表妹結婚 @ 御苑皇宴 (尖沙咀) ( 30-NOV-2011 )

( 30-NOV-2011  WED )

今朝 8 點就有車   所以有好多時間食早餐呢 ~

菇場靜英英   如果我坐最入就好啦   無人睇到我做咩   拎本書番嚟睇都唔錯   但我就一定唔會瞓覺囉   咁樣瞓都好有壓力家嘛   唔舒服就話啫 ~

晏晝食油雞飯呀   要飽啲   因為今晚要飲表妹結婚酒   肯定 9 點先有得食呀 ~

放工坐巴士去尖沙咀   里奧大人上咗大陸唔去飲   所以我約埋姑姐仔一齊去   去到都差唔多 7 點   影下相傾下偈食下嘢   之後家姐同姐夫同其他啲表弟表妹都嚟埋   好在一齊坐   唔係肯定悶呀 ~

9 點先開席   餓到呢   唔知點解次次食完第 1 樣   隔好耐先嚟第 2 樣   之後行 Fashion Show   又敬酒   食下停下   其實我最唔鍾意啲人揀平日結婚   話哂人哋聽日要番工家嘛   一啲都唔細心囉   好在今晚 10 點 45 分走得咋 ~

番到屋企即沖涼   同里奧大人傾下偈   又差唔多 1 點幾先瞓   呢個月好似晚晚好夜瞓咁   所以依家濕疹又發作喇 ~

意式肉丸蝦子麵 + 菠菜 ( 29-NOV-2011 )

( 29-NOV-2011  TUE )

呢排瞓極都唔夠咁嘅   但其實都瞓咗差唔多 8 個鐘㗎喎 ~ 

食早餐嘅時候無啦啦電話響   原來係 8 卦打嚟問我喺邊間食早餐   佢又嚟一齊食呢 ~

菇場又靜啦   超勁想瞓   但我唔會真係瞓嘅 ~ 

好耐無 Lunch Box 喇   鬼咩   里奧大人食唔哂嘛   咁咪唯有我食囉 ~

無啦啦心口同背脊好鬼痛   嗰刻如果醫院喺隔離   我實會入去睇睇咩事囉   不過睇過幾個中醫   都話因為貧血係咁喎   老友就提醒我係咪胃酸倒流   又幾似喎   我有晚又係咁   痛到係抖唔到氣   一抖氣就好辛苦   死忍難忍到第日下午先去醫院 Check 咩事   原來係胃酸倒流   依家都有啲似呢啲感覺 ~

放工即走啦   諗住去大家樂買隻鮑汁醬油雞   居然賣哂喎   唔通真係咁好味   不過買一隻都係 $55   又真係好鬼抵囉   乾手淨腳嘛 ~

本來想煮蕃茄肉丸長通粉   不過真係好攰   唔想整蕃茄蓉   所以煮麵算喇 ~

是日懶餐 - 肉丸蝦子麵 + 菠菜

肉丸蝦子麵  - 呢個煮比里奧大人食咋   我自己就咁齋食辛辣麵算喇 ~

菠菜 - 1 Pack 分 2 次淥   估唔到里奧大人又食得哂喎   可能細細碗   感覺無咁飽啦 ~

XO 辣椒醬叉燒炒飯 ( 28-NOV-2011 )

( 28-NOV-2011  MON )

今朝好攰咁呀   條腰又無啦啦好痛喎   無哂心機 ~  

諗起尋日飲咗杯凍咖啡好反胃咁   所以今朝飲熱檸檬茶算喇 ~

無飲咖啡真係好想瞓覺囉   同埋有少少頭痛   超勁想番屋企瞓覺 ~

Lunch 食朱古力脆米通 + 鮮奶   加埋一齊好似飲緊朱古力奶咁   食完諗住瞓陣   點知 1 點 40 分先瞓到   瞓咗 5 分鐘   都好過無啦   個人唔夠瞓   所以覺得菇場凍上加凍咁呢 ~

放工去拎藥   之後就番屋企抖陣   里奧大人話要 OT   所以我都抖到 7 點先炒飯   之後沖涼再食飯 ~ 
  
是日懶餐 - XO 辣椒醬叉燒炒飯

XO 辣椒醬叉燒炒飯 - 尋晚食剩嘅叉燒同冷飯   加蒜加薑加蔥加什豆   再加埋沙爹王 XO 辣椒醬一齊炒   超勁惹味勁好食呀 ~

里奧大人差唔多 9 點半就番到屋企   好似好耐無用個暖壺咁喇   雖然係普通炒飯   但都好過成日出街食啦 ~

自家制叉燒 + 炒菠菜 + 茶樹菇姬松茸湯 ( 27-NOV-2011 )

( 27-NOV-2011  SUN )

今朝 10 點半起身食早餐   之後里奧大人話太多嘢做   所以唔番崇拜喇   咁我就去超市買菜   番到屋企 Hea 下   執下嘢   拖地咁囉 ~ 

咁樣搞搞下都差唔多 1 點   之後家姐話嚟拎麵同果仁   咁我叫佢順便車埋我去舖頭喇 ~

番到屋企又抖陣再去食 Tea   勁想飲凍咖啡   我真係好鍾意去茶餐廳食 Tea   感覺好 Relax 咁   最緊要呢間茶餐廳唔係太多人呢 ~ 

食完番到屋企就煲湯   之後瞓咗半個鐘   瞓醒反而超唔舒服同勁反胃   唔知係咪飲咗杯凍咖啡呢   里奧大人話唔好煮   不過我又浸咗菜   又煲好湯   同埋最緊要一樣嘢就係難得里奧大人有餐住家飯食   所以我好辛苦好攰都會煮囉 ~

是日懶餐 - 自家制叉燒 + 炒菠菜 + 茶樹菇姬松茸豬骨湯

自家制叉燒 - 今次唔掂呀   質地好 "鞋"   因為我唔醒起要買啲肥嘅   就咁見到豬展就買   一啲肥都無   所以食起嚟好 "鞋"   同埋今次落咗玫瑰露酒   里奧大人話唔同以前啲味喎 ~

炒菠菜 - 用蒜頭炒咋   如果今日無唔舒服   就諗住整金銀蛋菠菜呢 ~   

茶樹菇姬松茸豬骨湯 - 又係湯包嚟咋   真係好鬼方便   就咁買豬骨同紅蘿蔔就搞掂 ~

扒王之王 @ 荃灣 ( 26-NOV-2011 )

羅宋湯

扒王沙律 / 鐵板美國選級穀飼牛仔扒 拚 黑椒牛柳 4 oz / 紐西蘭肉眼扒 / 黑牛

( 26-NOV-2011  SAT )

難得每月一次嘅 Off   咁當然瞓到自然醒啦   不過都係瞓到 10 點半就醒咗 lu ~

梳洗之後就去食早餐喇   本來諗住北上按摩   不過里奧大人又話好多嘢做唔想上喎   咁我無咩所謂嘅   好過上到去 Relax 又係咁諗公司嘢 ~

牛肉腸 / 榨菜肉絲五香肉丁米粉 / 炒蛋 / 牛油多士

食完就去百佳買豬骨   諗住買埋雪梨   點知得番啲爛嘅   咁唯有再去惠康買啦 ~

番屋企煲雪梨蘋果山渣羅漢果茶   酸酸咪咪好好飲   之後再做家務   熨衫拖地   一氣呵成   屋企乾乾淨淨   咁聽日可以全日休息唔做喇 ~

Hea 多陣就沖涼    之後食車仔麵   再入荃灣搵表妹剪髮呢 ~

豆腐 + 魚蛋 + 青椒 / 豬腸 / 豬紅粗麵 / 牛腩 / 螺肉 / 生菜米粉

今次陪里奧大人剪髮   等咗一個鐘   好在有電視睇   又傾下偈   咁啲時間都易過啲   因為里奧大人最憎等囉 ~

剪完都差唔多 7 點   咁有少少餓   所以食串大辣魚蛋   食到好滋味嘅時候   里奧大人拉我行前幾步   我又唔係阻住人喎   咁我知咩事啦   原來有隻巨強喺我一個身位隔離   當堂毛管動啦   食完即走呀 ~

我想去陳記食嘢   但行下行下又唔知去咗邊   咁又拎住一袋二袋   所以話見到想食嘅就入去食喇 ~

行到唔知邊度   見到有扒王之王就入去食啦   諗住有魚柳餐   但只得牛同豬   咁我實會食牛   自己唔識煮嘛 ~

我哋坐卡位對住電視   但都好近廚房   所以我食食下覺得好熱同好焗   里奧大人對眼就一路睇住個電視   嘢食嚟到又唔拎埋嚟   食嘢都唔願食咁   係咁掛住睇   整到我火都嚟   我叫佢背住電視   佢笑笑口   我話你真係煩   食就食啦   望住電視郁都唔郁   浪費時間 ~

食完就行番去坐小巴   好在認到個公園   唔係又要周圍搵 ~

15 分鐘出到九龍灣   真係超快呀   番到屋企抖陣   之後去徑步   今次徑 15 分鐘先   因為我唔想一下子太攰呀 ~

大快活 @ 九龍灣 ( 25-NOV-2011 )

蕃茄木魚湯底

穀飼肥牛 (4 oz) / 豬肉水餃 / 年糕福袋 / 芝士腸 / 金菇 / 生菜 / 玉子豆腐

( 25-NOV-2011  FRI )

終於又到 Happy Friday 喇   真係超開心㗎 ~

間唔中就好想食三文治   唔烘都幾好味   因為呢間啲麵包好軟熟呢 ~

菇場都忙呀   家姐問我忙好定唔忙好   我話無嘢做真係好悶   有嘢做好啲嘅   時間過得快啲嘛 ~

晏晝同家姐媽咪喺菇場附近飲茶   好開心呀   只從搬咗 Office 之後   好耐無同媽咪晏晝飲茶 lu ~

食到超飽   好在菇場有嘢做   唔係飯氣攻心就慘喇 ~

放工出旺角睇中醫   差唔多 7 點就睇完   因為要比藥粉家姐   所以佢就陪我食嘢喇 ~

好想打邊爐   所以又去大快活喇   好在家姐幫手食   唔係又飽到反肚呢 ~

家姐又嚟我屋企   一齊睇電視   又食下零食咁囉   佢 11 點就走喇   里奧大人就 11 點半先番到屋企   本來想煮蝦子麵比佢   但佢又唔鍾意就咁食齋麵喎   咁我話有肉丸   佢又話唔想我咁攰又煮又洗   所以最後都係食杯麵算喇 ~

呢晚差唔多 1 點先瞓   好在聽日 Off   唔係暈都似 ~

住家飯 @ 媽咪屋企 ( 24-NOV-2011 )

茄汁蝦碌


蒸斑仔

鎮江骨


炒油麥菜

栗子蓮藕雞腳豬骨湯

楊桃 / 石榴

( 24-NOV-2011  THU )

星期四喇   逢星期尾最開心呢 ~

今朝又去一間新開茶餐廳食嘢   本來 8 卦話嚟   但打比佢   佢又話遲咗班車所以唔嚟   之後又見到同事入嚟食   不過唔係一張枱   咁我可以慢慢嘆報紙喇 ~

番到菇場忙到爆炸   未停過手 ~

Lunch 食 Special K + 朱古力奶   點知個雪櫃又唔知搞咩   將盒奶變哂冰   好在今朝我 11 點拎咗出黎   再用熱水坐熱   不過都未完全溶得哂   半盒要叮番溶囉   麻煩 ~

又好忙喎   不過啲時間過得好快呢 ~

今晚番媽咪屋企食飯   家姐又番嚟食   今次媽咪特登整到啲餸好多汁   我超 Like 呢   就咁用汁都食咗一大碗飯呀   之後媽咪係咁叫我食餸   我話次次食飯都食到就嚟反肚咁   家姐笑住話有無咁誇   但我真係次次都飽到想反肚咁㗎喎 ~

差唔多 9 點就走喇   番到屋企熨兩機衫   再抹櫃   之後睇電視等里奧大人番嚟   又係差唔多 11 點幾先番到屋企   我又陪佢傾下偈   睇陣電視又已經 12 點幾 ~

麥當勞 @ 九龍灣 ( 23-NOV-2011 )

( 23-NOV-2011  WED )

今朝好似有啲熱咁   但都係着件風褸穩陣啲好  ~

早餐食香茅雞翼炸菜肉絲米粉   不過其實無咩胃口食   只係想食濕濕哋嘅嘢囉 ~

菇場靜啦   個肚又少少少少唔舒服   勁想瞓覺囉 ~

一早買定咗個包留番 Lunch 食   點知家姐打嚟約食 Lunch   所以個包都比埋佢喇   同佢食 Burger   家姐最鍾意啖啖肉   好可惜呢間麻麻呢 ~

蘑菇芝士安格斯牛肉漢堡 / Meat Supreme Pizza (辣肉腸 / 雞肉 / 煙肉 / 粟米 / 蕃茄醬)

食完同家姐行一陣一田   以為有特價嘢買   原來係聽日先開始   家姐話點解個價錢唔同宣傳單張嘅價錢   妳都唔覺得怪嘅咩   咁又係喎  ~

好在晏晝有啲嘢做下   唔係瞓着都似  ~

里奧大人朝早見客   仲諗住唔駛上大陸   點知無啦啦又話要   咁即係唔會咁早番屋企啦   所以我放工去惠康買嘢   之後再去麥當勞食晚餐喇  ~

本來唔想食麥當勞   不過等車嘅時候見到個女仔喺度食   我又好想食喇   食到好飽呀   所以走去書局睇下嘢   睇咗半個鐘就走喇   好鬼凍呢 ~

番到屋企開機洗衫   但唔熨衫   只係掃地   因為我想休息下呀 ~

里奧大人差唔多 11 點幾先番到屋企   其實我已經喺梳化度瞓着添喇   我問佢食咗咩   佢話無食   過哂食飯時間唔想食   但我話咁唔得喎   食個杯麵都好   好在佢都肯食啫   之後傾下偈   等埋佢沖涼   再睇多陣電視就瞓喇   因為已經 12 點幾呢 ~

敍苑粉麵茶餐廳 @ 九龍灣 ( 22-NOV-2011 )

( 22-NOV-2011  TUE )

尋晚 9 點半就瞓   但瞓到差唔多 6 點幾就醒醒哋   不過我會繼續瞓囉   瞓下醒下到 7 點 50 分先起身   里奧大人話唔多舒服   所以 Off 半日   問我番唔番工   我其實真係唔想番   不過又唔想成日請病假囉 ~

無咩胃口   所以早餐食奶油多   食咗一半已經好飽   不過又唔留得   所以迫自己食埋去啦 ~

菇場無咁忙啦   個肚只係有少少少少唔舒服   如果可以瞓就好喇   瞓完肯定好精神   咩唔舒服都無囉 ~

差唔多 1 點半先食吞拿魚包   其實仲未餓架   不過費事個個開工先食   菇場又靜   個膠袋又嘈   所以先食咋 ~

4 點半無啦啦又好忙喎   不過都好嘅   好快就放工咁呢 ~

里奧大人今日都係請咗一日假   所以我放工即走 lu   佢話想食煲仔飯喎   不過想試另一間又無窩蛋牛肉飯   所以去番敍苑囉   估唔到依家煲仔飯要 $47   我仲以為 $3x 添   我記得今年頭食都係 $3x 之嘛   一貴就貴咁多   又唔係好食   有啲唔抵   不過無計   想食又唔想出遠啲搵食 ~ 

食到爆肚咁滯   所以去德福行下   散下步舒服好多囉   番到屋企即沖涼再睇電視   無做任何家務呀   實在太唔想郁呢 ~ 

油雞飯 (外賣) ( 21-NOV-2011 )

( 21-NOV-2011  MON )

星期一喇   好感恩每月一到都好舒服   無反胃感覺   只係好攰   感恩今朝仲有胃口食早餐添 ~

菇場又忙   咁都好   唔係無嘢做仲眼瞓 ~

Lunch 係今朝買嘅菠蘿包 + 墨西哥包   好想食啲甜嘢咁囉 ~

個肚有好輕微嘅肚   但無反胃   真係好耐無試過咁喇   期望下次每月一到更舒服呢 ~

好肚餓呀   所以去屋企附近明星買油雞飯番屋企食   $20 一盒咋   超抵超抵   同埋啲油雞都好好味   我仲有胃口到食哂一大盒飯   真係好少有   所以真係超感恩呢 ~

里奧大人今日上咗惠州   所以好感恩 5 點半可以放工   8 點 15 分就買埋晚餐番屋企食呢   佢好似買叉燒牛展飯   見到佢食飯盒真係好心痛   所以我依家覺得身體健康最重要   咁先可以照顧到所愛嘅人呢 ~  

梅菜蒸鯇魚 + 蒜蓉炒菜心 + 龜板湯 ( 20-NOV-2011 )

(  20-NOV-2011  SUN )

今朝瞓到 11 點 15 分先醒   原來里奧大人唔記得校鬧鐘   所以都番唔切教會   仍都落唔切去食早餐   咁我就煮愛心早餐喇 ~

食飽就熨衫   再開機洗衫   個頭無啦啦痛同埋鼻塞塞咁   所以熨埋衫   飲杯 Hot Lemon 就沖涼休息 lu ~

我依家儲報紙拎去廢紙回收站到賣   都賺到 20 蚊   食餐 Tea 都唔錯   本來諗住賣完報紙先食 Tea   點知收賣佬又行開咗   所以食咗 Tea 先   食住等囉   之後同里奧大人講話見到 7-11 有阿 Jack 教友介紹果隻紅酒   佢走去買   明明話買 6 枝   點知買咗半箱番嚟   茶餐廳個侍應見到啲紅酒都呆咗   阿 Jack 話唔係成日有得買   同埋一出就好快比人買哂   所以今次見到好感恩呢 ~

唔怪得呢排咁攰啦   原來每月一到   我發覺呢兩次都會頭痛   今次仲好添呀   個肚無咩谷住   醫師啲藥真係好有效呢   超感恩 ~  

差唔多 6 點半就預備煮晚餐   因為想 7 點食飯   早啲食早啲休息 ~

是日懶餐 - 梅菜蒸鯇魚 + 蒜蓉炒菜心 + 龜板湯

梅菜蒸鯇魚 - 本來想買其他魚   但又唔見其他 Pack 好咗嘅魚   所以買番鯇魚囉   我覺得好似星期日指定嘅晚餐咁呀 ~ 

蒜蓉炒菜心 - 媽咪比咗我好多薑同蒜頭   所以今餐炒菜啦   我覺得炒菜真係好味啲呢 ~

龜板湯 - 湯包嚟㗎   加咗 3 條甘筍同埋 $35 豬骨去煲   都好濃味   唔錯唔錯 ~

搞掂哂就即刻沖涼喇   因為要睇 "法證 3" 大結局   我好少追 TVB 劇   不過覺得呢套真係幾好睇呢 ~

和民居食屋 + 金滿堂甜品 @ 九龍灣 ( 19-NOV-2011 )

照燒雞沙律

脆脆炸薯條 / 和風比薩 (叉燒 / 照燒雞) / 雞腿肉串 (鹽燒) / 鮭魚卷 / 牛肉火鍋 / 烏冬 / 梅酒

椰汁芝麻湯丸 / 椰汁紫米清心丸 @ 金滿堂甜品

( 19-NOV-2011  SAT )

今朝特登遲啲起身   8 點先醒   8 點 25 分出門口   一開手機就有 SMS   原來係家姐問我起身未   之後我再問佢喺邊   佢話喺菇場附近   因為佢唔敢打比我嘈醒我哋喎 ~  

尋日佢去咗長洲   買咗啲魚蛋同芒果糯米糍比我   所以想等我快啲食   襯新鮮嘛   咁我都即打的喇   咁樣可以一齊食早餐   如果坐巴士   起碼要 25 分鐘 ~  

我同家姐去我平時食嗰間茶餐廳食   家姐問會唔會見到 8 卦   我話唔會啦   8 卦 Off 嘛   同埋如果 8 卦番工嘅話   我會轉場囉   我唔會比 8 卦見到家姐   唔係一陣又問三問四好煩   我好唔鍾意囉 ~

食到 9 點 10 分就走喇   家姐都番屋企 lu   我食嘢買嘢都會諗起家姐   但多數會叫佢自己嚟拎   我突然間覺得自己好衰咁呀 ~

菇場次次都係咁嘅   逢星期六實好多嘢做喎   但我唔做㗎   除非好 Urgent 囉 ~

放工即走喇   去百佳買豬肉   有 7 折呀   估唔到仲有得買   之後再兜多個圈就番屋企 lu ~

Lunch 食魚蛋蝦子麵   唔好浪費家姐一番心意嘛   食完就開機洗衫   再煲紫貝天葵同煲湯   好充實呀 ~

之後抖下喇   整理啲 Recipe   抽起哂想煮嘅出嚟   咁唔駛臨時臨急諗煮咩好 ~

今晚同媽咪去和民   本來媽咪想去 APM   但我話想煲湯比里奧大人飲   所以話去和民食   咁我啲時間就好用好多喇 ~

食完再食糖水   超飽呀   唔記得留肚飲湯   所以要留番聽日先飲呀   里奧大人之後就去跑步   我唔去喇   呢排唔知點解好攰   唔想做運動囉 ~

煎釀孖寶 (外賣) + 辛辣麵 ( 18-NOV-2011 )

( 18-NOV-2011  FRI )

Happy Friday 喇   真係好開心囉 ~  

菇場又唔忙啦   好在星期五啫   感覺上啲時間無過得咁漫長咁呢 ~

Lunch 又食 Special K   其實幾好味嘅   脆卜卜嘛   不過日日食有啲驚   但我都會繼續食   要堅持嘛   唔想成日買完又唔食囉 ~

里奧大人上咗大陸見客   所以又唔知幾時番   所以我都自己食嘢先   買咗煎釀孖寶番屋企   再自己煮辛辣麵   屋企無風   碗麵又辣   差啲暈咁滯   最後都忍唔住開冷氣呀 ~

飽到上心口呀   所以就抹廚房再熨衫   真係唔郁唔得呢 ~

里奧大人又 11 點先番到屋企   同佢傾下偈   睇下電視   12 點幾先瞓   如果我逢星期六都係 Off 就好啦   今晚夜啲瞓   聽日瞓到幾晏都得   咁就最爽啦 ~

住家飯 @ 媽咪屋企 ( 17-NOV-2011 )

梅菜扣肉

荷蘭豆炒魚片

蒸大眼雞

白切雞

山斑魚湯

林柿 / 恐龍蛋

( 17-NOV-2011  THU )

星期四喇   好快就到星期六   所以好開心呢 ~

今朝想轉場食早餐   但又驚杯咖啡唔好飲   所以最後都去番平時食嗰間   估唔到係即磨咖啡   好感恩呀   因為好有新鮮感呢   食食下 8 卦又嚟埋   不過佢食嘢真係好快   半塊餐肉就咁擺入口   我會切開一半先食㗎   如果里奧大人咁食   我實話佢   無啲儀態 ~

菇場無咩嘢做   算啦   比自己抖下 ~

晏晝食 Special K + 豆奶   無計啦   要清哂啲 Special K 嘛   起碼要食 3 個月   好在家姐都鍾意食   咁我可以比一半佢   好似對佢好好咁   其實自己食唔哂   不過佢好開心架   唔駛錢喎 ~

放工又番媽咪屋企食飯   其實唔想番架   不過媽咪特登煲咗山斑魚湯   所以咪番去食飯囉   估唔到家姐同姐夫又一齊番嚟食飯呢 ~

家姐今晚楂車   所以食完飯就跟埋家姐一齊去糟糟屋企拎爆谷   之後就番屋企喇 ~

里奧大人 10 點先喺大陸放工   番到嚟 11 點幾   佢買咗麥記番屋企食   我又陪佢食囉   又食唔哂啲薯條   但又要叫餐   搵我嚟搞   不過最後都食剩半包 ~

本來想入房瞓   但又想陪下里奧大人   不過佢話起碼做到 3 點先瞓喎   所以我瞓喺梳化度睇電視當陪佢囉   不過最後真係瞓着咗   瞓到 12 點半就番房瞓喇 ~

住家飯 @ 媽咪屋企 ( 16-NOV-2011 )

蒸鷹鯧魚


鎮江骨

白切雞

炒唐生菜

節瓜雪耳瘦肉鱷魚肉湯

( 16-NOV-2011  WED )

真係咩事呀   超勁攰呀又   瞓咗 8 個鐘都好似好攰咁嘅 ~

今朝好餓呀   所以食麵餐   上次煮到好林   今次叫佢唔好煮咁腍   我自己再浸多陣先食   咁就啱啱好喇 ~  

同 8 卦 MSN   佢話我知食即食麵要一個月先消化到喎   叫我唔好食咁多   佢唔食得辣   唔飲咖啡   又唔多食薯片   上次佢話食薯片飲水   我話佢真係超級怪呀   食薯片要飲汽水家嘛   薯片 + 汽水係絕配   等如你食餐蛋治都唔會送白粥啦   我仲問佢飲熱定凍   佢話肯定唔係熱啦   之後佢問佢女友食薯片飲咩最好   佢女友都話飲汽水呀   好在啫 ~

晏晝食 Special K + 豆奶   我覺得用飲奶先夠飽   飲豆奶會好快餓囉 ~

今晚得我番媽咪屋企食飯   見到佢話好好多同埋會落街食嘢   我都安心好多喇   我個人已經緊張   又成日要我心掛掛   真係有時唔話唔得呢 ~

真係好鬼攰呀   食完坐梳化都差啲瞓着   所以我 8 點鐘就走喇 ~

番到屋企想機洗衫   之後好想即刻沖涼   不過就熨埋衫先沖囉   因為如果唔熨   我又覺得有啲嘢未做咁   同埋當做運動囉   頭先食到咁飽 ~

里奧大人 9 點半先喺大陸走   番到嚟到差唔多 11 點   話快啲沖涼   咁精神啲覆 Email   我想話好心就瞓啦   不過唔講喇   成日講我都覺好煩   反正講咗都係咁   所以我同佢傾一陣我都瞓喇   女人夜瞓   個樣特別快殘   唔好搞我 ~

韭菜豬肉水餃擔擔麵 + 唐生菜 ( 15-NOV-2011 )

( 15-NOV-2011 TUE )

好攰呀   仲好似無咩心機咁添呀   可能媽咪入咗醫院比較擔心咁啦 ~
  
早餐食芝腿治烘底   啲人成日話自己整都得   我都知   但我唔想早特登又早啲起身   又要烘多士又要煎蛋   食完又要即洗   之後又要沖涼   我覺得好趕   唔鍾意囉   除非假期   咁又唔同   話哂唔駛趕住出門口嘛 ~

番到菇場做埋少少嘢就可以 Hea 喇   有啲唔慣添   之後收到媽咪電話話可以出院   心情開心番哂呀 ~

今日又 Special K + 豆奶   尋日菇場個雪櫃壞咗   所以我嗰盒豆漿變哂冰   連檸檬茶  咖啡  可樂都全部變哂冰呀   一係就滴水   一係就變冰   換過新好過啦 ~

晏晝有啲想瞓添呀   只係好想快啲放工番屋企   本來想睇下媽咪   但出到門口覺得好凍   我又着唔夠衫   加上個人又好攰   所以都唔睇媽咪喇   我驚睇完之後到我病呀 ~

番到屋企抖陣再煲中藥   再食啲嘢就拖地   之後飲埋中藥就等里奧大人放工喇   算好啦   8 點放工   因為我話等埋佢先一齊食飯嘛 ~

是日懶餐 - 韭菜豬肉水餃擔擔麵 + 唐生菜

韭菜豬肉水餃擔擔麵 - 本來想整擔擔麵醬炒肉碎   不過好攰   就咁淥水餃就算 lu ~

唐生菜 - $10/2 Pack   一次過淥哂算喇   唔想留呀   一陣唔記得食仲浪費埋添呀 ~  

大快活 @ 九龍灣 ( 14-NOV-2011 )

( 14-NOV-2011  MON )

呢排好攰呀   加上星期一添   不過算啦   番工有得賺錢   咁樣諗就會開心好多呢 ~

今朝食早餐嘅時候   8 卦又嚟咗   食下傾下都好快夠鐘番工 lu ~

菇場勁忙呀   真係到 Lunch Time 先停手   同 8 卦一齊落街買嘢食   今次又係明星   要少飯   我又再將一半飯比咗 8 卦   咁我就啱啱好喇 ~

忙呀忙   忙到 5 點幾   放工去旺角睇中醫   之後再搭小巴番屋企 ~

7 點番到屋企   所以順便煲藥同開機洗衫   等埋家姐探完媽咪就嚟同我哋食飯   我想去稻香打邊爐   但里奧大人話想食清啲嘅嘢喎   但佢自己晏晝就食椒鹽豬扒飯   咁我話大快活啦   我有我打   你有你食 ~  

家姐 8 點半到咗大快活   咁我同家姐 Share 一個鍋再加豬肉水餃   咁一口食一路等里奧大人   佢好似成 9 點幾先到   所以無哂燒味飯   要食其他飯 lu ~

之後家姐上埋嚟睇法證同食雪糕   差唔多 10 點 45 分先走喇   佢聽日開始 Off   但我唔係嘛   如果唔係佢想夜啲先走呀 ~

婆婆生日飯 @ 鴻星海鮮酒家 (紅磡) ( 13-NOV-2011 )

榴槤蛋糕 2 磅裝 by 沛公)

( 13-NOV-2011  SUN )

尋晚喺張床差唔多 3 點先瞓到   其一飲咗咖啡   其二應該係熱呀   好在里奧大人起身開咗冷氣   咁我就當堂瞓得好舒服喇 ~

同里奧大人去大快活食早餐   食完就諗住自己去惠度買嘢   因為有 95 折嘛   因為我要計過度過買嘅錢可以換幾多個印花   如果里奧大人喺度   我要好快手   不過佢又主動話陪我   咁我都講明要計數   佢都幫我計埋呢   如果我買嘅銀碼係 $105   咁我會買多 $20   好過下次要買 $60 先有 1 個印花嘛 ~

今朝里奧大人同媚媚番崇拜   之後就食 Lunch   我就話明話要執書櫃   又要抹窗   呢兩樣嘢想做好耐   真係唔想再拖   依排又要探媽咪   無哂時間   所以唔番崇拜囉 ~

熨完衫已經 2 點半先走   啱啱里奧大人打嚟話食完   所以叫佢外賣比我食呢 ~

沖完涼再睇陣電視   瞓咗半個鐘就起身煮水餃蝦子麵比媽咪   煮呢啲湯麵真係唔可以早啲煮   要諗走先煮   之後仲要分開湯上   唔係索哂啲湯好難食呢 ~

我叫里奧大人唔好去喇   佢仲趕緊公司嘢   所以我又兜埋家姐一齊去探媽咪   今晚婆婆生日   所以我哋 7 點就走 lu ~

之後叫里奧大人喺屋企附近巴士站等我哋   我哋一上車就打比佢   咁就一齊去紅磡喇 ~

今次媽咪 大舅父一家同第 2 個舅父一家都無嚟   所以一圍搞掂哂 ~ 

差唔多 10 點半就走喇   同埋家姐一齊坐巴士番屋企   呢排又攰   尋晚又瞓得唔好   所以番到屋企即沖涼即瞓喇 ~

COCO 壹番屋 @ 官塘 ( 12-NOV-2011 )

吉列豬扒咖哩飯 (5 級辣) ($65) - 好香好辣   但鹹咗啲

炸雞球咖喱飯 (2 級辣) ($60) - 好香  好溫和   里奧大人至啱食呢     
牛肉奄列咖哩飯 ($65) - 無得揀辣   不過我覺得啲牛肉都幾羶囉

例湯 - 無味道嘅

迷你沙律 (芝麻醬) - 無特別

雪糕 (曲奇妙趣 / 士多啤梨) - 估唔到有兩個球噃

凍咖啡 - 都唔好飲嘅

( 12-NOV-2012  SAT )

今朝要番工   但老闆佢哋 Off   所以 8 卦就約我一齊去食早餐   包唔會見到老闆啦 ~

菇場唔忙   我後面個同事又無番   我要搵嘅同事又 Off   所以我都無乜點做嘢   盡情上網呀   難得後面無人昅住哂 ~

放工去睇中醫   睇完就約里奧大人去麥記食嘢   因為前幾日早餐已經想食魚柳包   不過又唔想食薯餅   但散叫又貴   所以中午食就好最喇 ~

Shake Shake 薯條 (BBQ 蜜糖)   我超鍾意食薯條點芥辣   但要比 $1   如果唔駛錢更好   哈哈

番到屋企就煲中藥   今次用電壺煲呀   唔駛睇火好方便   又唔駛開煤氣咁貴   時間又差唔多   唔錯唔錯 ~

里奧大人做公司嘢   我就熨衫同做家務   之後再煮埋蕃茄肉丸意粉比媽咪   家姐又話想比啲姐夫食   絕對無問題啦   反正煮開   搞掂哂就同里奧大人一齊出門口   順便兜埋家姐去探媽咪 lu ~

見到媽咪都幾精神   有胃口食嘢   只不過有啲頭暈   可能耳水不平衡   問咗醫生   但醫生又無答 ~

無啦啦超勁想食冬蔭功河   但里奧大人就唔多想   之後家姐話食 COCO 咖哩屋   又好提議喎   佢話之前食過 5 級辣   話好味   所以佢成日再想食   不過無對手 ~

我哋又係 7 點 50 分走人   咁就車等人   唔係人等車   香港咁多交通工具   我最鍾意搭小巴   因為夠快同埋實有位坐   但最憎一樣嘢係叫落車嘅時候   有啲司機無反應   真係唔知聽唔聽到囉   同埋如果唔熟落車地方   真係好驚唔知邊度嚟囉 ~

去到 COCO 都幾多人等   差唔多等咗半個鐘   不過傾下睇下都好快到我哋呢   好感恩有卡位坐添呀 ~

家姐講明食 5 級辣   里奧大人就 2 級辣   我就話食咗點辣先再叫呢   反正 Share 食 ~

我話食完想去 Jusco 買嘢   因為收到 SMS 話連續 3 日感謝日   所以又有 95 折   去到無咩人喎   咁大家一齊格價嘅時候   我突然心血來潮再睇多次 SMS   原來係下星期先開始   之後佢哋就係咁話我成日睇錯嘢   唔好信我咁喎 ~

家姐要嚟拎長通粉   所以就一齊坐地鐵番屋企   之後話想睇電視   因為有鬼片   其實都唔係鬼片嚟嘅   個戲名有個兇字   又唔係個凶字   再睇多陣知道唔係鬼片   我叫佢番屋企好過啦   所以佢都走 lu ~

里奧大人去跑步   我就拖地   今晚飲咗咖啡都唔係點想瞓添   但上次飲又無嘢喎 ~   

板長壽司 @ 九龍灣 ( NOV-2011 )

芒果蟹籽沙律 / 醬燒三文骨腩 / 三文魚壽司 / 帆立貝壽司 / 三文魚醬油漬壽司 / 蝦天婦羅壽司 / 黃旗吞拿魚 / 稻燒宮城海鰻 / 芥末鮑魚軍艦 / 貝柱軍艦

( 11-NOV-2011  FRI )

今朝好餓呀   所以想食米粉   咁碗米粉一嚟到   就收到電話   原來係平安鐘打嚟話媽咪氣促入咗院   搞到我無哂心情食嘢 ~

番到菇場又忙   又擔心媽咪   真係差啲喊出嚟呀 ~

差唔多 11 點   老闆突然叫全部同事去 Show Room   以為有咩事添   一入到 Show Room 就見到生日蛋糕   原來今日係細老闆生日   所以喺 11 點 11 分 11 秒切蛋糕呢   咁都好喎   可以抖半個鐘 ~

做做下嘢媽咪打嚟   話依家喺醫院好好多   我個心就當堂定哂喇 ~

Lunch Time 未餓   所以出萬寧買嘢   佢哋啲 出位價貨品真係好抵   同埋依家好多時都有嘢送   我又要幫家姐儲印花   一舉兩得 ~

差唔多 3 點半先食 Lunch   食家姐買比我嘅芝麻糕   好煙韌㗎   同埋唔甜   不過無咩芝麻味咁囉 ~

放工去探媽咪   見佢都 OK 精神   我都安心啲   之後家姐嚟埋   傾下講下都好快夠鐘   我哋 7 點 50 分就走喇   因為 8 點會好多人走   要等好耐 Lift 呢 ~

我哋 Join 埋里奧大人一齊食嘢   本來我話去鐵匠   估唔到里奧大人話去板長   家姐係咁點頭   梗係啦   佢最鍾意食壽司 ~

家姐聽日又 Off   所以我叫佢嚟食雪糕同埋睇埋法證先走   我就唔沖涼住陪佢睇啦   一齊睇一齊講下   廣告時間又傾下   所以啲時間好快過呢 ~

住家飯 @ 媽咪屋企 ( 10-nov-2011 )

( 冬菇栗子燜一字排 )


有一隻冬菇非常之大隻   要用刀切開先得

( 蒸三蘇 ) - 唔知係咪咁打



( 荷蘭豆炒魚片 )

( 栗子粟米紅蘿蔔唐排湯 )

( 10-nov-2011 thu )

依家好多時間食早餐   我次次多數食完先睇報紙   好小會一路食一路睇   比我感覺好似好趕咁 ~

番到菇場又忙啦   又係忙到 lunch time   要食 Special K 喇   我要盡快食哂去 ~

晏晝又忙   好快就放工咁呀   一出大門口   凍到打冷震呀   簡直係凍到想嘔嘅感覺添呀 ~

今晚番媽咪屋企食飯   差唔多 9 點就同家姐一齊走喇   里奧大人打黎話啱啱先喺大陸放工   番到黎成 11 點   同佢傾多陣計我都瞓喇 ~  

鹹魚雞粒炒飯 ( 9-NOV-2011 )

( 9-NOV-2011  WED )

落雨濕濕番工真係好煩   今次我醒喇   唔行入去巴士站入面等車   企喺外圍等   咁就唔駛比啲車行過嚟嘅時候   飛哂啲水埋嚟身度呢 ~

今朝食餐蛋治烘底   以前我超級憎食餐蛋治㗎   可能果間外賣無煎香到啲午餐肉   所以唔好食囉 ~

番到菇場忙到爆呀   做到差唔多 12 點 40 分先 Lunch   我唔想啲嘢做一半唔做一半   反正食 Special K 又方便 ~

晏晝都忙呀   好鬼攰   好在諗好晚餐煮咩   咁樣可以煩少一樣嘢 ~

今晚去 Laneige 買嘢   因為老友話幾好用嘛   我啲皮膚又易敏感   所以多數有人用過話好同埋無敏感先會買囉   我諗住買支精華素就走人   不過佢話有得做皮膚測試   我咪做囉   我其實都知道自己皮膚比較乾   我都會間唔中補濕嘅   但今晚我只想買精華素囉   之後佢就 Show 哂補濕條 Line 嘅 Product 我試   咁試咗 Eye Cream 都唔錯   所以買埋喇   其他就唔會買住   因為屋企仲有嘛   唔想買新囉   之後我望下電話   原來已經 7 點 20 分   足足逗留咗個幾鐘   好在最後都只係買咗 2 樣自己想要買嘅嘢啫   今時唔同往日   要慳得就慳呢 ~

好餓啦   里奧大人喺大陸又未咁早番   所以忍唔住買煎釀三寶番屋企食呀   平時同家姐一齊食嘅尖椒一啲都唔辣   今次自己食呢 2 隻啦   辣到火燒喉嚨咁呀   仲要流埋眼水添   如果家姐喺度就好啦 ~

食完都好飽   所以熨衫當運動   差唔多 8 點半先炒飯   因為我想快啲炒完就沖涼睇電視呀 ~

是日懶餐 - 鹹魚雞粒炒飯

鹹魚雞粒炒飯 - 尋晚食唔哂啲雞   所以切粒炒飯   咁再蒸定鹹魚   聞嘅時候好鹹㗎喎   咁所以我炒飯唔落豉油調味   只加幾滴魚露   點知成碟飯係無味   我要加辣豆板醬呢 ~

里奧大人 10 點先番到屋企   食得一碗仔   話無胃口   我話食咁少   其實想發火話   煮咗又食少少   不如唔好食   佢話真係無胃口   下次都係喺大陸食埋先番屋企   又唔駛餓住   餓到番到屋企又無胃口食嘢   咁我話好啦   我唔駛煮仲好   食咩都得 ~

沙薑香妃雞 (大家樂外賣) + 鹹蛋節瓜豆腐湯 ( 8-NOV-2011 )

( 8-NOV-2011  TUE )

尋晚 10 點半就瞓   但點解瞓極都咁攰咁嘅 ~

今朝勁想食湯米粉   所以就叫雪菜肉絲五香肉丁米粉喇   加埋杯凍咖啡   我覺得真係好滿足㗎喇 ~

番到菇場無停過手   係咁做呀做   不過 11 點開始餓   次次食米粉都反而好快餓   唔知點解 ~   

又忙又餓   好彩好快到 Lunch Time   又好彩有 Lunch Box   唔係又要出去買   又要等   再番到菇場   起碼 15-20 分鐘呀   真係行路都無力咯 ~

放工去大家樂買隻沙薑貴妃雞   之後再去惠康買豆腐就番屋企喇   里奧大人 8 點幾先放工   所以我就飲湯先   唔想夜晚起身去洗手間呀 ~

是日懶餐 - 沙薑貴妃雞 (大家樂外賣) + 鹹蛋節瓜豆腐湯

沙薑貴妃雞 - 我用 Coupon 買㗎   只係 $52 隻   真係買仲平過自己煮呀   同埋我又唔會整原隻雞   所以買呢啲雞就最好㗎喇 ~

鹹蛋節瓜豆腐湯 - 第 1 次咁滾湯   都唔錯噃   味道幾清   其實好聽叫清   唔好聽叫無味   嘻嘻 ~

馬拉盞炒玉豆豬肉片 ( 7-NOV-2011 )

( 7-NOV-2011  MON )

好唔想起身呀   呢排點瞓都唔夠咁嘅   唔知係咪太多濕毒呢 ~

今朝食芝腿治烘底   我覺得唔烘底都好食   不過我覺得烘咗無咁肥咁囉 ~

番到菇場忙咗成朝   忙到差唔多 Lunch Time 先做完呀   今日有 Lunch Box   唔想成日食 Special K 呀   因為好熱氣 ~

放工去超市買無鹽牛油   President 太貴喇   所以買另一個牌字   但又有 President 個名喎   唔知係咪唔同地方生產呢   但價錢差一倍喎   President $36.9   我買嘅係 $16 (原價係 $17)   之後再望真啲個樣好熟面口   原來係我之前喺烘焙店買嘅一樣   咁我都放心啲   所以買咗 3 Pack 番屋企   我其實依家仲諗住唔好買咁多醬料   但無又唔得喎   因為我調味唔掂嘛   落咗醬料真係好味啲囉 ~  

番到屋企好鬼餓呀   又食咗包媽咪麵   之後搞掂哂所有嘢   再開機洗衫    再問家姐食唔食脆米通棉花糖   佢話食我先整比佢呢   第一次失敗咗   好在買平牛油   唔係會好心痛囉   第二次相信自己嘅做法   所以成功咗喇   好開心呀 ~

里奧大人又未放工   所以我見有時間就熨衫   之後再預備晚餐 ~  

是日懶餐 - 馬拉盞炒肉豆豬肉片

馬拉盞炒肉豆豬肉片 - 本來就咁炒豬肉   但覺得真係好單調囉   所以頭先買咗樽馬拉盞做調味   估唔到又幾好味喎   咁第時炒菜唔駛成日蒜蓉咁悶呢 ~ 

家姐 8 點幾去到我屋企   我即比啲脆米通佢試   佢話好味喎   之後比哂佢拎番公司請同事食喇 ~

里奧大人差唔多 9 點先番到嚟   不過我都掛住焗嘢無睇時間   佢平時差唔多到屋企附近會打比我家嘛   今晚又唔打   所以佢番嚟先煮個蝦子麵比佢食囉 ~

自家製棉花糖脆米通 ( 7-NOV-2011 )

呢期真係超勁想焗嘢呀   同埋超勁想清嘢呀   呢幾次焗嘅材料都係差一星期就過期   所以好迫切呢 ~

今次係跟頭條日報食譜整   Mani 教嘅   我覺得超易   同埋食材易買到   所以想整好耐   不過今晚先有行動囉 ~

跟食譜係失敗咗   好在買平價牛油   唔係真係心痛到爆囉 ~ 

製作過程超簡單   所以好快搞掂   一路焗一路聞到焦糖味   勁有爆谷 Feel 呀 ~

咁大 Pat 嘢   咁當然又係叫家姐拎比同事食啦   佢話好食喎   之後又問我一 Pat 嘢咁點比同事食   用手拻嚟食整到隻手黐立立   我話食譜無教點食㗎噃   之後我就拎張牛油紙出嚟   分開一粒粒包起佢   當堂易食好多啦   蝕埋張牛油紙添 ~

我叫家姐番屋企雪凍去   咁應該可能又唔同口感呢 ~   

肉絲炒麵 + 雲芝茶樹菇豬骨湯 ( 6-NOV-2011 )

( 6-NOV-2011  SUN )

今朝食完早餐就番教會   越近又越遲番去   因為覺得近   唔會有阻滯咁囉 ~

媚媚又番教會   但崇拜完畢就各自走喇   我哋唔餓嘛   之後同埋里奧大人一齊去街市買餸就番屋企喇 ~

Hea 到 2 點幾就去麥記食嘢   唔知點解間唔中就好想食麥記   但食完一餐之後就會話呢排唔會再食麥記   不過依家份量都少咗啦   都唔會好似以前咁飽 ~

番到屋企煲湯   做下家務就睇電視   7 點開始就煮晚餐喇 ~

是日懶餐 - 肉絲炒麵 + 雲芝茶樹菇豬骨湯

肉絲炒麵 - 又係用煲湯啲豬肉切絲嚟整炒麵   唔好浪費嘛 ~

雲芝茶樹菇豬骨湯 - 湯包嚟咋   有強化免疫系統 護肝腎 消炎利尿功效   但要加紅蘿蔔同粟米先好飲   今次買鮑魚骨嚟煲   因為有肉食   同埋無咁油咁呢 ~  

南記粉麵 @ 銅鑼灣 ( 5-NOV-2011 )

豬腩肉小鍋米線 + 春卷 - 中辣

( 5-NOV-2011  SAT )

今朝幫菇場 Shopping 完就去食早餐   爽呀 ~

番到菇場又多嘢做喎   所以好快就到 1 點放工呢 ~

放工即番屋企   因為家姐睇完中醫就嚟我屋企坐   我哋傾到差唔多 2 點幾先食 Lunch   突然好想食車仔麵   家姐第一個贊成 ~

煎釀三寶 - 尖椒 / 豆腐 / 魚蛋 + 3 條腸粉 ($7)

我的蘿蔔 / 豬紅粗麵 - 一定要落辣汁   因為個湯係無味

家姐的豬腸 / 豬皮粗麵 - 家姐要多辣汁   同埋我同佢多數 Share 餸食   里奧大人唔食呢啲餸㗎

里奧大人的牛丸 / 生菜米線 - 里奧大人食完就話好辣好辣   家姐笑笑口串佢話: 你碗叫辣   我碗叫咩呀   你碗湯最淺色   唔想食啲米線就話辣做藉口   咁又係喎   佢嗰碗真係好淺色囉   咩都話辣   但又要跟人食辣

食完再一齊睇波鞋   大家買同一樣款   風褸又同一樣款   里奧大人話送比我哋喎   我都唔會客氣嘅   之後同家姐講   如果上我屋企要講聲先   唔係會撈亂呢 ~

買完就番屋企 Hea 陣   出面好熱呀   所以差唔多 4 點半先出發去銅鑼灣   家姐就番屋企喇 ~

去完女人街買嘢   居然見到之前喺葵涌廣場買嘅披肩   仲平幾蚊   所以我又買 4 條   2 條比家姐   1 條比媽咪   1  條比自己 ~

買完再去 Sogo 睇嘢   諗住去 Thermos 買保溫杯   點知個 Sales 態度不知所謂   咁我視線咁啱望住佢個名牌   佢好驚咁即刻擰轉身   驚比人投訴就客人禮貌啲啦   不過好奇怪   好多店員都打喊露   起碼有 3 個   有 2 個仲係吖大個口   同埋發出 "吖" 一聲   所以我都忍唔住望佢一眼 ~

之後我買背囊   個 Sales 好好人   因為里奧大人成日問我係咪用   用先好買   我話會用   然後又問係咪真係用   之前買咗個都無用   咁個 Sales 就話如果啱先買啦   最後決定我都買咗   咁個 Sales 比個袋我嘅時候   好強調話唔啱可以換其他嘢   我覺得佢好搞笑囉   因為好多 Sales 只會叫妳買   妳諗嘅時候就會話買啦買啦咁囉 ~

買完嘢就去南記喇   依家多咗好多印傭嚟食   所以好多時都要等位   今次又係食小鍋米線   米線份量又少咗   咁啱我又唔想食咁多米線呢 ~

食完就搭巴士番屋企   點知後面班大陸師奶同細路仔係咁講嘢   嘈到呢   以為架車得佢哋咁   其實佢哋真係唔知咁樣好影響人喎   不知所謂 ~

番到屋企飲湯   差啲唔記得上次喺媽咪屋企拎咗湯番嚟添   本來我去跑步   不過熨完兩機衫   個人都好攰囉   只想即沖涼睇電視   所以里奧大人就自己一個人跑喇 ~

酸忌廉焗薯蓉 ( 4-NOV-2011 )

( 4-NOV-2011  FRI )

Happy Friday 喇   今朝一心諗住食銀針粉   居然無喎   所以轉食腸粉   OK 唔錯啦   唔想成日食三文治咁悶嘛 ~

番到菇場做啲濕碎嘢咁啦   今朝食腸粉好飽   所以 1 點半先食 Special K   今次用豆漿   麻麻哋夾   不過算啦   買咗 5 支   點都要飲囉 ~

晏晝好忙啦   所以好快就放工咁   本來想去九龍城行下   但諗諗下又好似無咩嘢買   所以去鑽石山百佳廣場行   順便買薯仔番屋企做焗薯 ~

里奧大人喺大陸見客   又唔知幾時番   我又超勁餓喎   番到屋企即刻煲水整薯仔   之後就食豬肉乾同媽咪麵   脆卜卜嘅媽咪麵真係好好食   不過啲味精粉好鹹   但唔落哂又唔好味喎    一個鐘頭之後就再煮晚餐喇 ~

是日懶餐 - 酸忌廉焗薯蓉

酸忌廉焗薯蓉 - 為咗清埋星期一用剩嘅半盒酸忌廉   所以就用嚟焗薯蓉喇   咁我聞一聞盒酸忌廉有無變味   點知一聞就覺得好反胃呀   之後再將芝士   鮮奶同薯蓉搞勻   越搞越唔想食   但整咗就無計啦   照焗囉   不過最後都只係食咗半杯 ~

里奧大人又喺大陸食埋晚餐先番嚟   10 點先番到屋企   同佢傾咗一陣偈   之後一齊睇下電視   我依排都 11 點半先瞓   咁都好嘅   可以陪佢耐啲囉 ~

住家飯 @ 媽咪屋企 ( 3-NOV-2011 )

白灼蝦


陳果皮蒸泥猛

節瓜蝦米粉絲

炒菜心

翡翠螺

大閘蟹公

清補涼螺片豬骨湯

大樹菠蘿

( 3-NOV-2011  THU )

今朝諗住又食燒賣粉果   點知離遠見到老闆兩公婆行入去餐廳   咁我即轉場啦 ~

菇場忙咗一陣又等 Lunch  Time 喇   無啦啦好想食紅豆沙   所以叫 8 卦幫我順便買埋喇 ~

放工即走 lu   今晚番媽咪屋企食飯   今朝食唔到燒賣   所以好想食呀   去咗 7-11 買燒賣番媽咪屋企食   雖然啲燒賣唔好食   但啲豉油同辣椒油就好正囉 ~
 
坐到 8 點半就走人 lu   同埋家姐一齊去惠康買嘢   買咗 4 Pack 檸檬茶 + 2 支豆漿   家姐拎到手都震   好好笑   因為次次買好多嘢都係佢拎   其實我都可以拎   我會就住家嘛   如果係米我就一定唔會拎   咁拎 2 Pack 檸檬茶都無問題嘅 ~

叫家姐幫手清雪條   佢話順便睇埋電視   一番到屋企就見到里奧大人   我叫佢哋齊齊食雪條囉   佢今晚自己喺大陸食埋嘢先番屋企嘛   所以家姐話覺得佢好慘   一個人喺出面食嘢   佢自己唔會一個人喺出面食   情願唔食喎   之後里奧大人比埋佢食嘅刀削麵同豬肉餅嘅相我哋睇   家姐一睇就話 "自己影呢   就切開一半嚟影  同我哋食呢   就問影完未影完未"   呵呵   不過里奧大人基本上都等我影完先食嘅   除非佢好餓   同埋驚凍咗啲食物唔好食先催我呢 ~

家姐睇電視   里奧大人上網   我就熨衫   家姐 10 點半就走 lu   我就去沖涼喇 ~