住家飯 @ 婆婆屋企 ( MAR-2008 )

尋日同媽咪 家姐搭車拜公公   之後就搭車去婆婆屋企 lu ~

有啲肚餓   所以去婆婆屋企附近嘅茶餐廳食下午茶   Share 食越南粉絲春卷拚沙律 + 沙爹牛肉包拚薯條 ($42)   飽到震呀   食完就上婆婆屋企喇 ~

坐到 6 點婆婆話要預備煮飯   6 點半有得食   我真係好想話頭先食完下午茶未肚餓   但婆婆習慣早食   所以無辦法啦 ~

餸菜有南乳齋 + 煎英倉魚 + 鹵水鴨舌 + 梅菜炒瘦肉   我婆婆煮嘢食真係好好好好味   味道同酒樓嘅一樣   咁當然係無味精啦   所以婆婆話如果有人嚟食飯係唔會比工人煮   因為工人煮得太難食   啲餸幾靚幾新鮮都無用喎 ~

食完飯食埋生果   等埋工人番嚟就同媽咪家姐走喇   出咗成日街   真係有啲攰 ~

話咁快就過咗一日喇   里奧大人就慘啲   屋企水龍頭壞咗   要里奧大人姐夫上嚟屋企幫手一齊換   晚餐只係食車仔麵   又要做功課 ~

星期六唔願咁早瞓   所以 11 點幾都坐喺廳到睇電視...咁啱播 Speed   其實睇過 N 咁多次   但唔知點解今次會咁認真睇   無周圍行   仲要等廣告先去洗手間   因為我突然覺得奇洛李維斯 (Keanu Reeves) 好好好好靚仔呀   個個角度都咁靚   眼大大臉尖尖又有肌肉   Perfect 呀   終於睇到 1 點幾先瞓覺 ~

我覺得 Speed 都係一套刺激嘅戲   所以尋晚成日發夢   起身好似無瞓過咁   最有印象係夢見自己踏單車   係一架廿呎長嘅單車   仲要係成日行轉彎嘅路   好難控制家嘛   第 2 個夢係去天台伸手過隔離天台買粟米   喺個夢仲 Feel 到自己好驚跌落街   第 3 個夢係見舊公司最憎嗰幾個同事   傾一陣偈就走咗   第 4 個夢係夢見喺公司有好多嘢做   做唔完   其實我起身係記得總共有 7 個夢   但到依家只係記得 4 個   我覺得好勁㗎喇   因為基本上我係一個無記性嘅人 ~

好攰好攰   但點都要番教會   今次同里奧大人去教會附近食早餐   食炸菜肉絲米粉拚芝士腸 / 蛋配熱奶茶 + 油醬多 ($29)   食完就番教會喇   之後再去街市買材料煲湯    2 條紅蘿蔔 + 1 一條青蘿蔔 ($19) + 2 條粟米 ($12) + 豬𦟌 ($23)   我次次煲青紅蘿蔔湯都要 3 條粟米   但實在太貴唔捨得買呀   粟米呀   幾時先會平番呀 ~

今次唔想浪費時間   又唔想食到趕頭趕命咁   所以決定番屋企煮丁丁 + 整蒜蓉包   自己整嘅嘢真係特別好味   因為我好有心機整㗎   今次係用整蒜頭嘅器皿嚟整蒜蓉   再加牛油 / 香草 / 芝士炒撈勻查喺麵包度   好好味呀   里奧大人食咗兩件   .其他係我自己一個掃哂㗎 ~