香辣蒜撈雞 + 菜心 ( 16-JAN-2013 )

( 16-JAN-2013  WED )

雖然着緊褸同毛毛 boots   但我覺得唔似真正嘅冬天   因為我成日覺得都係有 d 熱咁呢 ~

唔想成日飲拉茶咁甜   所以轉飲奶茶   都 ok 喎   好耐之前飲到驚   依家再飲番都係要慢慢接受番呢 ~

菇場忙咗陣又 hea 喇   唔錯唔錯 ~

今日有 lunch box   食番前晚嘅炒飯   同事經過又裝下我食咩   因為佢成日笑我整茄汁意粉   老闆聽到就話 : 人地老公唔 complain 咪得囉   嘩哈哈   其實里奧大人食隔夜嘢無問題架   不過我唔想比佢食   等佢食 d 新鮮嘢好 d 嘛 ~

食完出去行陣   去超市買 d 嘢就番菇場喇   我依家係買咗就會整   唔會拖到差唔多過期先整架   如果唔整住就唔會買   呢個心態對我黎講   真係好大嘅轉變呢 ~  

8 卦上咗大陸   但佢都會同我 msn   話驚我悶喎   之後我咪話佢自己悶就真啦   佢認呀   嘩哈   同佢傾食嘢   傾到大家都餓   4 點幾真係唔好傾食嘢   次次都會講到想食嘢架 ~

放工即走喇   行下萬寧就番屋企 lu ~

番到屋企都係 6 點   即開機洗衫   浸菜再熨衫   之後心血來潮不如蒸埋隻雞肶先   真係好在蒸咗家肶咋   里奧大人 7 點打黎話放工   因為公司無冷氣   焗到頭痛   要早 d 番屋企休息   到佢番到屋企   佢要等我一陣先食得呀 ~   

是日懶餐 - 香辣蒜撈雞 + 菜心

香辣蒜撈雞 - 跟 "頭條日報" 食譜整架   不過唔係跟足   因為我買漏咗花生同芫茜   今次我覺得自己好勁   因為識執生   原本要蒜蓉   但我懶得整   所以就用泰國米粉包蒜蓉   平時掉架   因為好多油   今次就用得着   幾咁好呀   咁影相覺得有 d 綠色靚 d   所以就拻碎塊菜心葉扮芫茜   當堂好睇 d 咁啦   里奧大人好搞笑   問我係咪買番黎   覺得唔似我煮呀   佢一食就問 d 汁係咪美極   因為佢最鍾意呢 ~

菜心 - 尋晚買定架   $7 / 斤銀川菜心   大大碌   都幾清甜   菜心正氣   所以成日想食   但我整得款式又唔多   來來去去都係淥同蒜蓉炒   好似好悶咁 ~  

第一次咁早一齊食完飯   洗埋碗   沖埋涼都係 8 點半   切埋生果一齊食   如果晚晚咁就好啦   咁代表里奧大人唔駛咁辛苦 ~

好眼瞓呀   10 點半睇完聖經就瞓喇 ~