醬爆牛仔骨 + 皮蛋酸薑 + 粟米蛋花湯 ( 10-JAN-2013 )

( 10-JAN-2013   THU )

今朝 7 點 45 分起身   叫里奧大人等多我一陣   咁就可以一齊出門口呢 ~

突然好肚餓呀   唔知係咪尋晚無飯落肚   因為食餸飲湯都超飽   根本食唔落飯   不過早餐都係食奶油脆脆豬   因為呢排朝早都食唔到咁多嘢呀 ~



番到菇場無耐就忙喇   加上今日飲埋最後一次中藥   好有解脫嘅感覺   超勁開心 ~   

係咁埋頭苦幹做嘢   真係好快就到 lunch time 呀 ~

又係食番茄汁意粉   d 同事見到又話我點解成日食意粉   一係螺絲粉   我話因為我次次都煮多好多   所以次次都食幾餐   我都食到驚呀   不過佢地話之後好快又會見到茄汁意粉   哈哈 ~

食完就去銀行幫媽咪入票   之後去萬寧買嘢   我覺得出面好熱咁呀   我已經慢慢行喇喎 ~

又忙喇   真係忙到放工未做完   不過要去旅行社報名   所以都準時走呢   搞掂哂都 6 點 20 分   之後即去超市買醬汁同洋蔥喇 ~  

番到屋企即預備晚餐   再開機洗衫同拖地   搞掂又要煮飯   煮完都已經 8 點喇   里奧大人啱啱放工   所以我自己食先 lu   等佢番黎就淥碗米粉比佢   因為我唔想食飯   無理由煲一個人嘅飯嘛 ~

是日懶餐 - 醬爆牛仔骨 + 皮蛋酸薑 + 粟米蛋花湯

醬爆牛仔骨 - 唔想成日整黑椒汁   所以特登去超市買現成醬爆牛仔骨嘅汁黎煮   無咁悶嘛   里奧大人食第一啖就話佢年紀大喇   我知咩事   Overcook 丫嘛   無計啦   我唔識煮嘢嘛   將就下啦 ~

皮蛋酸薑 - 皮蛋買咗成個星期   唔食就要掉   所以就整皮蛋酸薑   本來想煮金銀蛋菠菜架   但今晚好趕   都係簡單 d 好囉 ~

粟米蛋花湯 - 係時候要清咁 d   想快 d 清哂之前所買嘅嘢呀 ~

今晚里奧大人又係咁話飽飽飽   唔食咁多   我發脾氣話唔好成日話多   一係就話食唔哂呢樣果樣   雖然唔係咩複雜餸   但我放工番黎要煮   又做家務   煮埋比你食又依樣果樣   再咁真係唔煮   佢眼碌碌苦笑咁望住我呀   以為我講笑丫嘛   之後我即喺佢銀包拎 $200   話由依家開始   話唔食一樣餸就 $100   唔駛講咁多   好自為知 ~

搞掂哂再批個香梨比里奧大人食   我就即沖涼再熨衫   之後就真係抖喇   好耐無食薯片   終於忍唔住食喇   超級好味道   睇下電視又已經 11 點   睇埋聖經就要瞓喇 ~