瑤柱燜節瓜 + 沙爹鹹酸菜炒牛骨髓 + 肉鬆炒飯 ( 14-JAN-2013 )

( 14-JAN-2013  MON )

今朝里奧大人懶床到 7 點 35 分先起身   反而我又早咗 10 分鐘起身   所以即係等如一齊起身喇 ~

估唔到我要等番佢轉頭   陪佢買埋麵包   去到地鐵站都 8 點 15 分   不過我無咩所謂   因為我坐 van 仔   10 分鐘已經到菇場附近 lu ~

早餐食芝腿漢堡包   我話唔要牛油   但唔記得問佢會唔會烘熱個包   所以一拎出黎嘅時候   望到都 feel 到係凍包囉   最驚咁樣 ~



番到菇場忙咗陣又 hea 過 lu ~  

Lunch time 食 Flakes + 朱古力奶   一定要食埋去   因為 2 月到期   唔想掉呀 ~

無啦啦又忙   又要去埋隔離房執嘢   不過咁都好   好快放工   去完超市買嘢就番屋企喇   又係即開機洗衫   依家天氣乾燥   d 衫兩日就乾   幾咁好呀 ~

家姐今晚黎我屋企拎糖   媽咪咁啱又煮咗沙爹鹹酸菜炒牛骨髓比我試下   所以順便比埋我   佢差唔多 7 點就到   我都唔預備晚餐住喇   同佢傾下計   食下薯片   佢 7 點半走人喇   因為仲要番屋企食飯呢 ~

佢一走   我即入廚房打仗呀   搞掂到 8 點 lu   咁我即刻飲碗隔夜湯   再食埋湯渣   好在里奧大人 8 點半番到屋企   我可以陪佢一齊食餸   唔係我就食先呢 ~    

是日懶餐 - 瑤柱燜節瓜 + 沙爹鹹酸菜炒牛骨髓 + 肉鬆炒飯

瑤柱燜節瓜- 跟 "大師姐" 食譜   因為我想煮 d 瓜菜係有茨汁   同埋最緊要可以清咗盒清雞湯   過咗期 5 日喇   好在無壞 ~

沙爹鹹酸菜炒牛骨髓 - 我幾鍾意食鹹酸菜架   不過自己唔識整   所以今晚有鹹酸菜食好開心呀   估唔到里奧大人又鍾意   咁下次可以叫媽咪整多 d   我就可以整小一樣餸喇 ~

肉鬆炒飯 - 材料係食剩咗嘅鹹豬手同湯渣嘅豬展   用黎炒飯最好   加 d 肉鬆喺面   里奧大人可以食多 d   因為佢好鍾意食肉鬆   呢個策略萬試萬靈 ~ 

食完飯洗埋碗又 9 點喇   沖完涼再熨衫   之後就休息喇 ~