黑椒雞扒炒意粉 + 西蘭花 + 隔夜湯 + 跑步 ( MAR-2008 )

食到咁飽    係時候要做下家務   就係拖地喇 ~

不過拖完有啲後悔   因為天氣潮濕好難乾呀   所以開行風扇吹乾去   大家都咁大年紀   跣親就無謂啦 ~

里奧大人埋頭苦幹溫書   我就埋頭苦幹睇報紙   如果唔係晏啲要 Ready 煮菜會無心機睇㗎   六蚊份喎   唔好嘥嘛 ~

做下抖下又到食 Tea 時間   同里奧大人去餐廳食咗炸龍脷柳薯條配咖啡 + 雞寶雜果沙律配咖啡 ($53)  之後再去超市買米同沙糖就番屋企喇 ~

星期日已經預咗無線同 ATV 無嘢睇   但估唔到連 Cable 都無   所以索性執 File   因為好多係 N 年前嘅文件   就咁一執   個 File 已經薄咗一半   早知早啲執啦   唔駛 "牙" 住哂啲位 ~

抖多陣   又到煮晚餐時間喇 ~

是日晚餐 : 黑椒雞扒炒意粉 + 西蘭花 + 隔夜湯

黑椒雞扒炒意粉 - 雞扒 1 塊 + 洋蔥 1 個 + 意粉 1/3 包   諗住雞扒一塊過靚啲   點知好似煎成世都唔熟咁   已經多油   雞皮又要埋   涷鑊落油細火煎都會黐底   真係扯火呀   之得雞絲好過啦   洋蔥爆香之後加埋雞扒 意粉 黑椒汁一齊炒   好惹味呀 ~

西蘭花 - 無時間呀   就咁烚就算喇 ~

隔夜湯 - 超級清甜 ~

里奧大人唔抵得我個五花腩細咗   所以好好人咁話陪我跑步喎 ~

~~~~

呢排天氣真係古怪   一日熱一日涼咁   真係好鬼易病 ~

今朝食芝蛋治 + 咖啡 ($15)   番到公司又要扮嘢   聽日 Y Blog 暫停服務   真係唔知點捱喇 ~

晏晝帶飯   同尋晚一樣咁好味呀 ~

韭菜豬肉水餃 + 鯪魚餃 + 合掌爪紅蘿蔔粟米豬展湯 + 芒果糯米糍 + 黑心型曲奇 ( MAR-2008 )

尋日番到屋企   里奧大人即刻休息   而我真係瞓唔到   所以就去街市買餸   履行做妻子嘅責任   買咗林肉 ($12) + 豬𦟌 ($20) 粟米 / 紅蘿蔔  / 合掌瓜 ($19) + 韭菜 ($4) + 鯪魚肉 ($5) + 水餃皮 ($5) 木瓜 ($12/3 個)   重到吖 ~

見里奧大人成口痱滋   所以就煲菊花茶比佢清熱氣 ~

熱到爆...唔沖涼唔得呀   之後比自己他他條條睇報紙喇 ~

2 點半就同里奧大人去茶餐廳食 Tea 喇   我食紫菜四寶湯金邊粉配雪碧   里奧大人就食鹹魚雞粒炒飯配檸茶再加件油醬多 ($52)   之前食多士係特價 $4   依家無特價要 $7 呀   真係咩都費哂 ~

食完咪又係番屋企囉   里奧大人 4 月中考試   平時又忙   只可以星期六同日專注溫書   本來想約媽咪或者同朋友出街嘅   但自己去街   里奧大人無飯食   我又唔忍心喎 ~

唔知點解好有 Mood 整嘢食   所以整咗芒果糯米糍   賣相唔掂   但我覺得就超級好食囉 ~

整開有條路   順便整埋上次焗曲奇剩咗嘅麵團   再唔整驚壞喇   今次無聊 "給" 心形圖案   "給" 出嚟又薄又靚   諗住好睇又好食   點知焗耐咗   變咗黑心曲奇   個底係黑色添呀   嘥哂心機 ~

里奧大人好有誠意咁話陪我跑步   但想早啲食晚飯囉   簡直係無形壓力呀 ~

是日懶餐 : 韭菜豬肉水餃 + 鯪魚餃 + 合掌瓜紅蘿蔔粟米豬展湯

韭菜豬肉水餃 - 超市啲免治豬肉好肥   所以迫於無奈買林肉番屋企自己刴   最驚用菜刀   又無可能唔用   韭菜切粒 (淨係要尾部)   豬肉用豉油 / 糖 / 麻油 / 胡椒粉 / 生粉撈勻嚟醃   好簡單 ~

鯪魚餃 - 用鯪魚肉做餡   口感好得意   但里奧大人話都係傳統韭菜餃好味啲喎 ~

合掌瓜紅蘿蔔粟米豬展湯 - 啲合掌瓜超難批皮   好多刺呀   吉到好痛   下次咪搞   除非菜檔肯有批咗皮嘅合掌瓜賣都會考慮嘅   因為煲湯實在好清甜喇 ~

抖一個鐘   就同里奧大人一齊跑步 lu ~

睇拜仁睇到 12 點幾   好在贏波   咁都開心啲 ~

~~~~

今朝 11 點先起身   預咗唔番教會會遲啲醒   但估唔到係 11 點咁晏囉   之後拿拿聲叫里奧大人去太興睇下仲有無早餐食   點知都係失望已回   咁即係我要煮早餐啦 ~

算啦   橫掂都想煮丁丁同 Mocha 比里奧大人嘆   而我就食 10 個月前買落嘅小饅頭   就咁食好寡   試下加芝士   原來好漏   我一個人食咗 8 個饅頭   所以最終都無食到啲芝士呀 ~

元氣壽司 + 跑步 ( MAR-2008 )

尋晚里奧大人見完客早過得番屋企   喺咁嘅情況下通常我都唔會煮飯   因為成個人楝喺度會令到我煮飯有好大壓力   我估里奧大人都應該知道嘅 ~

我窩心建議去元氣食壽司   因為之前生日嘅時候   元氣寄咗張 8 折 Coupon   但 3 月 31 日到期喇   咁無理由嘥咗人哋一番心意家嘛 ~

去到居然唔駛排隊   仲更加覺得自己嘅決定係無錯嘅 ~

食咗軟穀蟹手卷 + 辣三文魚手卷 + 燒八爪魚壽司 + 腐皮壽司 + 芥辣八爪魚壽司 + 熟帶子壽司 + 元氣卷   今次好抵   因為手卷做特價 (慶祝元氣 13 週年)   仲加埋 8 折   埋單 $121 咋   未開始食中藥前   實會飲佢嘅三文魚頭湯   但個湯有白蘿蔔   而飲緊中藥唔可以食白蘿蔔   所以唔飲得呀 ~

食飽就同里奧大人去百住買杯麵等雜糧   之後再去 Jusco 逛逛   所以買咗 2 包北海道牛奶 ($24.9/Pack) + Pocky (Blueberry) ($14.9)   啲奶好滑   但 Ppocky 就未試   應該好味嘅   其實最想買士多啤梨   但唔靚又無香味   點買喎 ~

雖然天氣仍然又潮濕   同埋又得我一個跑   但仍敵不過我對跑步嘅決心   照跑   流咗唔少汗真係好呢   因為平時跑步唔多流汗呀 ~

~~~~

今朝北上   7 點鐘要起身喇   真係幾攰   但想早去早回   所以一定要早起 ~

第時里奧大人未必得閒陪我北上喇   所以依家佢要訓練我一個人自己認方向   又迫我講國語   唱國語歌就掂啫   但要逐粒字字正腔圓咁講就有啲困難 ~

唔知點解   人論盡真係無得醫   因為我次次都會 Scan 錯卡   明明要 Scan 回鄉卡   我都會拎咗張身份証出嚟 Scan   仲以為部機壞咗   原來係自己個腦壞咗 ~

去到的士站   第一次見咁多人等的士咋   好在都好多吉的   如果唔係唔知待到幾時喇   去到醫務所好在係 No. 2 呀   喺等睇期間   醫師老婆同我傾偈   話我臉色好咗喎   仲話我 "烹" 咗呀 (唔通我越跑越肥 ?!)   仲要連講 3 次呀   我估係髮型影響   仲有仲有   係人一早起身梗係臉腫腫㗎啦   喺度亂噏廿四   哈哈 ~

今次好感謝神   身體調理得 7788   希望快啲調理完就好喇   因為藥費加煤氣費好貴呀   荷包超級重傷呀   今次又睇咗 $2,295 ( 14 劑 )   人民幣兌換率得 0.88 咋   HK$100 : RMB88   兩個星期前仲係兌 97   之得兌換多啲啦   真係好心痛呀 ~

睇完就打的去羅湖商業城嘅 BBC 食早餐   里奧大人食芝蛋治 ($15)   我食美式早餐 (西抽汁 + 鮮奶粟米片 + 腸仔煙肉炒蛋 + 多士 +  Cappuccino $24)   伴碟嘅青瓜片啲顏色好恐怖同埋好乾   里奧大人又話有扒食   點知依家無咗扒餐   勁無癮   食完番屋企喇 ~

小鍋米線 @ 荃灣 ( MAR-2008 )

尋晚里奧大人約朋友傾功課   難得唔駛煮飯   所以就去搵表妹電髮   搭咗 40 分鐘地鐵   搭到個人吽哂 ~

估唔到一去到可以即刻電髮   好在整下把秀髮啫   原來又有 "鬼剃頭 "   好在係 1 毫子嘅 Size   電咗頭髮就唔覺 ~

次次緊張就會 "鬼剃頭"   我估係呢排煮飯煮得密得滯呀   唔係講笑   番工他條個番屋企好多㗎   因為我一落車就第一時間買餸   到屋企即刻煲藥   之後洗洗切切咁   一入廚房深似海   就算我煮一個極度簡單嘅餸菜我都會好緊張   如果滾湯仲慘   煮完餐飯會變得神經衰弱   因為要同時間徑賽  一個火要煲中藥   一個火就滾湯   滾好湯要拿拿聲煮餸   好緊張   一個鐘頭內要做哂所有嘢 ~

食完之後洗碗   洗半個鐘抖半個鐘   差唔多 9 點就跑步   依家要跑步又想 11 點前瞓   所以一分一秒都要好好運用   咁嘅生活真係好緊張呀   依家最想快啲調理好身體   咁我就唔駛再花長時間煲中藥喇 ~

只係用咗 2 個鐘頭就搞掂   表妹約咗人   而我又要趕住番屋企煲中藥   求其食米線就算   至緊要係快 ~

餐牌無咩好選擇   所以食小鍋米線 (小辣)   因為酸酸哋好開胃   又會越食越辣好過癮   真係次次食親都會流鼻水同辣到頭痕   本來想食多碟菜   但一個人食肯定飽到上心口   所以放棄   埋單 $23   好似同南記差唔多   但南記多啲料同好味啲   不過啲辣椒醬同南記一樣咁正 ~

感謝神   去到車站即刻有車   所以好快番到屋企 lu ~

里奧大人差唔多成 10 點幾先番到屋企   一開門見到我就話 " 好靚呀   好襯妳呀 ~

~~~~

今朝落雨濕濕真係無哂 Mood 喇   希望唔係長命雨啦   如果唔係就兩晚無得跑步 ~

時間關係   又要食奶油多 + 奶茶 ($11)   開始有啲悶喇 ~

番到公司又無嘢做   又要被迫上網扮做嘢   多麼的可憐呀 ~

晏晝比媽咪放飛機   好想食螺肉   所以去文記車仔麵...食螺肉 + 豬腸 + 辣魚蛋 + 生菜 + 米粉 ($23)   點解唔飽嘅 ~

食完仲有半個鐘   所以去超市買咗盒 Bread Flour   我諗住遲啲整麵包比里奧大人帶番公司做早餐   好一個勁細心嘅靚靚老婆呀 ~

魚香茄子煲 + 磨菇粟米蛋花湯 + 跑步 ( MAR-2008 )

天氣潮潮濕濕又突然涷番   搞到個人超唔舒服   所以好唔想煮飯   想休息下   想打邊爐去下濕   但之前醃咗啲免治豬肉   迫住要煮   想整台灣肉躁   但無浸冬菇   所以最後都係整魚香茄子就算喇   去到街市就咁買兩條茄子 ($7) 就走人喇 ~

是日晚餐 - 魚香茄子煲 + 磨菇粟米蛋花湯

魚香茄子煲 -  2 條茄子 + 老李 "魚香茄子醬" + 免治豬肉 + 蒜蓉   今次醒喇   烚熟啲茄子先再炒   如果唔係會食到個口好痕...所以里奧大人話今次係整得最好食喎   咁我好謙話多得老李出嘅醬汁啫   但之後再食咗兩啖就嫌唔似出街食嗰啲喎   出面食嘅茄子係要炸咗先   同埋又會有鹹魚碎   再加啲味精   梗係好食啦   自家煮係無咁好味   但無咁多油嘛   多多要求咁 ~

磨菇粟米蛋花湯 - 罐頭磨菇 + 罐頭粟米湯 + 1 隻雞蛋超簡易   口感一流   食嘅時候加啲黑椒粉仲正~

今次煮飯又係有肉有瓜一碟搞掂   真係勁開心呀 ~

里奧大人做唔切功課呀   所以只得我一個人跑   一個人跑步都幾正喎   唔駛左等右等 ~

呢排天氣潮濕   個人好易攰   所以 11 點就瞓喇 ~

~~~~

今朝天氣唔錯   有太陽又有風   唔覺好潮濕咁 ~

唔係咁餓   所以食奶油多 + 奶茶 ($13) ~

番到公司等發霉   晏晝係帶飯   叮完成個 Pantry 都充滿魚香茄子味 ~

蒜泥白肉 + 脆肉瓜粉絲魚蛋煲 + 跑步 ( MAR-2008 )

尋日老細唔喺公司   又放咗幾日假無 Update 個 Blog   所以番到公司搞掂哂啲麻煩嘢就開始埋頭苦幹寫 Blog   寫到頭都痛埋   個 Yahoo Blog 又 Shot Shot 哋   一篇網誌要打幾次   最慘係打好咗一 Send 出去就無咗   再打再 Send 又係咁   要 Save 草犒度先可以 Send Out   搞到人都顛埋   好在放工前 Update 哂   難得老細唔喺度   所以放工即刻走人 lu ~

里奧大人去剪髮   所以可以他他條條去超市買梅頭 ($20) 同免治豬肉 ($11)   之後再去街市買 2 條脆肉瓜 ($5) + 13 粒魚蛋 ($2) + 4 個芒果 ($12)   買魚蛋嘅時候以為自己聽錯咗   所以再問幾錢   佢都答 $2 呀   咁平嘅 ?!   仲以為要成 10 蚊添   因為 Blog 友亞 See 買 10 粒魚蛋要 7 蚊   無理由我買咁平家嘛 ?!   不過可能應該我估亞 See 買嘅係頂級超彈牙魚蛋   所以先咁貴 ~

番到屋企仲有大把時間整嘢   好就係好   但相對我又要夜食飯夜跑步呀 ~

是日晚餐 : 蒜泥白肉 + 脆肉瓜粉絲魚蛋煲 + 跑步

蒜泥白肉 - 我用半肥瘦梅頭   其實應該係用五花腩   但我都唔食肥豬肉   同埋買親都要大大嚿咁   所以改用半肥瘦梅頭   用中火烚到熟為止   但次次都烚到好 "鞋"   因為好驚唔熟會食到發豬瘟呀   蒜頭切粒   用醬油膏同辣麻油加少少水撈勻   又甜又香   好好味呀 ~

脆肉瓜粉絲魚蛋煲 - 用雞湯 (雞粉加水) 滾哂所有材料   滾得太耐   樣樣都滾到腍哂   口感極之唔掂   但味道唔錯囉 ~

一個濃味一個淡味   有瓜有肉   我覺得呢餐餸真係配搭得好好呀 ~

成 10 點先跑步   本來想跑耐啲   但落毛毛雨就提早打道回府 ~

呢排迷上咗睇 Miami Ink   因為啲 Tattoo 真係好靚   好似幅晝咁靚   晝咩似咩   好勁呀 ~

~~~~

今朝居然落雨   仲有少少涷添   令到個人無咩 Mood 咁 ~

無 Mood  所以去 KFC 食鬆餅 + 奶茶 ($11)   然後施施然行番公司 ~

晏晝都係帶飯   但叮咗嘅豬肉就超級 "鞋" 囉 ~

實在太開心喇   因為 Plan 咗下個月中同里奧大人 4 日 3 夜自由行去台灣   所以依家日日都好期待   呢個 Trip 我已經預咗自己會 "脹爆回港"   因為實在好想食當地馳名嘅小籠包 麻辣火鍋 粉圓 麵線 台灣腸 (唔係鄭元暢) 等等等等   我覺得去台灣除咗食嘢買嘢外   應該無咩嘢可以做   不過...我都會陪番里奧大人買書嘅   因為平香港 1/3 喎   又係繁體字添   我就會專攻食譜   因為香港實在太貴唔捨得買喇   我想買好多番嚟   咁打開個書櫃全部都係食譜好似好 Pro   好似對飲食文化好有研究咁   真係諗起都開心呀 ~

金銀蛋菠菜 + 臘腸冬菇鯪魚鬆 + 跑步 ( MAR-2008 )

尋日天氣非常非常非常之好呀   個人心情都勁靚呀   又撩起我抹嘢條根喇   所以食完早餐番到屋企就即刻開稀漂白水抹窗抹櫃抹門   好在之前拖咗地   做少一樣嘢   抹咗兩個幾鐘   真係幾攰   不過見到間屋咁乾淨真係辛苦都值得嘅 ~

又到 Tea Time 但未餓   同里奧大人求其食腸粉 + 燒賣 + 粉果 ($15) 算喇 ~

但食開又想食喎   所以再買冷冷撈麵   .$10/4 包好貴呀   好多都係 $10/6 包咋   但想食就無辦法啦   我哋企喺度食   10 分鐘唔夠已經有 8 個人去買   好似好好賺咁   如果我都做到就好喇   又可以賺錢   又可以食埋一份   幾好呀 ~

之後去萬寧買嘢   我想買 Mascara   咁我好留心睇我想買嘅牌子嘅 Mascara   但有個職員喺度彈我想買嘅牌子   我笑下就算   但心諗做咩萬寧職員會係咁彈嘅 ?!   再望   原來係 ultima II 嘅 Sales   唔怪之得係咁彈啦   不過我都有幫佢買 Mascara   因為我都想轉牌子   盛惠 $171   佢仲想要我買兩樣產品   因為買兩樣會送旅行套裝喎   但我直接同佢講我已經買哂護膚品   所以唔需要   佢就無再講喇 ~

番到屋企幾大都抖下   睇埋報紙咁就 Ready 煮飯喇   呢幾晚煮飯都好有心機   可能唔駛一下子買餸煮飯煲藥   可以分開慢慢嚟做   所以個人都無咁緊張   煮嘢都煮得好味啲呀 ~

是日晚餐 - 金銀蛋菠菜 + 臘腸冬菇鯪魚鬆

金銀蛋菠菜 - 跟通少整嘅   我覺得味道同出面食嘅一樣   第一次整到有咁嘅水準真係好開心   我貧血   菠菜最啱我   又有皮蛋   所以仲更加啱我 ~

臘腸冬菇鯪魚鬆 - 臘腸切粒   冬菇浸軟切粒同魚肉一齊醃   本來想成塊煎   但煎嘅時候唔記得落生粉   所以甩皮甩骨   同埋個樣白雪雪咁好核突   所以把心一橫求其炒   估唔到仲好味個鯪魚餅喎 ~

搞掂所有嘢又跑步喇   呢 4 日假期過得好快   好似無放過假咁嘅   我覺得無出街玩嘅假期真係唔似一個假期呀 ~

~~~~

好在都無話唔願起身番工啫   如果唔係都幾難捱 ~

今朝食芝蛋治烘底 + 咖啡 ($15)   又變番一個人食早餐   真係要調節番自己個心情先得 ~

番到公司有啲麻煩嘢   所以搞掂先可以安心 MSN 同寫 Blog   一次過寫咁多有啲頭痛添 ~

晏晝叮飯   悶上加悶呀 ~

蝦醬豆腐枝竹火腩煲 + 隔夜湯 + 跑步 ( MAR-2008 )

講過星期日早餐要食麥皮降膽固醇...所以就算幾難食幾無味都要食 ~

我仲慘   空肚中藥已經飲到反胃   再加埋口感不佳嘅即沖麥皮   真係好難頂 ~

沖涼洗頭之後就慢慢食早餐   雖然難食   但個感覺就舒服囉 ~

食完又打的番教會   依家番完祟拜都好少會再去熟食中心食嘢   雖然好食   但啲感覺就真係唔多舒服   其一要等位   其二要比匆匆落單匆匆食匆匆埋單   因為實在太多人企喺妳後面等   所以想坐多陣都唔得   講真   仲趕個番工   難得星期日...唔好喇啩 ~

咁唯有同里奧大人喺教會周圍睇下有咩嘢食   間間都好多人等位   比我見到一間食點心嘅茶餐廳居然無咩人   唔通唔好食 ?!   心大心細之際   里奧大人就話試下喎   食咗山竹牛肉 + 雞扎 + 潮州粉果 + 糯米雞   樣樣嘅賣相都唔錯   點知除咗山竹牛肉外   所有嘢都唔掂  特別係粉果   啲皮仲厚過我啲腳皮   點食呀 ?!   埋單 $50   價錢都 OK 嘅   但下次唔會再去囉 ~

之後去街市買燒肉 ($20) + 兩件布包豆腐 ($4) + 炸腐竹 ($6)  就番屋企喇 ~

唔知點解   次次假期無飲咖啡就會好眼瞓   但番工又唔會㗎噃   可能番工有得 MSN 同上網   因為里奧大人要用電腦做功課   所以我只可以 "灘" 喺梳化睇電視同睇雜誌   咁嘅環境之下就會好易瞓着   咁就瞓咗半個鐘喇 ~

一起身睇陣電視就開始煮飯喇   想早啲食飯早啲跑步   因為 10 點要睇 Keanu Reeve 主演嘅 Constantine (魔間行者) ~

是日晚餐 - 蝦醬豆腐枝竹火腩煲 + 隔夜湯

蝦醬豆腐枝竹火腩煲 - 好想食枝竹   所以加埋落去   韭菜就係尋晚淨水餃整嘅   唔想嘥   所以為咗佢而整火腩煲   以為好易整   點知滾滾下有陣燶味   原來底部啲枝竹燶咗   嚇到我即刻熄火   好彩都好好味   不過豆腐就食淨 1 件唔留得   所以嘥咗   里奧大人提議話下次改用玉子豆腐代替布包豆腐喎   今次係第一次整   算係咁啦 ~

隔夜湯 - 有大量粟米湯渣   可以唔駛再整多碟菜 ~

食完抖陣就去跑步   沖埋涼就可以睇 Constantine   一路睇一路食芥辣味蝦條同紫菜   又食下自己整嘅好好味曲奇餅   真係嘆到爆呀 ~

~~~~

又可以 10 點幾起身   .又可以好 Relax 咁嘆早餐   里奧大人食炸菜肉絲米拉多士配鴛鴦   我就食沙爹牛肉麵拚多士配咖啡  ($42)   飽到震呀 ~

之後又係到街市買餸   買菠菜 ($6) + 鯪魚肉 ($10) 就番屋企 lu ~

大隻雙色餃 + 青紅蘿蔔粟米海底椰鱷魚肉豬𦟌湯 ( MAR-2008 )

食完早餐就一齊去買餸就番屋企喇   天陰陰又諗起無得跑步好慘呀 ~

由於整餃子   所以醃定啲韭菜豬肉同粟米豬肉   之後又係做家務呀   睇報紙咁囉   里奧大人下個月要考試   所以要全神貫注捉題目   所以我喺屋企死咗佢都未必會即時發現   可悲可悲 ~

放假係好   但咁啱呢兩年里奧大人要讀書   所以都無咩點出去行街   我最開心嘅節目莫過於一齊去超市買嘢   去街市買嘢咁   好在我都深閏   都好鍾意留喺屋企   得閒就會將衣櫃嘅衫同書櫃嘅書及所有櫃桶執得整整齊齊   咁做都好花時間   隨時執幾日都得   因為我一執就會執唔停手 ~

假期比較遲起身食早餐   所以多數係 3 點幾先食個 Tea   又平又唔駛咁飽   費事食完又要夜啲食晚飯   好嘥時間呢 ~

無啦啦落好大雨   真係無哂心機   最唔鍾意落雨   因為會令到人好 Down ~

突然好想食越南涷檬   所以去一間有涷濛嘅舖頭食春卷涷濛 + 熱華田   里奧大人食星洲炒米 + 熱好立克 ($58)   真係好好味  啲春卷熱辣辣脆卜卜   我又好鍾意食嗰啲醋   所以呢餐好滿足呢 ~

落雨濕濕都無 Mood 周圍行   所以番屋企算喇   不過番到屋企無得抖   因為要預備煲湯 lu ~

是日晚餐 : 大隻雙色餃 +  青紅蘿蔔粟米海底椰鱷魚肉豬𦟌湯

大隻雙色餃 - 韭菜豬肉餃 + 粟米豬肉餃   今次用水餃皮   所以隻隻都好大好飽肚好好味 ~

青紅蘿蔔粟米海底椰鱷魚肉豬𦟌湯 - 因為鱷魚肉都擺喺雪櫃一段日子   所以清埋去   不過我唔係咁鍾意陣味   出咗水都好腥咁   同埋啲感覺好恐怖 ~

落雨無得跑步   所以就整曲奇   實在唔想嘥咗啲牛油   因為依家啲牛油貴到飛起   如果又係擺到過咗期就唔抵啦   不過牛油無過期   但之前買落嘅低粉 Hazel Nut 果仁碎 豆蔻粉通通過咗期 9 年   真係好心痛好心痛 ~

今次用自發粉做曲奇   比想像中好   因為無燶到   不過甜咗啲同好鬼硬   但有幾塊食落又有啲煙煙韌韌嘅感覺喎   所以我覺得好好食   同一時間焗到有唔同嘅口感係好難㗎 ~

好開心好開心   因為馬英九當選做台灣總統   我覺得佢係實至名歸嘅 ~

板長壽司 + 車仔餸 + 跑步 ( MAR-2008 )

尋日同完家姐拜爸爸之後就落官塘食車仔麵   因為實在太掛住佢哋嘅辣汁   同家姐 Share 食魚蛋 + 魷魚 + 豆卜 + 豬腸+ 米粉 ($27)   啲辣汁真係好好味   就咁撈飯都可以食 3 碗呀 ~

食完就同媽咪搭小巴入荃灣拜公公   攪完都差唔多 4 點半   之後媽咪話想食板長食壽司喎   其實我本來話求其喺荃灣食少少嘢就番屋企   但媽咪講到咁想食咁   咪唯有去囉   不過荃灣搭小巴去九龍灣真係好快   車程 20 分鐘就到   真係快過地鐵幾倍呀 ~

又係食壽司   真係有啲驚   但媽咪同家姐就非常之鍾意   食咗芥辣墨魚軍艦 + 三文魚子軍艦 + 醋鯖魚壽司 + 蟹棒壽司 + 三文魚壽司 + 火灸醋鯖魚壽司 + 軟殼蟹手卷 + 帆立貝壽司 + 綠茶冷麵 + 火灸鰻魚壽司 + 蟹肉蟹子沙律   因為一陣番屋企要陪里奧大人食嘢   所以我都敢食咁多   埋單 $208   媽咪係都要請 ~

媽咪見到有間標榜小甜嘅糖水店   又要一齊食   我哋 Share 食榴槤飄香 + 芒果清心丸   個榴槤飄香真係好香榴槤味   好好食   如果一個人食就會好漏囉 ~

之後就搭車番屋企再同里奧大人食過 lu   又係食車仔麵   里奧大人食牛腩 + 魚蛋 + 生菜 + 幼麵   我就係咁易食腸粉 + 辣魚蛋   再 Share 食韭菜 + 通菜 + 豬紅   一萬個飽呀 ~

食完就去拎電飯煲   本來唔想買   但見電飯煲花咗同埋有飯焦   家姐話西施煲唔應該有飯焦   所以咪買囉   費事食壞身體啦 ~

番到屋企抖一個鐘又跑步 lu   依家跑上癮   Very Good ~

~~~

基本上放假係唔會校鬧鐘   除非有特別嘢做   如果唔係瞓到想起身為止...不過我同里奧大人好多時都十點幾就會起身   所以都可以出去食到早餐嘅   又係周圍睇下屋企附近嘅餐廳   搵到有間餐廳環境都唔錯   一入到去個 Feel 好似去酒店食早餐咁   所以好 Relax   同里奧大人 Share 食牛扒煙肉雞蛋拚多士配咖啡 + 煙肉腸配公仔麵拚多士配咖啡 ($42)   唔知係咪放假關係   個人 Relax   所以份早餐都覺得份外好味 ~

之後就同里奧大人一齊買餃子皮   想整餃子   所以買韭菜 ($4) + 水餃皮 ($5) + 梅頭 ($12) + 豬𦟌 ($20) 紅青蘿蔔 + 粟米 ($25) 就番屋企喇 ~

兩年後的味千拉麵 + 跑步 ( MAR-2008 )

尋日突然間好忙   咁啱同 CC MSN 傾開唔想斷   所以就更加忙 ~

上網睇到話韓國農心蝦條內藏疑似老鼠頭的毛塊   真係好嘔心   因為老鼠實在太 Dirty 喇   記得有次同屋企人喺酒家食飯後送嘅紅豆沙糖水   家姐習慣撩一輪睇下有無嘢先食   好撩唔撩   撩到條好長嘅頭髮出嚟   媽咪就話係 "不" 比家姐嗰碗先係咁   但我話點知係咪煲嗰陣時已經有呀   所以幾大都唔食   好核突呀   家姐好黑仔   食魚蛋粉又試過 "不" 辣椒油啲籽   點知 "北" 到隻大強出嚟   嚇到賴尿呀   所以我依家唔係幾敢食辣椒油呀 ~

尋晚本來煮飯   但里奧大人話唔好煮喎   所以咪聽佢話囉   費事佢唔鍾意啦 ~

經過味千拉麵聞到好鬼香   又無人排隊   所以就入去食喇   食味千拉麵 + 蟹子蟹肉沙律 + 炸豆腐 + 辣螺肉 + 兩碟手造餃子   價錢好似無變過   但啲份量就少咗   特別係碟炸豆腐   記得之前係一嚿嚿嘅   依家係一片片   放入口好似無食過咁   餃子細到不得了   我一口可以食 4 隻   仲有我肯定個拉麵係有一劈辣肉嘅   因為次次食親都辣到胃痛   依家豬肉貴   所以無埋   今次埋單 $145   但勁勁勁勁飽 ~

最衰晏晝忍尿   攪到我 "小掩" 好痛   里奧大人話不如唔好跑步   但實在太飽   所以都係抖 1 個鐘就跑步喇 ~

無啦啦又轉涼   好大風   涷到呢   跑極都仲涷   幾驚涷傷風呀 ~

~~~

天氣又涷番   咁都好過潮潮濕濕嘅   今朝又比尋朝早   又去番北京小館食奶油多 + 奶茶 ($13)   一樣咁好味   因為仲未食厭 ~

番到公司做咩少少嘢   就要上網 upgrade 自己 ~

晏晝勁勁勁勁開心   因為家姐放假   所以同埋媽咪約我去 Ruby's Tuesday 食 Lunch   食 Salad + Premium Ribs  + Classic Cheeseburger   食唔哂   家姐話做咗會員   所以佢請 ~

太好喇   復活節連續放 4 日假   好好好好開心呀 ~

小事兩則 -

靜 電 之 苦 　 親 嘴 都 過 電

秋 冬 季 節 Net 人 經 常 與 人 「 爆 出 火 花 」 ， 原 來 很 多 網 友 都 受 靜 電 之 苦 。 網 友 「 益 力 多 多 」 說 ： 「 最 近 我 全 身 都 充 滿 靜 電 ， 搞 到 成 日 公 司 度 電 親 ， 已 經 搽 lotion 搽 得 好 密 都 無 用 。 」 Annie 更 弄 得 尷 尬 萬 分 ： 「 同 男 朋 友 親 嘴 都 會 電 親 」 ； Esther 與 母 親 同 為 「 靜 電 人 」 ，燥 時 節 要 分 開 行 。
網 友 「 貴 人 」 說 ： 「 記 得 有 次 電 完 有 啪 一 聲 同 火 光 後 ，同 學 仔 瞪 大 晒 隻 眼 唔 識 反 應 ， 我 就 好 搞 咁 話 ，  俾 你 睇 到 ， 我 就 話 你 知 我 的 秘 密 啦 ， 其 實 我 係 外 星 人 ， 只 係 流 落 地 球 ， 好 快 就 走 。 」
其 實 從 生 活 細 節 手 可 減 少 產 生 靜 電 ： 盡 量 將 室 內 空 氣 相 對 濕 度 維 持 45% 以 上 ； 穿 純 棉 衣 服 ， 少 穿 含 化 學 纖 維 衣 服 ； 勿 穿 膠 底 鞋 ， 以 便 靜 電 由 腳 底 釋 放 ； 梳 頭 髮 時 先 將 梳 子 浸 水 即 可 消 除 靜 電 。

B 親身經驗:

喺呢間公司   我比靜電電到暈   特別係夏天   一開 File 櫃就會電到   影印又電到   唔小心點到 Partition 都電到死死下   有次重電到頭痛呀   唔係講笑   真係每日幾電㗎   諗起都痛呀 ~

見 工 面 試 八 大 難 題

打 工 仔 搵 工 跳 槽 ， 最 怕 面 試 遇 到 刁 鑽 問 題 唔 識 答 「 O 晒 嘴 」 ， 網 友 「 不 肖 子 」 問 大 家 「 覺 得 見 工 最 難 答

問 題 係 咩 ? 」 網 友 議 論 紛 紛 ， 綜 合 大 家 遇 上 的 問 題 如 下 ， 你 會 點 答 呢 ？ 大 家 不 妨 將 答 案 電 郵 至 news@appledaily.com

， Net 人 整 理 後 擇 日 公 佈 。

「 公 司 點 解 要 請 你 ？ 」

B : 因為公司需要呢個職位 

「 你 有 咩 條 件 係 唔 適 合 我 公 司 ？ 」 

B : 唔清楚

「 你 的 優 點 ＆ 你 的 缺 點 ？ 」 

B : 優點係盡責   缺點係心急

「 你 覺 得 自 己 點 樣 勝 任 呢 份 工 ？ 」

B : 比別人付出更多 

「 你 覺 得 你 會 有 咩 『 前 景 』 ？ 」

B : 未知

「 之 前 份 工 做 咩 辭 職 唔 做 ？ 」 

B : 上司唔好

「 點 解 你 次 次 份 工 都 做 唔 耐 ？ 」

B : 因為上司玩針對   發揮唔到自己

「 如 果 要 OT ， 你 每 日 最 多 可 以 OT 到 幾 點 ？ 」 

B : 都可以嘅

太興 @ 大埔 + 跑步 ( MAR-2008 )

超級超級超級攰   如果煮飯真係會覺得自己好委屈   加上之前睇亞蘇食燒鵝食得好好味   攪到我好想食燒鵝   特別係塊燒鵝皮   再加上好想好想好想食乳豬 燻蹄 燒肉咁   所以就決定同里奧大人去太興食燒味飯喇 ~

我哋去太興多數會問有無乳豬先會入去食   但尋晚里奧大人去到已經無哂乳豬 lu   平時就梗係唔入去食   但今次係好想好想好想食燒鵝同燻蹄   所以點都會入去食㗎喇 ~

其實一心諗住我食乳豬燻蹄飯   里奧大人就食燒肉燒鵝飯咁就 Perfert   但我一去到里奧大人就話想試南乳脆香雞喎   算吧啦算吧啦算吧啦   又無乳豬   所以就食燻蹄燒鵝飯套餐    燻蹄腍得太多豉油   啲醋又唔夠酸   唔係咁鍾意 ~

燒鵝好正   但好似好少咁   因為得兩件係比較多肉   其他都係皮連骨嚟   不過啱我   我正正就係想食皮 ~

南乳脆香雞個名好吸引   又好似好香口咁   真係比佢個名呃咗   無南乳味無雞味   個皮又唔脆   等我仲以為係去飲嗰啲南乳雞添   最不幸最不幸最不幸唔知我係咪食到個雞 Pat Pat   因為個樣好似雞翼咁   所以夾嚟食   第一啖覺得超級羶   以為係多咗南乳   第二啖真係頂唔順   因為真係羶到不得了   即刻吐番出嚟   之後食雞仲要食到步步為營   要撩啲肉出嚟先咁再食   但陣羶味已經蓋滿哂我嘅味雷   好難頂呀 ~

食完番屋企抖一個鐘就出發跑步喇   真係好好好欣賞自己咁有恆心呀 ~

~~~~

今朝里奧大人見客...所以得我一個人搭車   今朝車程順到妳唔信呀   望一望錶   居然有半個鐘頭嘆早餐呀   天氣潮潮濕濕   無咩胃口   喺公司附近行下   睇下有無啲平靚正嘅早餐   太好喇   居然比我搵到北方小館   仲要係有多士餐添   所以就入咗去食奶油多 + 奶茶 ($13)   諗住 $13 求求其其   但塊多士好脆   啲奶油係一路食一路漏   今餐真係平靚正呀 ~

得閒講自己無嘢做都好   因為第日實會有嘢做   一路做一路 MSN 一路睇 Blog一路昅老細   一心四用   真係思考能力高喇 ~

晏晝想食清清哋   所以食白粥 + 炒米粉 ($13)   同樣又係勁飽   之後去 Shiseido 買防曬 + Clean Foam ($595)   女人錢真係好易賺   再直闖馬莎買 Moisturising Body Lotion (China Blue) ($65) 好香呀   真係搽完個人瞓都瞓得開心啲呀 ~

我好鍾意幫朱朱影相   但家組.表妹 媽咪同里奧大人話張張相都一樣嘅   但點解我唔覺係一樣嘅 ~

沙爹豬肉炒芥蘭 + 炒飯 + 隔夜湯 + 跑步 ( MAR-2008 )

呢排天氣潮濕再加上瞓得唔好   所以個人超攰   遲啲得閒煲冬瓜去濕水飲飲先   唔係有排攰呀 ~

呢排下定決心去跑步   所以煮啲簡單嘅餸菜   留番啲力用嚟跑步 ~

之前已經醃好咗豬肉   放工就咁買芥蘭就得 lu   因為一早諗咗學整通少嘅 "沙爹豬肉炒芥蘭"   有肉有菜好鬼盞   最緊要係一鑊搞掂   非常方便 ~

是日晚餐 - 沙爹豬肉炒芥蘭 + 炒飯 + 隔夜湯

沙爹豬肉炒芥蘭 - 步驟跟足通少   但茨汁份量就係 2 湯匙沙爹醬 + 1 湯匙蠔油 + 大半豌水   上次里奧大人話好辣   就係咁加多咗水   所以無咩沙爹味   但都好好食   因為有菜有肉有汁有剩 ~

炒飯 - 時間關係   淨係用薑粒 + 蔥粒 + 雞蛋 + 老抽炒炒就算喇 ~

隔夜湯 - 兩個人煲湯   實會有隔夜湯   啲人話隔夜湯無益   我唔理㗎   唔通下下用 3 個鐘煲 2 豌湯咩   其一無時間   其二係無咁多錢交煤氣費   因為我日日煲中藥條數好襟計呀 ~

里奧大人成 8 點幾先番到屋企   食埋飯抖一個鐘成 10 點幾先出發去跑步   雖然攰   但都堅持要跑 ~

番到屋企沖個熱水涼   人家話做完運動沖個熱水涼係超正   點解我唔覺嘅   我淨係覺得超熱囉 ~

~~~~

尋晚沖個熱水涼先瞓   覺得好熱   瞓得唔係咁好 ~

過多兩日就有 4 日嘅復活節假期   唔知係咪好多人已經去咗旅行呢 ?!   因為車程好順   仲有成 25 分鐘比我嘆早餐   所以去平時勁多人排除嘅美心快餐食魚柳蛋拚厚多士配華田 ($21)   慢慢嘆   超好味 ~

又係無嘢做   CC 又唔得閒 MSN   所以又要遊 Blog 過日 ~

幾經辛苦先到 Lunch Time   又係帶飯 ~

上網睇報紙   睇到以下兩篇好攪嘢   因為發生過喺我身上 ~

 上 司 個 口 好 臭 下 屬 作 嘔

整 天 被 屎 坑 般 的 臭 氣 圍 繞

， 會 有 何 感 覺 ？ 網 友 飄 靈 有 最 切 身 感 受 。 「 好 難 頂 ！ 上 司 口 臭 到 屎 坑 咁 ， 又 哄 埋 講 話 ， 按 鼻 又 話 人 嫌 棄 她 ！ 下 屬 都 受 不 了 ！ 唉 ！ 」
Net 人 在 為 他 難 堪 ， 網 友 爭 相 獻 計 ： 「 婉 轉 問 佢 係 咪 有 胃 氣 ? 使 唔 使 介 紹 胃 藥 畀 佢 ！ 」 有 人 建 議 買 漱 口 水 ， 「 呃 佢 試 話 新 產 品 有 朱 古 力 味 ， 等 佢 漱 完 唔 臭 。 」 yansan 最 抵 死 ， 「 有 邊 個 上 司 個 口 唔 臭 ？ ！ 」 lemonngan ： 「 直 接 同 佢 講 ： 你 個 口 味 好 特 別 ！ 」 似 整 蠱 他 多 一 點 。 多 人 認 為 帶 口 罩 最 有 效 。
le38vinson 最 聰 明 ， 「 請 佢 食 香 口 珠 ， 見 到 都 明 ！ 」 網 友 認 同 ， 「 拎 香 口 膠 出 來 扮 自 己 食 ， 順 便 請 埋 佢 ， 畀 個 下 台 階 佢 ！」 

飄 靈 集 思 廣 益 ， 即 買 一 盒 口 罩 及 口 香 糖 ， 還 分 給 兩 下 屬 ， 「 真 的 太 難 頂 了 ！」

我嘅真人真事 :

不過唔係上司   係同事 ~

N 年前有個女同事個口臭到不得了   我同兩個同事都頂唔順   佢一講嘢我哋就閉氣   幾辛苦呀   不過同人講妳個口好臭又真係令人好尷尬嘅 ~

到依家又係有個女同事個口臭到不得了   同我講完嘢我都仲係覺得啲臭氣圍住我咁   行到邊坐到邊都係圍住唔走   好難頂   佢講電話   我企喺佢隔離同事個位都聞到   妳話臭得幾犀利   不過最難得係佢有兩個同事同佢好好傾   成日密密斟咁   唔通嗰兩個同事有嚴重鼻敏感   咩臭味都聞唔到 ?!

膠 袋 載 飯 返 工 嚇 壞 同 事

不 少 打 工 一 族 都 會 帶 飯 返 工 ， 網 友 愛 寵 稱 ， 有 專 業 人 士 同 事 以 超 市 膠 袋 盛 飯 帶 返 公 司 ， 午 飯 時 倒 落 碗 內 翻 熱 食 ， 雖 環 保 但 覺 欠 衞 生 ， 他 有 種 「 好 似 倒 緊 垃 圾 咁 」 之 感 ， 網 友 更 謂 「 覺 得 好 似 嘔 吐 袋 裝 食 物 」 。
不 少 網 友 指 難 以 置 信 ， 但 網 友 nyctaz 稱 ， 於 北 京 遊 玩 時 ， 見 當 地 人 也 是 將 飯
倒 入 紅 色 手 抽 膠 袋 內 ， 令 他 即 時 胃 口 大 減 。
此 外 ， 此 「 專 業 人 士 」 返 公 司 後 未 有 將 其 「 膠 袋 飯 」 放 入 雪 櫃 ， 仍 令 樓 主 難 以 接 受 ， 大 呼 「 頂 唔 順 」 ， mystery1223man ： 「 真 係 好 唔 掂 ， 好 唔 合 衞 生 ， 咁 搞 法夏 天 好 易 有 霍 亂 。 」
不 少 網 友 建 議 樓 主 送 一 個 飯 盒 予 這 位 同 事 ， Net 人 對 此 也 大 表 贊 成 ， 不 知 道 樓 主 最 終 又 有 否 送 出 呢 ！

我嘅真人真事 :

話說之前有次同里奧大人去某茶餐廳食早餐   我離遠見到有個阿伯食一碗麵同飲 1 支大啤酒   咁早就成支隊   仲要係阿伯嚟喎   咁唔健康嘅   所以我就留意下佢   見佢將啲麵拉到好長   原來係放入超市膠袋   搞到我好想反胃   喺度諗究竟係比狗食定自己食 ?!   如果自己食不如叫人比個膠盒裝好過啦   講真   一蚊佢都唔自在啦   成支大啤酒都比得起   再去第 2 次嘅時候   又見到佢   又係將啲麵放入膠袋   到第 3 次   我即刻同里奧大人講記住呢個阿伯   唔好坐喺佢隔離   因為佢好核突   之前兩次都費事同里奧大人講   因為佢都唔會記得   但第 3 次真係忍唔住   驚里奧大人心急見有位就坐   如果啱啱阿伯夾麵入膠袋   我真係會即刻反胃無胃口呀   因為我驚個袋入面仲有其他嘢呀 ~

煎三文魚扒 + 雞翼 + 花膠鯊魚骨紅蘿蔔粟米豬展湯 + 跑步 ( MAR-2008 )

好難得可以喺梳化度瞓咗 20 分鐘   本來想繼續瞓   但 4 點要預備煲湯喇   因為唔夠瞓   所以有啲掹   咁啱 CSL 打嚟   係咁 Chur 住要我用 CSL   對話如下:

CSL: 妳好   我係 CLS   依家做緊 $xx / xxx 分鐘
B: 唔駛喇   唔該
CSL: 係咪簽咗其他電訊公司合約呀 ?!
B: 係呀   所以唔駛喇   唔該
CSL: 咁呀   依家好抵喎   $xx / xxxx 分鐘咁咁咁咁
B: 我簽咗合約㗎喇   我同我屋企都係用 Smartone   唔通叫我全屋企人都改哂 CSL 咩   唔駛喇唔該
CSL : CSL 依家 $xx / xxxx 分鐘咁咁咁咁 
B (開始有啲慶): 我都話唔駛咯   OK ?!
CSL (係都唔收線) : 唔係喎   依家 CSL 做緊咁咁咁咁
B (火滾): 我都話唔駛咯   OK   之後 Cut 佢線

真係火都嚟   係都唔收線   我都話唔要啦   我仍唔會咁偉大同 Smartone 取消合約用你 CSL 嘛   係都要 Chur 做咩啫   做衰哂 CSL   本來我都好攰   但比條友煩一煩激到我醒哂 ~

是日懶餐 :  煎三文魚扒 + 雞翼 + 花膠鯊魚骨紅蘿蔔粟米豬展湯

煎三文魚扒 - 解涷後用鹽同黑椒粉醃   但煎埋最後呢塊就唔想再食三文魚扒   因為真係腥到爆呀 ~

煎雞翼 - 用韓式醃肉醬醃一晚   方便好味 ~

花膠鯊魚骨紅蘿蔔粟米豬展湯 - 花膠浸一晚   花膠用薑 蔥 酒出水   豬展同鯊魚骨又出水   紅蘿蔔切件   粟米耐心逐粒拻  加一塊果皮煲兩個鐘   正呀 ~

真係唔明   美亞 Promotor 話涷鑊落油細火煎就唔會燶   唔會黐底   但點解我煎又會黐底   激死~

食完洗完就抖 1 個鐘就跑步 lu   今次唔會係 3 分鐘熱度   因為我想身體好 ~

個人都仲係周身唔舒服   里奧大人堅持話我係作感冒   係都要我食木瓜   不過如果係佢整埋比我食又唔拘嘅   今次食 "有機木瓜" 啲口感似未熟嘅水蜜桃   好得意   但無木瓜味㗎噃    古怪 ~

~~~~

呢排天氣唔係咁好   又熱又濕咁   所以個人好攰 ~

無咩胃口   所以食芝腿治烘底 + 熱啡 ($15)   可能瞓得唔好   第一次望住份三文治好耐先想食 ~

番到公司做少少嘢咁啦   之後就做例行私事囉   橫掂部電腦開住   無謂嘥嘛 ~

晏晝帶飯   呢排好慳   我會用湯渣做餸   所以帶埋紅蘿蔔同粟米當蔬菜   不過其實幾難入口   因為好腍   不過好過無菜咁囉 ~

酸辣米線 + 跑步 ( MAR-2008 )

次次北上完都好攰   里奧大人番到屋企就即刻可以瞓到   但我就唔得囉   可能我無瞓晏嘅習慣   辛苦命呢 ~

本來想求其煮麵就當下午茶   但真係好攰   所以又去大家樂食 Tea   快靚正嘛 ~

食特色雞翼 + 薯角配奶茶 + 叉燒瀨粉配可樂 + 朱古力西多士   以為今次特色雞翼係啲咩咩雞翼   咁望清楚餐牌   特色雞翼係蜜汁燒雞翼噃   但一啲都唔脆唔甜嘅   之後隔離枱又係食蜜汁雞翼   但人哋係金黃色燶燶哋好靚嘛   所以我話里奧大人都唔知有無攪錯   咁唔細心嘅   我食過 N 次㗎啦   咁都唔知係咩樣   真係激到頭暈身慶呀 ~

食完就去 Jusco 買鑊喇   咁啱美亞做特價   所以就買咗隻有炳鑊 ($249)   不過好鬼重   但唔想再買易潔鑊   因為我唔想一刮花咗就唔要得   其一影響健康   其二要就住就住好辛苦啫 ~

又唔駛煮飯喇   因為約咗里奧大人姐夫上我屋企整水喉   所以順便同埋佢哋一家一齊食晚飯   去豆漿大王食酸辣米線   我食淨酸辣韭菜餃   平時一啲都唔辣   唔知做咩鬼今次辣到一路食一路流鼻水   下次都係咪攪我食喇   因為食緊中藥要戒口嘛 ~

我終於的起心肝做運動喇   就係去跑步   又徑步又跑步咁   做運動要慢慢嚟   所以跑半個鐘頭就算喇   真係好耐無做運動   跑完對腳好痛   要用按摩機按下對腳先舒服啲咋 ~

本來 11 點想瞓   但見直播德甲   拜仁對 xxxx   拜仁梗係要捧場啦   可能會喺鏡頭到見到 Klinsmann 睇波嘛   最重要係要重燃我睇波嘅火   因為 Klinsmann 7 月會執教拜仁   .要慣性睇波   咁就唔會唔記得啦 ~

~~~

今朝 10 點半起身   但瞓極都唔夠咁   又想又唔想番祟拜咁   但見里奧大人又沖哂涼 Ready 哂   所以都係番啦 ~

今朝好健康   因為食即沖麥皮做早餐   我就加一滴煉奶   里奧大人就一定要加煉奶   話無味食唔落口喎   但我就無咩問題   空肚一杯中藥再食麥皮再飲少少咖啡   唔係飽   係脹   都幾辛苦下   食完就打的番教會 lu ~

祟拜完同里奧大人去街市買餸   買豬𦟌 ($20) + 梅頭 ($10) + 兩條粟米 ($10) + 一條紅蘿蔔 ($4)  + 兩個有機木瓜 ($20)   之後就去食鍋貼做午餐   食咗 9 隻鍋貼 + 蒸麥鏝頭 + 生煎豬肉包 + 蒸腸粉 + 豆漿   $35 咋   又飽喎   真係邊到搵吖 ~

一心諗住買電飯煲   但無貨   咁唯有番屋企啦 ~

雲吞米粉 + 豆腐紅衫魚湯 ( MAR-2008 )

尋日覆診完之後都 5 點幾   有啲攰   但又唔想出街食咁多味精嘢   又想滾湯比里奧大人飲   所以最後決定都係煮啲簡易嘅嘢   就係雲吞米粉同豆腐紅衫魚湯喇 ~

去街市買豆腐   離遠見到個豆腐佬抹完鼻涕   之後有個女人買豆腐   佢就用塊布抹抹手就包嘢比個女人   嚇到我即刻去第間舖頭買呀   麻煩 ~

買完豆腐買雲吞 ($12/半打)   再去買兩條紅衫魚 ($14)   番到屋企沖魚時   見到條魚仲有啲類似內臟嘅嘢   唔知咩嚟   成條咁好核突   因為之前嗰啲都無嘅   好驚好想嘔   但無理由掉家嘛   所以最後都拻出嚟   不過啲感覺真係好核突囉 ~

時日懶餐 : 雲吞米粉 + 豆腐紅衫魚湯

雲吞米粉 - 係人都識煮   唔駛多講 ~

豆腐紅衫魚湯 - 係人都識煲   又唔駛多講   不過要講嘅就係今次煲得好好飲   因為我上次煲得好腥   今次奶白色之餘重好有豆腐味   一啲都唔腥   飲完都覺得里奧大人白滑靚仔咗呀 ~

呢排真係好易攰   唔通真係貧血影響 ~

不過都要早啲瞓喇   因為要北上睇中醫呀 ~

~~~~

今朝 7 點起身喇   沖涼洗頭後就即刻北上喇   今次好好彩係 No. 2   執藥又快   不過今次貴咗   15 劑藥要 $2,270   希望快啲唔駛睇啦   因為真係覺得好鬼貴 ~

早去早走   所以又可以同里奧大人去丹桂軒飲茶喇 ~

唔駛等位仲可以係窗邊位   望下景飲啖茶   好 Relax 呀   無拘無束自由奔放嘅心態下食咗雲耳魚滑 + 香茜皮蛋柴爪魚片粥 + 竹笙上素餃 + 黃沙豬潤腸粉 + 炸雲吞 + 素齋炸芋角 + 鳳爪排骨   可能太太太太太太飽喇   所以覺得有啲厭   埋單 $125 都 OK 吖   最緊要乾淨嘛 ~

元綠壽司 @ 大埔 ( MAR-2008 )

尋日喺公司太得閒   所以遊 Blog   想去通少個 Blog 睇睇炸嘢食譜要買嘅材料   點知睇到 Pizza 真人 Show   攪到我好想食 Pizza   但 Pizza Hut 嘅 Pizza 太大個喇   Order 1 個 Pizza 已經食唔落其他嘢   所以就諗到去元綠壽司食 Pizza 喇   同埋最主要係有 78 折嘛 ~

78 折就唔同食法喇   所以就食啲平時好少食嘅嘢喇   食海謄壽司  + 螺肉壽司 + 大金槍魚腩壽司 + 三文魚手卷 + 蠔情卷 + 帶子裙邊 + 鐵板豆腐 + 刺身冷辣辣麵 + 元綠燒雞 Pizza + 百事可樂   一心諗住先食冷辣辣麵   因為啲醬係酸酸辣辣開胃啲   可惜係尾二先嚟   我覺得食到幾飽再食冷辣辣麵係會好漏   啲醬好漏   再加埋最後嚟個 Pizza   因為里奧大人生痱滋   事先聲明話只會食 1 塊   但我真係好想食 Pizza   所以點都係會 Order 嘅   但真係飽到頂點囉 ~

無嘢做就睇無線嘅最美麗的第 7 天   如果我係周麗淇咁有 Cancer   我實會同里奧大人講   因為我會好驚   我覺得有個自己愛嘅人去支持自己   先會有原動力去撐下去   但係我唔會想里奧大人鍾意第個囉   如果我真係死咗   我都會日日報夢比里奧大人   等佢知道我幾咁掛住佢囉 ~

~~~~

今朝見到個天氣就覺得好奄悶   潮潮濕濕又陰陰暗暗咁   攪到咩 Mood 都無哂   胃口都差啲   所以去 KFC 食烘鬆餅 + 熱奶茶 ($11)   無咁飽嘛 ~

晏晝要覆診   所以約媽咪食晏   媽咪居然話去板長食壽司   又係壽司 ?!   不過媽咪想食   咁咪食囉   仲帶咗壺川貝湯比我潤一潤   媽咪唔係咁食生嘢   所以就 Order 三文魚 / 火灸鰻魚 / 火灸醋鯖魚壽司 + 加洲卷 + 龍之卷 + 蟹肉蟹籽沙律   個火灸鰻魚超好味   啲 鰻魚入口即溶呀   其他壽司都 OK   仲有板長啲薑好好食   我次次都食好多   所以就會突然間好開胃   我仲飲埋壺湯   所以超飽   埋單 $102 又係媽咪請 ~

食完去覆診喇   甲狀腺報告正常   但貧血欠鐵質喎   煩死   真係要做做運動等自己身體好啲先得喇 ~

住家飯 @ 媽咪屋企 ( MAR-2008 )

尋日喺公司悶到爆炸   雖然可以 MSN 同上網   但都覺得好悶好悶 ~

尋日里奧大人喺我公司附近見客   所以我就順便要求接埋我放工喇 ~

里奧大人要番學   所以求其去美心食焗豬扒飯   又要我陪食   陪食唔係問題   但咁啱媽咪又係整茄汁豬扒嘛   同埋我真係唔肚餓   最後都係食唔哂   嘥哂 ~

之後我就去媽咪屋企   里奧大人就出發去番學喇   真係可憐   放工再番學   睇見都攰呀 ~

是日晚餐有茄汁洋蔥煎豬扒 + 煎英倉魚 + 瑤柱蒸水蛋 + 炒芥蘭 + 節瓜瑤柱 + 花膠螺頭圓肉淮山北芪豬展湯

頭先陪里奧大人食咗豬扒飯   .所以飲咗 2 碗湯已經飽哂   又唔敢講話食咗嘢   不過最後都要食啲飯食啲餸咁   因為媽咪知道妳有無食㗎 ~

差唔多 9 點就走喇   番到屋企成 10 點   里奧大人又成 10 點半先放學   番到屋企成 11 點幾   等到我幾眼瞓呀 ~

尋晚 Upload 相時   睇到以下新聞   攪到我好想嘔 ~

四川「獸孩」 年吃20隻生雞鴨 (明報) 03月 12日 星期三 05:05AM

【明報專訊】四川 內江東興區驚現一名「獸孩」，14歲的他自小不會說話，只能像動物般嚎叫，一年要生吃20多隻生雞鴨。目前他被送往醫院，希望找出怪病的根源。

《重慶時報》報道，據「獸孩」的父親黃西德表示，今年14歲的小林（化名）從小就只懂用手抓東西吃，稻草、紙巾、石頭，見到什麼就吃什麼。6歲開始，小林竟生吃動物，一年要生吃20多隻雞鴨。加上小林經常失禁，父母平時都將他關在屋裏不讓他外出。

日前小林被送往重慶市兒童醫院，醫生稱小林可能智力發育不完全，加上家長又長期將他關在一個封閉環境，導致他只能按原始的本能成長。目前醫院正為小林設定具體的治療方案。

~~~~

今朝里奧大人唔係咁舒服   遲少少先番工   我就仲慘   太夜瞓又瞓得唔好   仲發夢自己好辛苦抖唔到氣   點知一起身個人真係好辛苦   好難抖氣咁   嚇死我呀 ~

早咗番到公司附近   又可以慢慢嘆早餐   食芝蛋治烘底 + 熱古古力 ($15)   唔肚餓食芝蛋治真係會食到想嘔呀   因為太漏喇   不過我食芝士係因為想有鈣質   都唔理得佢肥唔肥 lu   最緊要保健康嘛 ~

晏晝帶飯   食飽好想瞓   到開工嘅時候   見到老細同高層出 Trip 就當堂精神哂   因為我唔駛縮細 Screen 上網同 MSN 呀 ~

泰國菜 + 麥當勞粟米 ( MAR-2008 )

唔駛煮飯   行步路都覺得輕鬆啲呀 ~

呢排公司多人感冒   所以點攰都要去街市買三個木瓜 ($11)   見到呂宋芒咁平   所以又買咗 3 個 ($10)   果樣雖然好似好酸咁   但都照買   因為好想食同埋想整芒果糯米磁呀 ~

番到屋企又係煲藥   見里奧大人又未咁快番   所以順便洗埋衫   煲完藥洗完衫   里奧大人就到屋企附近喇   突然好想食泰國菜   所以去屋企附近間新開泰國菜試下 ~

諗住 8 點幾會好多人等   估唔到無人等位   唔通唔好食 ?!

求其叫咗泰式拚盆 + 甜酸魚柳飯 + 珍多冰   唔知係咪肚餓   覺得好好食喎   同埋我直覺覺得 2 個侍應似泰國人   黑黑咁   心諗咁如果待應係泰國人   廚師都應該係泰國人   唔係點溝通喎   咁即係話係正宗泰國菜啦   最後肯定到佢哋係泰國人   因為我要酸甜醬   佢同廚房啲人係講泰文㗎   點解會咁肯定係泰文 ?!   因為我唔知佢哋講咩嘛   哈哈 ~

又無註明係泰國菜館   只係普通餐廳形式   估唔到要加一   所以埋單 $105   下次會再試多次   因為硬係覺得因為肚餓先覺得好食 ~

頭先本來想叫碟菜   但又驚食唔哂   所以去麥當勞食 2 盒粟米算喇   又抵呢   因為可以用 $5 買原本 $9 嘅粟米喎   係咪好抵先 ~

番到屋企真係唔願再郁就即刻沖涼喇   電視都無咩心機睇添呀   所以尋晚 10 點 50 分已經瞓喇 ~

~~~~

呢排早咗出門口   所以唔駛咁趕食早餐   今朝就食芝腿菠蘿包 + 熱古古力 ($15)   因為我覺得食甜嘢個人會開心啲同精神啲 ~

真係心有靈犀呀   今朝行行下想買蛋糕番媽咪屋企一齊食   點知媽咪打嚟話會買蛋糕   叫我唔好買   媽咪自己買喎   真係好似知我諗咩咁嘅 ~

之後家姐打嚟又話買咗 After Eight 薄荷古古力比我   真係攪嘢   因為我尋晚已經想去買   但個人好攰無去買到   點知家姐買咗比我   真係慳唔少呀 ~

晏晝要食飽啲   因為 Blog 友 亞 See 話呢排流感犀利   要食多啲嘢壯健身體喎   所以我食咗 4 餸車仔麵   就係辣魚蛋 + 豬腸 + 豬紅 + 菜肉雲吞米線呀   $21 好似好多選擇咁   幾好呢   但點解好似唔多飽咁嘅 ~