唔想煮飯又唔想食飯 所以同里奧大人去燒扒屋食扒 ～
唔係咁肚餓 又諗住五十幾蚊一個餐 份量唔會好多 所以就叫咗蜜糖烤豬肋骨拚司華力腸 + 炒田螺扁意粉 食呀食 好似食極都唔完咁 埋單 $120 又湯又包又好飽 抵呀 ～
聽日 Off 呀 所以個人都特別 Relax 真係好鍾意星期六唔駛番工呀 ~
~~~~
今朝 9 點起身喇 唔駛番工嘅星期六真係特別舒服 平時番工鬧鐘一響就即刻起身 翻熱啲藥 刷牙 沖涼洗頭出門口 好趕好趕 唔駛番工就唔同喇 可以起身之後就做少少家務先刷牙 唔駛趕住出門口 心情都特別靚啲呀 ~
去到媽咪屋企就帶深愛嘅朱朱食早餐喇 食奶油多 + 熱央 ($14) 之後上屋企抖一陣就同媽咪飲茶 然後去拜公公喇 ~
同媽咪又係去飲茶 食濕炒牛河 + 蝦餃 + 溏心皮蛋酸薑拚海蜇 又話係溏心皮蛋 溏佢個頭呀 難食到爆呀 人生第一次食咁難食嘅皮蛋酸薑拚海蜇 埋單 $130 其實飲茶真係幾抵 幾蚊坐個幾鐘 又唔駛比人趕 所以好多老人家都鍾意飲茶 我間唔中都想飲茶 但唔會坐個幾鐘同唔會嘆報紙 係一食完就走 因為我覺得酒樓真係好鬼嘈 想傾偈又傾唔到 睇報紙又好似好浪費時間咁 做其他嘢好過啦 不過當自己老咗就唔知係咪咁諗喇 ~
沒有留言:
發佈留言