雪菜火鴨絲燜米 + 羅宋湯 ( 5-JAN-2013 )

( 5-JAN-2013  SAT )

星期六喇   8 點起身都唔駛咁趕   因為無咩人要番工   咩都好暢順呢 ~

早餐食餐蛋治烘底   依家多數食烘底   無咁肥   其實我知食麵包好肥   但朝早真係無咩胃口   就算有   都唔會日日食米粉麵   我覺得咁樣仲肥呀 ~

菇場無嘢做   好在可以上網   唔係瞓着都似 ~

放工即走   去街市買埋餸   再去超市買菇場買嘢   之後叫里奧大人一齊去大家樂食 tea   時間啱啱好 ~

食完番屋企預備煲湯同晚餐   切呀切   浸呀浸   搞掂又執雪柜   大掃除可以做小一樣嘢喇   順便又執埋儲物柜   睇下有咩過期   之前想買粟米湯   點知原來收收埋埋咁多   好在執下柜啫 ~

依家決心執好 d 食譜   分類易搵好多   同埋順便拎起想煮嘅食譜   要的起心肝煮新菜式呀 ~

6 點開始煮嘢   7 點可以開飯喇 ~

是日晚餐 - 雪菜火鴨絲燜米 + 羅宋湯

雪菜火鴨絲燜米 - 1 棵雪菜 + $3 韭黃 + 1/4 隻鴨 + 1 包米粉   今次米粉都加咗老抽 生抽 糖調味   求其炒下就算 lu   但食落都係無咩味   里奧大人唔太鍾意食呢 d 幼身米粉   好在佢都食咗 2 碗   因為今次整多咗   仲有一大碟留番呢 ~  

羅宋湯 - 第 1 次煲架   買足材料   1 個紅蘿蔔 + 2 個薯仔 + 1 個椰菜 + 1 個洋蔥 + 半罐茄膏 + $40 豬骨   本來想就咁菜湯   不過媽咪話涼   話我咳就唔好咁飲   叫我買舊豬骨   煲時再加兩舊薑   咁就無咁涼喎   里奧大人話唔夠酸   但我覺得夠味喎 ~

搞掂哂所有嘢就沖涼   之後真係抖喇   里奧大人又做完公司嘢   所以一齊睇電視同食糕點   要快 d 食呀   唔想留咁耐   凍冰冰食糕點   食完仲更加凍  ~