於是果晚之後 我地個個即做嘢啦 ~
CC 好怕熱 話唔去緬甸 咁無問題 我都覺得貴呀 ~
好喇 到越南啦 上哂網搵資料 又去埋旅行社拎資料 CC 都有咁做架 咁樣可以一齊喺電話傾 不過最後 CC 話熱 因為越南起碼 38 度 又話唔去越南喇 但其實越南都仲係好貴 5 日 4 夜晚機早返 連埋簽証都要接近 $8000 之前又話淡季 $3xxx 呃人 ~
umm 咁目標清晰啦 一定係台中架喇 因為清境好靚嘛 好喇 日子都揀好架喇 5 月 9 日 or 12 日出發 因為避開五一勞動節 點知 CC 又話 12 號係母親節 要同媽咪正日食飯 @.@ 佢地慣咗正日喎 所以唔同我地去喇 ~
就係咁 里奧大人話唔等喇 因為佢同上司分別都想喺 5 月請假 佢上司好好啦 叫里奧大人揀先 咁都唔好拖住人嘛 咁我地最後決定 5 月 12 日出發去台中喇 ~
其實如果自由行都好煩 我買咗 2 本台中書 如果要去台中 清境同日月潭 要 book 3 間唔同酒店 唔似台北咁方便 里奧大人驚我 plan 唔掂呀 而我 plan 嘅時候真係好頭痛 因為初初諗住同埋 CC 兩公婆去嘛 好多嘢都要諗埋佢地 唔似得我同里奧大人兩個去咁簡單 雖則坐高鐵係快 但要計到 d 時間好準 因為 miss 咗一班車 可能又要等 1 個鐘 所以就算真係去 大家共識都係話跟團好 d 我有種如釋重負嘅感覺 ~
去到台中 天陰陰架 個心當然有 d 唔開心啦 因為里奧大人想用新機影相嘛 不過里奧大人話落雨又唔同 feel 呢點我都好認同 今次影下落雨 feel 夠詩意呀 ~
陰天
晴天
台中比我感覺好舒服 無台北咁多人 但如果無強國人就更好 有佢地到過嘅地方真係特別嘈 特別污糟 好得人驚 ~
跟團好處係坐車唔駛煩 一落車就到景點 一落車就係到餐廳 其實我最鍾意係導遊會介紹所有地方嘅特色同由來 真係識唔小嘢架 最最最感恩係我地個導遊又超級爆笑 無悶場架 佢講嘢我無瞓架 佢叫我地休息我先瞓架 之後同佢道別 佢好多謝我喎 R 哂頭 佢話我係佢忠實 fans 全團得我一個無瞓 好留心聽佢講嘢 oh 唔怪得啦 我個頭俟左俟右都會見到佢望住我 真係想瞓都唔得啦 哈 ~
今次導遊爆笑好玩之外 團友又夠互動 我地食飯係 10 人一枱 我真係講明話唔好意思 我要影食物相做記錄 點知我一影 個個團友都一齊影 勁開心呀 一齊影一齊食一齊傾 好快就食完一餐飯咁呀 ~
第一次住民宿 感覺好 raw 唔駛開冷氣都覺凍 凍得黎好舒服 正到不得了 同埋第一次咁近見到雲海 好震撼 影完唔夠 5 分鐘就無 之後行下呢 又見到雲海 太好喇 如果唔係要去食飯 我唔捨得走添呀 我超勁鍾意睇雲嘛 喺香港陽光普照天氣都叫做易 d 見到 但眼前一大片雲海 仲要喺自己腳下喎 真係無咩機會見 因為我唔會咁早起身 同埋我好驚行山 ~
雲海 @ 清境
今次我最期待係清境農場 親親錦羊嘛 不過去到清境農場果日 都係有 d 雨同埋好大霧 感恩落一陣細雨就停 之後企喺草原 睇住 d 綿羊喺霧中走埋黎 我真係覺得好得意 感覺似真又似假 呢一刻我開始鍾意台中大霧嘅天氣呢 令整個畫面都好有詩意 哈哈 ~
@ 清境農場
食物方面 我最開心係食到鹽酥菇呀 不過最有驚喜嘅係團體餐 真係餐餐食到飽 我餐餐食 2 碗飯呀 因為 d 飯好似珍珠米 依稀記得 d 米好似叫蓬萊米 我第一次覺得跟團 d 餸同飯係咁好食呢 妳知啦 跟團唔好有任何要求同期望 就唔會失望 反而有更大驚喜呢 ~
鹽酥菇
山地風味餐
總括黎講 雖然今次去台中天氣唔係太好 但導遊同團友都好玩得 真係好難得架 同埋都好感恩 大霧落雨同陽光普照都見到 我自己求其影影咗千幾張相咋 里奧大人就影咗 6GB 勁呀 ~
團費 : $2099.00 x 2
機場稅 : $238.00 x 2
代收機票徵費服務費 : $40.00 x 2
燃油附加費 : $428.00 x 2
保險 : $84.00 x 2
沒有留言:
發佈留言