀   可能樸嚟樸去呀   但都係唔夠瞓呀   不過都好過瞓唔好嘅   呢兩朝里奧大人唔係上大陸就係聽講座   得我孤零零一個人搭車番工   好失落呀 ~

今朝食菠藺油 (走皮) + 涷咖啡 (小甜) ($13)   晏晝就會喺公司淥米粉再加尋晚自己求其煎既成塊雞扒   但塊雞扒星期一已經醃左   呢排成日探媽咪都無時間煮嘢   唔煮又驚會壞   所以尋晚咪十二萬分既唔願意下煎埋塊雞扒用嚟做 Lunch 囉   咁大塊   食死人呀 ~

諗起聽日 Off 可以瞓晏啲   又可以見到深愛嘅朱朱   好開心呀 ~

今日睇頭條   晴天霹靂呀   車路士領隊摩連奴劈炮呀   同球會雙方同意下提早解約呀   人家覺得佢好帥家嘛   睇車仔除咗睇舒夫真高同波歷克就係睇佢   因為覺得佢好真性情   靚佬依家無得睇佢喇 ~

今晚要番學呀   好攰添 ~

車仔麵 @ 大埔 ( SEP-2007 )

尋日晏晝家姐話我知   醫院打電話嚟話媽咪喺度喊   好驚   情緒好唔穩定咁   聽完之後搞到我無哂心機   媽咪   真係妳驚我都驚㗎   本來諗住睇中醫都唔睇喇 ~

由於里奧大人又喺大陸嘅關係   只有我探媽咪咋   好在公司附近有車到醫院   所以好快可以陪到媽咪   見到佢無厘精神   肯定驚咗成日   無幾耐有醫生嚟咗   話建議媽咪裝心臟起伏器   因為媽咪係心跳快先要入院   食藥可以控制   等佢慢啲唔好跳得咁快   但因為媽咪本應係心跳慢   食埋藥變相慢上加慢   比較危險   所以醫生有咁嘅建議   同埋醫生話呢個係手術仔   只需局部麻醉   一至兩個鐘就搞   傷口約兩吋長   咁呢個起伏器壽命大約 8 年右   所以 8 年後又要再叉電嘅   而價錢約 3-4 萬   唔洗咁擔心 ~

之後家姐嚟到   同番佢講醫生頭先話建議媽咪裝心臟起伏器   家姐都話好   之後媽咪話好驚   家姐就問驚啲咩 ?!   佢又答唔出   連工人都話做囉   醫生叫妳做咩咪做咩囉   唔洗驚噃   咪係囉   有咩好驚 ?!   做咗係對自己好仲駛咩諗咁多啫   仲有喎   妳話做都要等專科病房 Check 咗  再 Book 手術室   唔係話做就做   做咩再要拖啫   之後婆婆同大舅父都嚟咗   婆婆行動不便都嚟探媽咪   搞到我都好心痛添   我又要再詳細講多次醫生話咁咁咁比佢哋知   婆婆同大舅父諗都唔駛諗就話做啦   做咗身體好仲駛咩諗咁多啫   媽咪又喺度喊   又話好驚   驚到朝早無知覺喎   點知大舅父話妳無知覺 ?!   咁又點會有知覺話自己無知覺呀   比妳激死   佢咁講我都係度笑   大舅父仲話妳唔做比佢做呀   又話妳咁驚   我哋陪妳一齊每人裝一個喇   講到黐哂線呀   之後叫我去 Book   唔好比媽咪諗咁多喎   但家姐話等媽咪自己親口話做先 Book   唔係一陣話好驚都係唔做仲煩   媽咪比我哋車輪戰一輪終於話做喇   我就拿拿臨出去同護士 Confirm 做手術   隔無耐有個高級啲嘅護士同我哋講係咪我哋同意媽咪做手術   我哋話係   但佢話最終都係睇病人同唔同意   媽咪同護士講好驚   護士話個個人做手術都驚係人之常情   明白嘅   咁妳做唔做手術吖   好在媽咪話做咋   幾驚 ~

番屋企途中   家姐打嚟話媽咪已經轉咗專科病房   太好喇   快啲做埋個手術   咁就大家都安心喇 ~

個人無咩心機   同里奧大人又唔知食咩好   但又想食啲濕嘢   所以就食車仔麵喇   .最緊要係平嘛   我食辣魚蛋 + 豬腸 + 魷魚 + 生菜米粉 ($21)   里奧大人就食魚蛋 + 牛腩 + 生菜米粉 ($16)   再加罐西柚味汽水   正到痺呀   食完拿拿聲番屋企   因為我實在太攰喇   可能頻頻樸樸同埋又擔心媽咪   真係好攰好攰呀   沖埋涼   睇睇下書已經進入睡眠狀態   非瞓不可呀 ~

~~~~

今朝喺巴士度又唔想瞓   所以拎本書出嚟睇   又 OK 噃   無謂嘥咗啲時間嘛   同埋我覺得朝早睇書會入腦啲   因為咁早唔會有任何野諗嘛 ~

又係咁   又係要快食早餐   食火腿芝士菠蘿包 (走皮) + 涷鴦 (小甜) ($15)   非常飽但唔緊   因為要幫媽咪買冬薑   橫掂又無帶飯   順便出去食埋同行下   放下啲悶氣 ~

Lunch Time 出去食豬手米加菜 ($18)   其實頭先一路行一路諗食唔食好   想食豬手係因為有骨膠原   但又驚係一隻豬手咁第埋嚟   之後又喺度諗啲豬好可憐呀   第時仲買唔買豬肉好呢 ?!   好驚呀    我又唔想食其他嗰啲嘢喎   終於都鼓起勇氣叫咗碗豬手米加菜喇   好在唔係成隻豬手咁第埋嚟咋   唔係唔知點算好喇 ～

食完就起程買冬薑   好黑仔呀   諗住去優之良品買   點知執咗   咁退而求其次去百佳買檸汁薑   又係無得買   唔係嘛   搞到我好熱呀   之後諗起附近有間舖係買啲咸酸濕嘢   就即刻去買   好在有開咋   即刻買左包冬薑同金桔   但我驚唔好食   所以再去 Market Place 買多包糖   不過估唔到自己會有收穫喎   就係買咗支菜油呀   我搵咗支菜油好耐㗎喇   又唔想特登為咗支油去烘焙店買   所以頭先買到好開心呀   都唔敢同里奧大人講買左支油呀   唔係又話我顛㗎喇   山長水遠咁重買支油番屋企   都唔明白人哋嘅 ~

番到公司又喺度種菇 (悶到發霉)   頭先又行到香汗淋漓   依家好眼瞓呀 ~

好煩呀   買唔買 MTR 既 Giroro 狙擊風扇好呀 ?!   八十蚊呀   見到真身又幾得意喎   但八十蚊太貴喇   都係日日去   睇到厭就唔想買佢就算喇 ~

食棧 @ 大埔 ( SEP-2007 )

尋晚放工即刻去睇媽咪 lu   喺醫院樓下間便利店買啲報紙雜誌同日用品比媽咪   Cashier 話多謝 $30   好開心啦   以為又有 2 個叮噹 Chop   點知原來嗰間係 OK 嚟㗎   空歡喜一場添 ~

去到探媽咪嗰層樓   好奇怪   因為係老人科病房   同埋唔係應該入內科既咩 ?!   其實一路行一路都好擔心   因為驚見到媽咪係好無精神同好辛苦咁嘅樣   好在見到媽咪都好精神   之後一齊傾偈   媽咪仲笑到流眼水添呀   真係放下心頭大石咯   然後媽咪又講番因為醫院內科無床位   所以要住老人科病房   之後仲好開心咁話   推佢個嬸嬸話做咗咁耐   妳係最後生嘅一個呀   因為佢推親入嚟嗰啲都係 80 幾歲老人家喎   咁樣媽咪可能已經開心咗成個下晝呀   因為媽咪唔鍾意人叫佢做阿婆喎   原來咩年紀都係鍾意人讚㗎   而男人都係一樣 ~

之後媽咪又叫個工人煮啲咩咩比家姐食   買啲咩咩咩   我即刻同媽咪講   妳唔好再諗呢啲喇下   咁大個人識啦   唔煮咪出街食囉   唔駛咁擔心㗎   咁大個人   喺醫院就抖下   由得工人自由發揮啦   佢識煮咩咪煮咩囉   唔駛為呢樣野煩喎   之後媽咪真係無再諗喎   淨係諗自己聽日想食啲咩嘢   咁咪好囉   放鬆嘛   過咗陣家姐又嚟埋   一齊陪媽咪到 7 點半就走 lu ~

走嗰陣時好鬼肚餓    腦海全部係食物    壽司 車仔麵 燒賣 辣魚蛋 牛雜河 越南菜 朱古力   不過一坐車個人就好鬼眼訓   合埋眼想瞓嗰陣時   表妹打嚟傾咗陣   之後再合埋眼想瞓時   到家姐打嚟又傾咗陣   真係想瞓下都唔得呀   咁已經差唔多到屋企附近   係時候叫里奧大人落樓一齊食晚飯喇   最後我都係揀咗食越南菜   因為好想食佢嗰啲醋 ~

一入到餐廳即刻叫咗個越式蒸粉包 + 椒絲腐乳生菜 + 越式拚盆   可能真係好肚餓嘅關係   所以覺得碟菜好好食   之後嚟個粉包又係好好食   因為可以撈醋一齊食   但一見個拚盆就好驚   因為我覺得太多熱氣野同埋太多肉   個拚盆有扎肉+越式燻蹄+炸雞各 4 件+1 件大豬扒+3 條越南春卷   講真   除咗春卷令我想食之外   其他真係唔想食   因為我好憎食扎肉同越式燻蹄   見里奧大人又唔係點郁   將啲嘢撩下撩下咁   我就問頭先你有無食少少嘢等我呀 ?!   佢話有呀   淥咗個福麵食囉   我即刻話食皇帝蕉嘛   唔好食麵咁飽嘛   之後佢好笑笑口咁話都有食幾隻蕉呀   天呀   .咁已經係一個晚餐嚟啦   早啲同我講嘛   因為本來想叫沙爹但驚唔夠   所以叫拚盆多啲嘢嘛   最後將 豬 同雞翼比我帶飯囉   太多肉添   但唔帶又嘥 ~

尋晚真係好攰   沖埋涼睇陣書已經好攰   10 點 45 分就瞓喇 ~

~~~~

一覺瞓天光呀   好開心呢   但點解都係咁攰既 ~

今朝又係食個快哽早餐   食腿蛋治 + 熱鴦 ($14)   死啦   又飲咖啡   上左癮添   又係無無聊聊   咁悶   真係一日飲 20 杯咖啡都無用呀 ~

晏晝帶飯   係尋晚食剩嘅豬扒同雞翼   同埋星期一食剩嘅炒飯   希望唔會肚屙啦   又係無野做等放工 ~

指天椒梅菜炒豬肉 + 炒飯 + 蒸茄子 + 酸齋 ( SEP-2007 )

尋晚放工突然好想食酸齋   同埋驚無咩餸   所以就去咗 "自家素食" 買咗酸齋同齋鴨腎 ($10)   其實嗰度啲齋麻麻哋好食   但無其他選擇   所以算吧啦 ~

尋晚可以好他條咁買餸呀   因為淨係買蔥同指天椒   不過都好黑仔   因為我喺街尾落車   諗住街頭有得買指天椒   所以行去街頭   點知無   又要行番街尾   喺度行嚟行去   之後見到有皇帝蕉...就買左一梳 $10 孝敬里奧大人喇 ~

唔知係咪星期一嘅關係   所以做咩都無咩心機   諗住啲嘢唔難煮   所以比自己抖 5 分鐘休息先開始煮飯   是日晚餐: 雜豆菜脯粒炒飯 + 指天椒梅菜炒豬肉 + 蒸茄子

其實炒飯 / 蒸茄子 / 炒豬肉都係好易   因為豬肉已經醃好咗   但由於所有配料都要切粒粒   所以即刻變咗唔易 ~

首先我將菜脯 蔥 指天椒 蒜頭切粒   再浸下啲甜梅菜   其實唔知要唔要浸   但我覺得浸左會乾淨啲   由於我喺唔會用菜刀   我驚切親啲手指呀   把菜刀一年都唔知有無用到一次   所以我次次切粒都係用較剪仔剪嘅   可想而知要用幾多時間呢 ~

剪哂啲配料就開始炒飯喇   將菜脯粒 蔥粒 雜豆加豉油老抽一齊炒   非常呀   搞掂之後就整梅菜炒豬肉   因為我鍾意食甜既梅菜   所以用好多糖炒甜啲梅菜   OK 之後再落 4 隻指天椒同埋啲豬肉一齊炒   試下味   點知辣到條脷痺咗   即刻撩番指天椒碎出嚟   因為驚里奧大人頂唔住   之後教慢火炒   由於時間關係   所以我炒豬肉既時候已經煲滾咗水   再跟住個蒸茄子既 Recipe 做   煮嘅時候才將茄子切條   因為茄子一早切定會變啞色 (好肉酸)   放上碟再將蒜蓉碎舖面   蒸 10 分鐘加蔥花   淋啲熟油再加豉油   一齊搞掂喇   8 點可以開飯   有進步呀   用咗 1 個鐘咋 ~

今次對自己嘅廚藝都頗為滿意   .所以就好有信心咁問里奧大人好唔好食呀   里奧大人話好食呀   仲話估唔到啲茄子蒸出嚟白雪雪又好味喎   又話之得唔買好盒齋啦   嘥左要格硬食   因為有好多炒飯   我帶埋飯仲有一大碗剩呀   所以我嚟緊呢兩日 Lunch 都係食隔夜炒飯㗎喇 ~

好攰呀   又好悶呀   因為一食完飯   里奧大人就會即刻入房做功課   之後就得我一個人喺廳度睇電視睇書   呢啲日子仲要有成年半比我捱呀 ~

今朝又係好趕   所以食芝腿治 + 涷檸茶...$16....好貴呀...仲要係趕頭趕命食果隻添...因為我唔想成日坐喺公司   好悶啫   喺食早餐既時候   聽到有一對男女 (40 歲左右) 對話   個女食油多時見到塊牛油就同男講想要把刀   男就要嚟做咩 ?!   女就話想搽平啲牛油   男就好悔氣咁話食油多喺咁成舊食㗎啦   之後個女就成嚿咁食喇   嗰一刻   我即刻諗起里奧大人   因為佢唔會咁對我囉   如果我要啲咩嘅話   佢會問要啲咩   然後就會第一時間舉手叫人攞囉   所以嗰一刻   覺得里奧大人好好呀 ~

媽咪入咗院添   心律不正同肺有啲水呀    搞到我無哂心機添   好想快啲睇媽咪呀   橫掂又無嘢做 ~

牛蒡紅蘿蔔豬𦟌湯 + 煎釀孖寶 + 沙茶醬炒脆肉瓜 ( SEP-2007 )

尋日 10 點要起身喇   因為要番教會呀   咁唔想食西餐   所以就同里奧大人去熟食街市度飲茶   好 Relax 呀   食咗雞扎 + 燒賣 + 粉果 + 山竹牛肉 + 咸水角   好飽呀   埋單 30 幾蚊咋   真係好平呀   但可惜去咗一間無咁好食呢 ~

崇拜完就同里奧大人逛下個冷氣街市   難得里奧大人又陪喎   所以買咗好多嘢   最開心係買到越式春卷皮 + 泰國青檸 + 糖冬瓜   因為唔駛特登出九龍城買嘛   其實我買糖冬瓜係因為想整千層糕比媽咪食   但成日唔見有所以唔整 (籍口)   依家買到   係咪即係暗示要我快啲整   行下行下就挑起左我條掃貨筋添   所以買埋啲屋企附近街市有得買既嘢   五花茶 + 酸梅湯包 + 甜麵豉 + 南乳 + 餃子夾   仲想再買其他野㗎   但給里奧大人阻止了 ~

之後去 Jusco 買雜糧同埋冰皮月餅   其實想自己試下整   但係無時間同無咩信心   所以都係買番嚟好啲   買咗里奧大人鍾意食嘅味道   就係紅豆綠茶同綠豆蓉喇 ~

其實一心諗住同埋里奧大人一齊買餸買生果嘅   但因為之前買左一袋二袋   里奧大人無手再拎   唯有叫佢番屋企先啦   咁等我自己孤零零買啦   生果好重家嘛   係喎   點解里奧大人唔話不如一陣再一齊落嚟買野嘅 ?!

番到屋企又喺時間食晏喇   所以煮左里奧大人至愛丁丁喇   再加埋支檸樂   正正正正呀 ~

抖左陣就開始煲湯同燉湯 lu   因為個燉盅買咗成幾個月   再唔用就比里奧大人鏟到上天花板㗎喇   死要買又唔用   所以咪燉啲肉汁比自己補下囉 ~

是日晚餐 - 牛蒡紅蘿蔔豬𦟌湯 + 煎釀孖寶 + 沙茶醬炒脆肉瓜

今次唔再高估自己煮野嘅能力   所以 6 點半就開始預備喇首先係切好青椒同茄瓜   再釀鯪魚肉入去   雲吞麵舖買的   之後再切埋啲脆肉瓜   開始煮野喇   我將啲孖寶一路煎一路加水同茨汁   因為驚啲青椒同茄瓜唔熟   所以比較嘥時間同埋煮出嚟嗰樣比較衰啲囉   之後就用咗紅蔥頭 切碎 + 蒜蓉 + 一湯匙沙茶醬嚟炒脆肉瓜   終於煮好哂野喇   煮餐咁既餸都要成8點先有得食呀   個幾鐘呀   係要作出檢討呀 ~

里奧大人一見我拎碟孖寶時就話好香好靚呀   咁都有啲安慰   問里奧大人呢餐晚飯好唔好味呀   話好味話   啲茄瓜索哂汁好好味呀   啲汁好好味呀   我啲汁係現成買番嚟唔係我煮㗎   之後里奧大人嚇到唔咁再出口讚啲餸   默默咁喺度食飯   之後我再問啲湯好唔好飲   里奧大人好真誠真摰咁話好好味喎   真係好清甜呀   講真   啲湯又真係好清甜喎   所以我決定嚟緊都係煲呢隻湯先   橫掂仲有牛蒡剩番喺度 ~

因為晏晝喺 Jusco 買咗個大壽包   所以就留肚食   雖然唔係好好食   但食得都好開心囉   唔知點解我一見到壽包就好開心同埋好想食佢呀 ~

食埋又到時間睇阿蘇   睇完又到時間瞓覺   星期日真係超級容易過呀 ~

~~~~

今朝食走皮嘅菠蘿芝士火腿包 + 涷檸茶 (小甜) ($15)   勁勁飽 + 勁勁趕呀   今朝好忙呀   所以好快就到咗 Lunch Time 咁   晏晝又係食番尋晚嘅嘢   咁點都好過出街食 ~

頭先嚇死   家姐話媽咪心口痛   心跳得好快   血壓二百幾   嚇到我心都離埋   好在後尾媽咪打比我話無事咋   話可能頭先驚個工人仲未買餸   煮唔切喎   同埋天生係緊張型   無計   呢樣我都信㗎   因為我都係嘛   好似初初結婚時   煮完飯成日都心口痛   因為驚啲餸唔好食   唔係煮啲咩喎   獨弧一味係雜豆或梅菜炒肉粒 + 鹹蛋節瓜瘦肉湯   咁都驚餐死呀   所以依家一煮呢兩樣餸就會不期然諗起初初結婚煮飯時嘅慘痛經歷   點解慘痛 ?!   係因為里奧大人話好悶呀   來來去去都係呢兩味餸呀 ~

再元綠壽司...因為 75 折... ( SEP-2007 )

晏晝勁熱呀   所以都無諗夜晚煮咩野好   同埋飲完茶上咗水姑屋企傾咗陣偈   番到屋企都成 6 點半   又煲唔到湯   唯有出街食啦   又係元綠呀   因為熱辣辣最好選擇 ~

其實係因為元綠堂食有 75 折優惠呀   仲平過我用元綠會員卡   係咪唔食對唔住自己先   哈哈   所以同里奧大人合力叫咗蟹子壽司+鮮帶子壽司+火焰帆立貝壽司+吉列炸蝦卷+炸軟殼蟹手卷+中華沙律+吹風脆雞翼 (辣)+天婦羅日本南瓜+巨峰蘆薈+炭燒水晶咖啡   真係好好好好好好飽呀   埋單 $142 咋   有 75 折真係唔同啲   食完又行一陣消化下咁啦   因為條街好焗   所以都唔跑步 lu   唔係焗都焗暈呀 ~

由於番到屋企都仲係好飽   所以決定熨衫郁下   熨熨下喺度諗   自己晏晝飲茶食咗煎堆同炸雲吞   頭先又食埋啲炸軟殼蟹同炸南瓜   仲飲埋咖啡   得個人好熱氣好躁咁   所以就榨咗一大杯甘筍蘋果汁同里奧大人一齊潤一潤   杯果汁勁正呀   又甜又清   第時買定啲甘筍蘋果放喺雪櫃   得閒榨嚟飲都唔錯喎   不過洗同切煩啲咁囉 ~

之後都仲係覺得好躁   食埋個罐裝龜零膏   食食下又驚太涼會暈   所以逼里奧大人食埋剩番嗰半罐   好似好衰咁   因為里奧大人真係好飽   係格硬食埋去㗎咋 ~

諗住讀書夜啲瞓   所以食飯嗰陣飲咖啡   點知 12 點幾有啲眼瞓   但瞓唔着   所以出廳玩 NDS   玩到 2 點幾覺得有少少眼瞓   好在啫 ~

鯪魚球河 + 腐乳通菜 + 細支裝可樂 ( SEP-2007 )

由於尋晚要番學   所以要自己食野喇 ~

放工嘅時候   條街焗到暈呀   我仲係要坐熱九添   又焗又熱又嘈   咁所以特登早啲落車行下九龍城   因為我好鍾意行泰國食品店   但一落車其實有啲後悔   因為條街實在太焗喇   好在行行下有啲收穫咋   係泰式甜酸醬 ($12) + 1 包辣椒粉 ($5)   見要番學咋   唔係買埋青檸同石榴子番屋企嘆呀 ~

行到差唔多夠鐘食野喇...咁就去番上次食嗰間麵店   食鯪魚球河 + 腐乳通菜 + 細支可樂 ($24)   想唔飲㗎   但實在太熱喇   越食越熱   我感覺到頭皮啲汗係湧緊出嚟呀   咁熱之得唔食粉啦   一陣仲要行一大段路先番到學校   真係諗起都想喊呀   點知一出門口   原來仲涼過舖頭入面呀   顛㗎 ~

番到學校真係有啲攰   可能出咗一身汗啦   不過好在牧師教嘅手法係好輕鬆同好搞笑   所以好快咁就到放學 lu   好在一出去就見到有巴士   我唔想里奧大人自己喺屋企悶咁耐嘛   其實佢好忙做功課   尋晚里奧大人喺屋企附近嘅巴士站接我   第一時間幫我拎袋   又幾鬼細心噃   之後諗住食街邊檔既燒烤   無嘅 ?!   上次明明有㗎   唔通要 11 點幾先有 ?!   好失望呀   所以番到屋企食番個朱古力甜筒補數   肥死呀   .不過我試過兩次喺臨瞓前 1 個鐘到食朱古力甜筒   嗰晚真係可以一覺瞓天光㗎 ~

~~~~

今朝要番工呀   所以可以同里奧大人一齊食早餐   我食沙爹牛肉出前一丁+ 熱檸茶    里奧大人就食火腿鮑絲通粉 + 熱檸茶   我真係食唔哂個早餐呀   所以要里奧大人格硬食埋剩咗嘅 1/3   唔好嘥嘛   橫掂里奧大人每晚又會跑步 ~

今朝我同 CC 都好忙   所以無咩 MSN   好唔慣呀   之後打比媽咪   媽咪好無尼神氣咁應我   嚇到我個心都跳咗出嚟   原來媽咪肚屙   唔通係尋日晏晝同我飲茶時食咗嗰啲呀   好在我無事 ~

晏晝會同老公 奶奶 水姑飲茶   又飲茶   同里奧大人由拍拖到結婚成 10 年喇   次次都係同佢哋飲茶   真係食咩都無味呀 ~

韭王叉燒炒麵 + 白灼菜心 + 豆腐紅衫魚湯 + 感觸 ( SEP-2007 )

一於再接再厲煮叉燒炒麵   所以放工即去 Market Place 買盒叉燒 ($19)   其實想買$10   因為我唔鍾意食叉燒   同埋唔想里奧大人食咁多紅肉   但又唔知有無得咁買   又驚比人鬧買 $10 咁少   所以就逼於無耐買囉 ~

尋晚買餸都好舒服   .因為買親都係唔重嘅野   買咗斤靚菜心 ($10) + 豆腐 ($2) + 紅衫魚 ($14) ~

由於一番到屋企就收到里奧大人 SMS 已上車   以要趕快煮飯   務求可以里奧大人一回家就有飯食   哈哈 ~

是日晚餐 + 韭王叉燒炒麵 + 灼菜心 + 豆腐紅衫魚湯

諗住好易整   但都差唔多整咗成粒鐘   要 8 點幾先開飯   救命呀 ~

滾湯無難度係煩啲啫   因為要煎一煎啲魚先至可以放落湯度   但點解唔係奶白色既 ?!

煮麵無難度又係煩啲啫   因為要將叉燒同韭王切絲   將啲麵要用滾水撩散去先可以炒   今次改用豉油炒   真係入味好多喎   其實可能係用叉燒嚟炒 ~

煮菜無難度   因為要浸同埋拻咗啲 "衣"   食落去就無渣喇   由於唔想里奧大人食咁多蠔油   所以我就爆香蒜泥   之後再淋啲豉油同麻油喺菜上面   正呀 ~

我覺得今次炒麵好食好多   但個湯就麻麻哋   因為唔係奶白色    但我滾咗成個鐘喇噃 ~

之後問問里奧大人幾分先   佢笑住話有 80 分喎 ~

比埋嗰 20 分同情分都唔怕啦   無啲情趣. ~

洗埋碗成 9 點幾   .再做下家務   沖埋涼成 10 點幾   喺屋企嘅時間真係覺得唔夠駛   眨下眼又過 1 個鐘   .眨下眼又過 1 個鐘 ~

~~~~

今朝起身見到個天陰陰暗暗   個人都顯得比較攰   唯有靠咖啡啦   所以今朝食腿蛋治 + 熱啡 ($14)   我對咖啡講   飲埋呢杯今個月真係唔想再飲你喇   因為我差唔多連續兩個星期係咁飲咖啡呀鴛央咁呀   咁樣會好傷胃㗎   又燥又刺激皮膚喎   最慘呢啲係心癮   醫唔到眼瞓 ~

晏晝同媽咪飲茶  食咗勝瓜鱸魚片炒麵 + 北菇鴨掌 + 馬拉糕   .仲有媽咪煲左愛心南棗北芪比我補補呀   媽咪真係好好呀   I love u ~

突然好感觸添   細個窮但好開心   因為知道爸爸媽咪家姐好錫自己   雖然窮   但爸爸媽咪永遠會用僅嘅既錢買零食比我同家姐   唔係 1 件 Share   而係 4 件 4 件咁買   仲係要大 Size 嗰啲   好有印象係超大牌嘅吉百利果仁朱古力   超大條嘅三角朱古力   超大包嘅珍珍薯片   仲有花生糖   爸爸係成一大袋咁買番嚟   真係食到驚呀   所以依家行親超市見到呢啲嘢食   就好懷念自己細個好開心好幸福   因為知道爸爸媽咪見到我同家姐開心就等如自己開心   用幾多錢都無計嘅 ~

家姐呢   細個對我又好好好好好好㗎喎   依家都係   因為叫佢做咩就做咩   絕無反抗   媽咪話家姐細個好乖好純好抵錫㗎喎   因為佢會將自己鍾意嘅嘢擺到最後   好嘢就比哂我 ~

媽咪話我哋細個去大家樂食早餐   我自己食牛扒蛋   家姐媽咪就 Share 食奄列   其實家姐鍾意食牛扒蛋   但因為媽咪鍾意食奄列   所以要迫家姐一齊食囉   因為買 3 份早餐好貴呀   家姐妳好可憐呀   所以我依家買嘢食比家姐要食到佢驚為止先收手   我要補償番比佢呀 ~

爸爸   雖然您離開咗我哋好多年   但我覺得您只係去咗一個比較遠嘅地方   同埋您會昅住我同家姐   睇下我哋對媽咪好唔好   爸爸您放心啦   對媽咪嘅好只會有多無少㗎   比埋您嗰份比媽咪嘛   哈哈 ~

突然有嘢做   好唔慣呀   今晚又要番學   希望有精神啦 ~

咸蛋皮蛋粥 + 韭菜魷魚絲炒麵 ( SEP-2007 )

尋晚不斷喺度問媽咪點整粥同炒麵   覺得唔係好難   所以就決定整喇   但事實上我太高估自己了 ~

材料已經一早寫好哂喇   咁去到街市就即刻買蛋麵   因為買粉麵嘅舖頭比較收得早   好好彩   最後 3 餅都比我買埋   之後買魷魚 ($18)   估唔到呢啲膽固醇咁高嘅嘢都要咁貴   不過見媽咪用魷魚嚟炒麵整得好味我先買咋   再去買韭菜 ($2)   搞掂 ~

因為里奧大人一聽完 Seminar 就番屋企   所以佢早番過我   咁即係代表我要快啲煮好飯啦   里奧大人尋晚好古怪呀   因為居然主動話洗衫   之後仲燙埋衫呀   嗰一刻真係老懷安慰呀 ~

開始煮野喇   首先用煲仔煲粥先   係咸蛋皮蛋粥   清清哋又方便   不過好黑仔   洗完隻咸蛋唔小心先跣咗左落鋅盤   見有少少裂開咗   唔理佢照煲熟   點知一開蓋蛋黃同蛋白飛哂出嚟呀   又要再煲個另一隻呀   激死激死   見煲粥滾咗   就將皮蛋咸蛋切粒放落去慢慢煲   搞掂 ~

第二就係煮韭菜魷魚絲炒麵   首先切魷魚   我將隻魷魚係咁沖係咁沖乾淨去   之後切鬚   但切切下鬚見到有粒淺啡色物體   已經叫咗買魚嗰人切左隻眼㗎噃   咩嚟㗎   斷估應該唔食得   所以用把刀挑左出嚟   啲感覺好恐怖呀   其實嗰刻已經嚇到半死   因為我由始至終都好驚隻魷魚會翻生   由於隻魷魚比較大隻   所以切開 3 份再切絲   見仲係滑潺潺就再沖水   又見到魷魚身入面有啲紅色物體   想暈呀   之後 "必" 出嚟睇下係咩   原係條魚仔嚟㗎   嚇咗兩野我已經好驚   有啲頭暈同想嘔   諗住叫里奧大人切   但我要克服心理障礙   自己嚟   不過將會是最後一次整的 ~

最後炒麵喇   將韭菜切條   同魷魚絲炒熟   再加炒麵兜勻   我用咗兩個麵餅...因為我要帶番公司 Lunch   如果唔係嘅話   1 個半都夠   媽咪就加豉油去炒   而我就用頭抽去炒   里奧大人超級喜歡食頭抽   而食嘅時候就會蘸桂林辣椒油 + 海鮮醬   好好味呀 ~

點解煲粥會咁杰㗎   煲好嗰陣時明明好靚㗎   啲水啱啱好㗎喎   點解蓋咗個蓋會變成無哂水㗎   又因為早落皮蛋去煲既關係   所以煲粥瘀瘀黑黑咁   好核突呀 ~

毫無心機加強顏歡笑咁拎煲粥出嚟   咁開飯啦   再一次受到嚴重打擊 ~

點解碟麵會無味㗎   係咪真係要用豉油先有味㗎   定係落得少得滯唔夠味呀 ~

問里奧大人餐飯有幾多分   佢眼有淚光想喊想喊咁話有 70 分   咁嘅樣一睇就知係唔好食啦   呃人   之後里奧大人就笑住話啲粥好似 BB 食啲糊仔咁   再話啲麵無味 ~

不過我覺得個粥好食喎   因為我鍾意食咸蛋同皮蛋   個麵都 OK 喎   因為我鍾意食辣椒油 ~

其實整完呢餐飯已經好攰   但應承咗 CC 焗曲奇   因為睇下成唔成功   如果成功就下次去我屋企一齊整曲奇   太開心喇   好成功咁焗到 8 塊牛油曲奇 + 8 塊 M&M's 朱古力曲奇呀   里奧大人仲話好香好好食添呀   都唔知係咪知我已經唔可以再受任何打擊   但開心背後又要再洗再執拾多一次野   好辛苦呀 ~

尋晚咗時間瞓   所以成 1 點先瞓得着呀 ~

~~~~

今朝無咩心機   所以食完早餐先番工   食菠蘿油 + 涷鴦 ($13)   不過我搽少少就夠喇   咁大嚿食完會好唔舒服㗎   咁學咩人食菠蘿油啫 ~

番到公司有啲煩嘢跟   所以時間都過得幾快   晏晝食番尋晚既炒麵   好好味噃   因為好肚餓嘛 ~

今晚我會再接再厲   炒麵用叉燒同蛋絲嚟炒   唔好食既話就以後唔會再整㗎喇 ~

元綠壽司 @ 大埔 ( SEP-2007 )

尋日同完媽咪同埋深愛嘅朱朱 Lunch 之後   番到公司個人突然好唔舒服   連 Blog 都無心機睇呀   係好少有嘅事呢   坐喺公司度發吽哣發到放工 ~

放工拿拿聲番屋企喇   行到半路都係買定支白花油以備不時之需   其實好驚用白花油....因為實在太大陣味喇   唔係人人都頂得順   但我覺得止嘔真係好掂囉   所以依家手袋 公司 屋企實有支白花油喺度旁身   上到巴士先知上層無位   咁就拿拿聲落番下層坐啦   點知死喇   下層好臭同好焗呀   所以即刻拎枝油出嚟索下先舒服啲咋 ~

今次大穫喇   因為番到屋企我連 NDS 都唔想玩呀   之後喺度諗係咪餓得滯   個胃唔舒服所以想嘔呀   好煩呀   坐坐下突然好想食壽司同拉麵   所以咪又係元綠囉   里奧大人食咗至愛嘅既素魚翅海哲壽司 + 蠔情卷 + 三文魚手卷 + 帶子壽司   我食咗個辣味炸餃子拉麵   不過太大碗   所以比咗一碗仔里奧大人食   啲炸餃子好油   好在同里奧大人 Share 咋   唔係就嘥㗎喇   我應該唔會再喺元祿食餃子㗎喇 ~

之後問里奧大人飽唔飽佢話飽同埋好厭   因為之前又食喎   好唔開心呢   因為無問里奧大人想唔想食就去咗元綠   Sorry 呀   等你忙完功課   就同埋家姐一齊去元朗食 18cm 長嘅壽司啦   未去過喎   唔會悶掛 ?!

番到屋企 hea 下就沖涼   Hea 到 10 點半就瞓 lu ~

~~~~

好開心呀   因為一覺瞓天光呢   感謝神呀 ~

今朝精神同氣色都唔錯   所以買兜炒米粉 ($8) 喺公司食再加罐雀巢咖啡 (公司提供嘅) ~

里奧大人晏晝要去中環聽 Seminar   咁啱拎 Coupon 嗰度又係中環   所以特登早啲過嚟同我去Delifrance 食 Lunch 呀   咁去度呢   就叫里奧大人問問有無 Coupon 拎先   無就唔好去喇   點知里奧大人淨係記得拎張地圖   唔記得拎張換領紙呀   咩咁論盡㗎   算啦   唔係點喎   之後當無事發生   好開心咁叫咗個黑椒蜆肉匾意炒配雜菜湯 + 鮮磨咖啡 + 煙鴨胸三文魚蜜桃沙律配忌廉磨菇湯 + 鮮磨咖啡   好好食呀   應該有里奧大人喺身邊陪我先咁好食呀   食完仲可以行多陣添呀   所以今日我會係特別開心 ~

番到公司又係悶到發慌嗰隻   所以我帶咗啲 Notes 番公司睇   無謂嘥咗啲寶貴時間嘛 ~

今晚樣樣都想煮添   點好呀 ~

day off...悶悶悶 ( SEP-2007 )

難得 Off   點知里奧大人之前已經約咗媚媚傾功課同篤波同食埋晚飯   約人之前應該問下我星期六駛唔駛番工嘛   激死   咁有線師傅又約咗  2 點至 6 點先嚟整   最怕係咁   因為咁即係一定要呆喺家中等師傅電話   想約媽咪飲茶都唔得啦   孤零零 ~

瞓到差唔多成 10 點先起身   之後就出車去食早餐   因為泊車好唔方便   所以就去 KFC 食 牛角包 + 阿拉伯加咖啡 ($12)   好 Relax 呢   之後去超市掃貨   好唔慣呢   買咁多野要自己推 ~

番到屋企好有 Mood 做家務   開漂白水抹哂啲櫃呀 門呀 窗呀咁   又拖埋地洗埋衫   好乾淨呢   出咗一身汗   沖個熱水涼好正呀 ~

突然間又心思思想整朱古力   所以就整左 Hazelnuts 朱古力   再整埋桂花大菜糕...再煲埋菊花茶比里奧大人清清熱氣   搞到成 3 點幾先食 Lunch   見沖咗涼唔想出街   一個人又唔知食咩好   所以就整咗盒粟米湯 + 磨菇片   眼闊肚窄   要分隔半個鐘先食得哂   攪到我依家有啲驚咗粟米湯添 ~

之後睇埋報紙都仲係 5 點幾   得一個人嘅時間真係好難過呢   好在里奧大人打電話番黎話陪我食晚飯咋   個人當堂開心哂...點幾師傅先到   整到差唔成多 8 點   個人又唔係咁舒服   師傅喺度整嘢又唔瞓得   搞到我無咩胃口   所以叫里奧大人買車仔麵番屋企就算喇   食完就叫里奧大人試大菜糕   問里奧大人好唔好食   點知話失咗準喎   唔甜同好稀咁嘅   唔係嘛   我跟住 Recipe 噃   但諗諗下上次係實啲   好似只係用左 500 ml 水   但今次跟 Recipe 用 1,500 ml 反而稀咗   因為 Recipe 印 1,500 ml 個 1 字好貼個 5 字   自己又粗心大意無留意到   我今次仲特登用啫喱杯裝住靚啲添   好唔開心呀   之後再比里奧大人試下啲朱古力   話好好食喎   咁都好  有少少安慰 ~

個人真係唔多舒服   所以 10 點幾就瞓 lu   咁既情況下   應該聽日都唔可以同里奧大人出街慶祝結婚 7 週年㗎喇 ~

呆在家...慶祝結婚紀念日 ( SEP-2007 )

難得結婚紀念日係星期日   點知自己又唔舒服   同唔到里奧大人出街慶祝   可惜可惜 ~

里奧大人仲要自己食早餐 (屋企煮麵) 同午餐 (大家樂叉燒飯)   可憐呀 ~

我瞓到成 5 點幾先叫做有啲精神咋   不過都係好攰   同埋成日諗住無得出街慶祝好唔開心呢 ~

到 6 點幾有啲肚餓想食油雞飯   所以里奧大人就去大家樂買喇   但我驚一盒飯兩個人食唔夠飽   所以話買埋腸粉同燒賣   我食幾啖飯同幾舊腸粉已經頂住個胃   可能成日無食野   而里奧大人又話無咩胃口   最後啲飯就差唔多食哂   但腸粉同燒賣就無咩郁過囉   之得唔買啦   嘥錢嘥哂啲嘢食 ~

之後睇多陣電視   而里奧大人又開始忙做功課 lu   就係咁   咁平淡過咗我哋嘅結婚紀念日喇 ~

~~~~

今朝仲係好唔舒服   所以無食早餐   晏晝一定要瞓覺呀   橫掂都唔想食嘢 ~

給里奧大人的信 ( SEP-2007 )

轉眼已經與你結婚 7 週年了   但仍然感覺像新婚似的

但又很有老夫老妻的感覺   真的不能用言語來表達呢

現在我學會怎樣維繫這段婚姻   學會怎樣去愛我的丈夫

以往我會因你常常加班   要我在家裡呆等而亂發脾氣

而沒有體諒你精神上的辛苦   只埋怨你心中只有工作

但現在我學會體諒你   欣賞你對工作的熱誠

知道你是為了將來的生活可以過我舒適點   才時刻的埋頭苦幹工作

以往我會因你常常加班   不陪伴我而時常找朋友解悶

而沒有體諒你肉體上的辛苦   每晚沒氣力的拖着極度疲倦的身體回家

但現在我學會體諒你   體諒你對這個家的付出

知道你要有體力精神才能應付工作   我努力學會了下廚

現在我學會了懂得更加愛你   懂得體諒你   懂得珍惜我倆共同建立的家

容我說聲

老公 我愛您 !!

和民 @ 大埔 + 註冊日 ( SEP-2007 )

諗起里奧大人將要面臨節衣縮食嘅困窘生活   為的是要買扎花送比我   真係心甜到漏呀   真係估唔到里奧大人會咁睇重結婚週年呢個日子   所以尋日真係由朝開心到晚呀   同好感動呢 ~

其實之前想買張卡送比里奧大人   但諗起屋企有好多做裝飾既萬用卡   想用嗰啲嚟送比里奧大人   但諗下諗下覺得咁好似好 Cheap 咁唔好嘅   所以都係唔好送喇   驚里奧大人唱我成世呀 ~

尋晚同里奧大人去和民   因為我好鍾意果度柔和嘅燈光   同埋最緊要係無咁嘈   我哋食和民沙律 (全份) + 燒雞軟骨串 (醬燒) + 辛辣蕃茄年糕 + 蟹肉壽司卷 + Asahi (Medium Mug).   初初驚唔夠   想再叫其他野食   但食下食下就好飽   真係唔好睇碟年糕 Size 細細   好鬼飽肚㗎 ~

聽到隔離枱有對年老嘅母子同一個女仔一齊食飯有傾有講   佢哋一路食一路傾   望下佢哋啦   原來個女仔係個印傭嚟   初初仲以為係一家人添   聽佢哋講個工人仲啱啱結完婚番嚟   仲同工人講話唔見妳肥嘅 ?!    個工人話肥咗喇   有成 50 Kgs 喎   一聽到話 50 Kgs 好羨慕呀   如果係我就好喇   好懷念 50 呢個數字呀 ~

之後同里奧大人行咗陣   睇到有盞床頭燈好靚   $199 呀   好貴呢   Sales哥哥話貴買平用同埋比 Discount 我哋喎   咁買囉   橫掂想換床頭燈好耐   好開心呀   可以買到自己鍾意既嘢 ~

番到屋企第一件事就係查唇彩同扎花影相   第二係連人帶花係咁狂影   仲叫埋里奧大人一齊影   好無聊   好在里奧大人肯幫我影咋   影下睇下都搞成半個鐘呀 ~

之後同里奧大人講   話不如你將啲花擺落花樽度啦   意想不到   真係意想不到里奧大人溫柔的話好   但當然   最後都係我啦   因為我等咗一排都唔見里奧大人有咩舉動 ~

沖完涼之後都仲係覺得好飽咁   所以就熨衫嚟燃燒脂肪   同埋睇下新聞   同里奧大人一睇就睇到啲人做伸條脷嘅動作   一齊話係 Yoga 最高境界呀   因為好多年前睇過一本關於做 Yoga 嘅書   一睇就睇到呢個最高境界動作   嚇死人咩   最搞笑被訪者話做呢啲伸脷動作會減退縐紋   唔係嘛   吖大個口唔係應該啲紋仲勁咩   唔係點解啲女人唔敢大笑呀   .之後再叫里奧大人吖大個口比我睇下有無紋   係會有勁多紋㗎 (註: 因為里奧大人本身年紀老邁好多紋   再加上做埋呢個動作)   其實唔知有無人信做呢個動作會減退縐紋呢 ~

呢兩晚都成 11 點 45 分先瞓呀   因為掛住玩 NDS 太鼓玩到唔想停呀 ~

~~~~

今朝又係食番芝士火腿菠蘿包 + 涷央 $15 (原來涷熱飲同價)   不過今次啲芝士唔係咁溶   不過都好好食   原來菠蘿包走皮係無咁滯   不過加埋芝士火腿都好飽   唔知自己講咩呢 ~

番到公司老規矩啦   無嘢做   朝早太飽喇   所以晏晝食車仔麵   食咗菜肉餃 + 通菜 + 米粉 ($13) ~

今晚係我第一晚讀初級輔導班   希望夠精神啦   哈哈   聽日我 Off   但里奧大人約咗媚媚做功課呀   人哋難得 Off 家嘛 ~

對唔住呀里奧大人   呢幾晚都出街食   無煮到愛心晚餐   下星期啦   下星期整啲我覺得好嘅嘢比你嘆下啦 ~

很想念的元綠壽司 ( SEP-2007 )

尋晚放工真係好攰同作嘔作悶   我覺得係早餐未落格就要食午餐   同埋室內有過多悶氣嘅既關係   所以好唔舒服呀   公司又涷喎   行到街都覺得好涷呀   我又驚坐車會好涷   所以去咗超市兜一個圈   出番嚟真係有啲熱喎   但一上車又變番好涷呢   之得唔好懶   拎條披肩放喺袋度啦 ~

同里奧大人講   我真係唔係咁舒服唔想煮飯...里奧大人就話咁食壽司啦   因為我鍾意食   但中醫叫我唔好食咁多生嘢   所以我比自己一個月食兩次 ~

落車行左一陣 Jusco   買左兩本 $6.9 既 PM 單行薄   之後再買多本 Little Twin Stars 單行薄   仲抵 $5.9 咋   總之比我買到野我就好開心   咩唔舒服咩悶氣就會無哂㗎喇 ~

又係去元綠食   因為我覺得款式多個元氣   有拉麵呀 Pizza 小食之類   唔洗淨食壽司咁悶   其實不嬲食開元綠   食到做左會員   之後覺得元氣好食啲   又博老命去食到可以申請會員卡   點知做咗佢既會員之後到頭來食番元綠   搞野 ~

我哋食咗三文魚 / 素翅 /  炸天婦羅蟹柳既尋司 + 太卷 + 蠔情卷 + 三文魚手卷 + 冷辣辣麵 + 中華沙律 + 麵豉湯   嗰刻我都夠飽   但 9 點幾就有啲餓   整咗個杯麵食   其實係口痕居多   所以就叫里奧大人食一半先   佢哂啲料呀   成個杯麵得 3 塊比較大嘅魷魚片   佢一夾就夾左兩片呀   仲話好飽好飽咁   之後我就真係飽喇   齋食麵   脹死添呀 ~

之後叫里奧大人食生果   我發覺左好耐   就係里奧大人好興食剩兩三嚿就話好飽喇   妳食啦   我初初都會食    但之後就唔會食喇   因為要洗埋個盒   呢個肯定係里奧大人既詭計   咪當我傻呀 ~

~~~~

今朝早食咗個芝士火腿菠蘿包 + 熱咖啡 ($15)   我覺得自己好似啲男人咁   因為男人好鍾意朝早食菠蘿包   估唔到個包熱㗎   啲芝士仲係溶左果隻添   可惜個皮腍咗啦...索性唔食塊皮 lu   橫掂塊皮好鬼肥   我拻塊皮嗰陣時   突然間好掛住好掛住里奧大人呀   因為里奧大人係永遠唔食皮㗎   話熱氣喎   突然覺得自己好孤零零添 ~

今朝 CC 請左早上假   茄子又上咗廠   里奧大人又彩我都傻   公司又無野做   咁嘅時候我咪寫下 Blog 囉   好在自己識搵節目 ~

今朝我真係好開心好驚喜   因為里奧大人送花比得呀   咁啱個 Receptionist 行開咗   有個同事叫我收嘢   一望原來係扎好靚既花呀   再睇埋張卡啲字跡   係我嘅里奧大人送比我㗎   非常非常非常開心同好感動呀   再睇埋張卡啲內容   令我眼濕濕添呀 ~

今日我心情大好呀   多謝您呀里奧大人   我愛您 ~

蒜泥白切肉 + 蒸水蛋 + 節瓜鹹蛋瘦肉湯 ( SEP-2007 )

尋晚放工唔知點解好攰好攰   無無聊聊打比里奧大人講我放工喇   咁里奧大人就叫我煮啲清啲嘅嘢   因為有痱滋喎   我本來想話唔煮家嘛   講到咁   唔煮都唔得啦   又要唔熱氣既餸...咁即係得蒸啦 ~

我淨係諗左瑤柱絲蒸水蛋一樣咋   諗咗好耐   終於比我諗到節瓜鹹蛋瘦肉湯 + 蒜泥白切肉   因為我哋唔係食好多肉   所以$10 豬肉已經好足夠 lu   仲可以一豬兩味做埋蒜泥白切肉   醒呀   有湯有瓜有肉又有蛋   夠哂營養豐富啦 (我覺得) ~

拖着疲倦既身驅去買餸   買完餸就慢慢行番屋企   但時間唔等人   .因為里奧大人告知已經上車回家途中   所以番到屋企唔理咁多即刻洗手開工   第一係用鍋隔水蒸瑤柱   因無時間浸軟   第二係蒸嚿豬肉   因為要煮成半個鐘   第三係切節瓜鹹蛋剪豬肉粒嚟滾湯   呢個湯真係滾到好悶   不過勝在方便   所以我用切薯條紋既刀嚟切粒   無咁悶呀   第四係切蒜頭   第五係拻瑤柱絲   之後要出去迴避下   因為雙爐出火好慶呢 ~

等里奧大人番到嚟就蒸水蛋 lu   用史雲生清雞湯既 Recipe 嚟整   一盒細嘅清雞湯 + 4 隻蛋 + 個人喜好既瑤柱份量   加啲蔥花同豉油   再加少少熟油   搞掂   之後將嚿豬肉切薄片再平放喺碟度  用醬油膏加麻油加蒜泥溝埋一齊淋喺面   呢個菜式係睇亞蘇喺雜誌教人整嘅   終於得物有所用喇   個湯呢   無咩特別囉   整咗咁多年   至在有啖湯飲下咁啦   個蒸水蛋超好味呀   好滑好滑呀   多謝你呀史雲生 ~

尋晚異常感動   因為里奧大人真係好暴力咁搶咗我對手套嚟洗碗呀   但男人始終係男人   都係無手尾同唔夠細心   呢個電飯煲洗完又唔 "Cup"好去   啲碗碟又分開哂擺   有個大既盆放碗碟筷子家嘛   仲要比我睇到個煲蓋無洗到呀   仲駁咀話洗咗添   又唔將廚房個垃圾袋拎出嚟掉   抹手布又唔洗番乾淨   里奧大人真係單一方向諗嘢   就係 "只係洗碗"   之後又係要我執番好廚房啲嘢   不過唔駛洗碗真係舒服好多㗎   唔駛咁熱嘛   不過我都唔係他他條條坐喺度㗎   我喺度燙衫㗎   所以   一樣係咁辛苦 ~

尋晚 11 點就瞓喇   因為真係好攰 ~

~~~~

今朝早諗住食麥記嘅豬柳漢堡 + 熱咖啡 ($12)   但原來已經無咗喇   Cashier 話不如叫個餐仲抵   所以咪叫煙肉蛋漢堡餐配熱咖啡 $17.5 呀   心痛死我咯   因為我唔係咁好食薯餅   又熱氣又肥   嘥哂 ~

番到公司居然有野做   所以無時間睇 Blog 睇報紙   但 MSN 就絕對無問題   話咁快到 Lunch Time 喇   但未餓噃   抖咗 20 分鐘先有 Mood 想食   但今次真係好嘥   掉咗 1/3 呀   因為可能喺唔肚餓既情況下食飯   所以好想嘔   唔想再食落去呀   搞到呢家仲係悶悶滯滯咁   下次都係唔去食麥記喇 ~