韭菜豬肉餃子 + 土匪雞翼 + 菜心 ( 5-MAY-2013 )

家姐要辣椒豉油   我整咗 6 隻指天椒   家姐話勁辣呀   我蘸咗少少都覺得超辣   佢食唔哂啲指天椒   咁我倒啦   倒嘅時候啲辣味湧上嚟呀   即刻咳咗幾下   不過家姐話勁辣   咁對我嚟講係超級勁辣

( 5-MAY-2013  SUN )

因為家姐今朝會同媽咪飲茶   之後會車埋媽咪番屋企   所以我就約咗家姐   車媽咪番屋企之前打比我   比沙律同餃子比媽咪呢 ~

所以我就 9 點半起身先   包咗 16 隻餃子比媽咪   之後再沖涼   同里奧大人落去大快活食早餐   買埋早餐坐定定   我就拎沙律同餃子比媽咪喇 ~  

比完媽咪   我就上番去大快活食早餐喇 ~  

食完番屋企抖陣就番教會   咁 Ivy 即刻同我講   話想里奧大人幫佢 Load 歌   無問題啦   里奧大人實幫嘅 ~

崇拜完畢即番屋企 Load 歌喇   之後約埋 Ivy 一齊食 Tea   我都完全唔記得部電話係我哋陪佢哋買   買完再同佢哋 Load 歌   因為已經係 6 年前嘅事   我真係無哂印象呢 ~

食完各自歸家   番到屋企煲中藥   醃雞翼再包埋餃子   好攰呀 ~

家姐要我哋幫眼睇廚櫃同門嘅顏色   所以黎我屋企食飯呀   7 點嚟度坐陣就開餐啦 ~  

是日晚餐 - 韭菜豬肉餃子 + 土匪雞翼 + 菜心

韭菜豬肉餃子 - 今次大鑊啦   買咗 $12 餃子皮   原來可以包好多隻   我估包咗 60 隻左右   有排食呀   家姐話啲皮比較滯   不過鍾意啲口感   而里奧大人不嬲都鍾意雲吞皮多啲   因為無咁滯   但我實在唔鍾意雲吞皮   所以最後都係買餃子皮喇   自作自受  ~ 

土匪雞翼 - 家姐同里奧大人話雞翼無味   即係唔夠底味   得個皮有啲味 ~

菜心 - 抵食呀   食咗 2 餐 ~

差唔多 8 點幾食完就陪佢睇顏色   最搞笑係我咩都話唔好   之後我都忍唔住笑   關我咩事   佢鍾意就得啦   哈哈哈哈 ~

家姐 9 點幾走   佢着鞋嘅時候   我就喺廚房整嘢   聽到家姐用哀求嘅語氣同里奧大人講   聽晚記住幫阿妹食啲餃子   如果一個人食哂好慘呀   記得幫佢食呀   里奧大人話放心啦   實迫佢食㗎喎   無可能唔食呢 ~