咖哩脆肉瓜炒黑椒牛丸 + 香蔥龍蝦丸炒飯 ( 7-MAY-2013 )

( 7-MAY-2013  TUE )

呢排又瞓得唔係咁好   唔知點解   如果有晚瞓得好好   就等如幾晚瞓得唔好   咁都唔知瞓得好   係好定唔好   oh no ~

早餐食芝腿治烘底   但我鍾意 d 多士要燶 d 呢 ~

菇場超級超級超級靜   係前所未有嘅咁靜   我又眼瞓   真係唔敢 me 埋雙眼   唔係瞓着到似 ~

出去食魚皮餃米   之後行陣同埋去銀行入票   再待埋 8 卦去萬寧買香口膠   咁我買咗 2 盒麥提莎   一盒拎番屋企   一盒比家姐   佢 3 點幾問我有無嘢食   我話無   因為我真係無諗過放喺菇場食囉   條友真係非常非常之 cheap   見我買咗嘢就問我攞   之前見我張枱有筒薄荷糖   又無啦啦問我有無糖食   係咪咁啱呀   真係好日唔問架喎   咁我比粒佢食啦   佢再食我會串佢架   要食自己買嘛   咁樣痴法妳都慳唔小   果次食哂我差唔多成包香口膠   之後話買番比我   佢好耐之後買咗包大嘅   問我有無食剩嘅香口膠袋   分一半比我喎   我話無   佢又不了了之   不過我都唔會提佢買番比我嘅   呢單嘢之後   佢一問我拎嘢食   我就好鬼憎佢   我同里奧大人講香口膠呢單嘢   佢話比一包大嘅我都無問題啦   咁鬼計較   其實 8 卦個人係好   會好幫人   唔牽涉到錢嘅話   但佢個人實在太 "度"   佢女友仍都一樣   所以我覺得佢地真係天生一對 ~ 

真係豬   做咩咁激氣喎   搞到自己無啦啦個肚又赤赤痛   所以放工即走啦   今次堅持去埋街市買餸   唔想太多藉口唔買餸煮飯呀   真係邪   居然無一份份嘅蝦   咁轉買其他啦   買咗 6 粒黑椒牛丸同 7 粒龍蝦丸   咁都 $21   仲貴過蝦 $1   雪藏嘢咋噃 ~

痛痛痛   所以唔鬼理佢痛呀   番到屋企即入廚房切切切   浸浸浸   再煲埋中藥   之後再拖地   抖陣就煮飯喇   今晚自己食先   因為想快 d 沖涼呀 ~ 

是日晚餐 - 咖哩脆肉瓜炒黑椒牛丸 + 香蔥龍蝦丸炒飯

咖哩脆肉瓜炒黑椒牛丸 - 諗住用蝦黎炒脆肉瓜家嘛   不過算啦   黑椒牛丸都好好食   我仲將前日剩嘅韭菜墊底   唔好嘥呀 ~

香蔥龍蝦丸炒飯 - 又係諗住用蝦黎炒飯   但唔想買 d 細蝦仔   因為有排拆肉   所以最後買龍蝦丸   等個飯有 d 口感   同埋加咗 $2 蔥   夠哂香   不過今次無咁乾身   唔係更加好味道 ~

里奧大人 8 點幾先放工   佢食完又做公司嘢   咁我幫佢洗嘢啦   之後我食埋沙律   睇下電視   11 點即瞓呀 ~