黑椒火腿絲炒鴛鴦米 + 隔夜湯 ( MAR-2008 )

最怕星期一   因為個人特別攰   無咩心機好 Down 咁 ~

雖然公司有嘢做   但硬係唔想做   好不期然就會上網睇東睇西咁   唔咁做驚真係會坐喺度都瞓着 ~

至於煮咩   個人一悶就咩都諗唔到㗎喇 ~

但之前買咗芹蒜同黑椒火腿   所以就用嚟炒米粉喇 ~

是日懶餐 : 黑椒火腿絲炒鴛鴦米粉 + 隔夜湯

黑椒火腿絲炒鴛鴦米粉 - 諗住炒米粉好簡單...但當一個人好攰嘅時候   原來係一個大工程...芹蒜洗淨切粒   火腿要切絲...蒜頭又要切粒   米粉要煮熟先炒   今次仲大鑊   驚唔夠食   所以用兩餅廣東米粉加一餅泰國米粉   煮熟先知道咁鬼多   本來唔想帶 Lunch Box   但真係唔帶唔得呀   太多喇   今次啲米粉無生勾勾喇   但腍劈劈呢   硬係覺得濕濕咁   啲口感好難頂   我覺得今次煮得好難食   所以我頂唔順要點豉油辣椒油黎刺激我嘅食慾呀 ~

真係好攰   懷疑作感冒   加上我兩隻手指公因為濕疹而比我抓損哂   但一煮飯同洗碗就會爆傷口   雖然愛戴咗手套   但都無用   一樣係會爆   如是者咁樣係咁爆   成世都好唔番啦   所以里奧大人下令停工一星期   唔準煮飯 ~

真係好好好好攰   所以 11 點就瞓咗喇 ~

~~~~

做 Mood 呀   咁攰嘅   瞓極都唔夠咁嘅 ~

做 Mood 呀   咁餓嘅   唔郁都會咁餓嘅 ?!   所以要食芝蛋治烘底 + 杏霜 ($15)   希望食飽有精神做嘢啦 ~

做 Mood 呀   食飽仲想瞓覺呀 ~

做 Mood 呀   攰到爆炸都要晏晝食完飯幫里奧大人去 Bank 滙票 ~

做 Mood 呀   輕微頭痛呀   唔好再感冒呀   啱啱好咗   唔好再嚟攪我呀 ~