叉燒炒麵 + 唐生菜 + 炸魚皮 ( 外賣 ) ( 26-JUN-2013 )

( 26-JUN-2013  WED )

今朝坐 van 仔   坐喺司機位後面   司機用藍牙教對方點樣 download 歌   上車已經開始教架喇   之後差唔多到總站前   聽到司機好尷尬話依家好多客喺度   唔方便講   之後我聽到佢教對方搵 "成人網"   之後話今晚再打比佢再講   所以我成日覺得用藍牙傾計   係所有人都聽到   不過揸車就無計啦 ~

早餐食米粉餐   食完有 d 熱添 ~

菇場靜   不過依家好好多啦   可以同隔離同事傾計 ~

Lunch 要出去行下   難得好天氣嘛   本來想食炸魚皮同魚蛋米   不過間舖頭休息   所以去食粥啦   里奧大人聽見我話食粥   佢覺得好難以想像   咁熱食粥   同埋我係一個怕熱嘅人添   但其實粥舖嘅冷氣好夠   食完碗粥都唔會覺得熱架噃 ~

食完就去入票   再行一陣就番菇場喇 ~  

今日 d 時間都過得幾快咁   放工去街市買麵餅   再去太興買叉燒就番屋企 lu ~

番到屋企即浸菜   差唔多 6 點半開始煮   7 點前已經煮好   我自己食先   因為我要去散步呀 ~

是日懶餐 - 叉燒炒麵 + 唐生菜 + 炸魚皮 ( 外賣 )

叉燒炒麵 - 今次個麵餅同之前有 d 唔同   但都係同一間舖買同一個全蛋麵餅   但有時麵質係完全唔同   好奇怪   不過今次我買一個麵餅   同埋特登唔煮咁林   我真係好怕食林嘢   口感好怪   好在里奧大人都接受到今次嘅口感   不過佢話食完好口渴   唔知係因為叉燒鹹   定係 d 麵鹹呢 ~  

唐生菜 - $7 斤   估唔到有 3 棵咁多   真係好抵食 ~    

炸魚皮 ( 外賣 ) - 今日食唔到   所以一定要買到黎食   唔係成日會籮籮攣想食呢 ~

8 點開始出去散步   里奧大人就啱啱放工   本來諗住等埋佢一齊番屋企   不過我行咗 6 個圈   都有半個鐘架   見有 d 攰   所以都係番屋企等佢算喇 ~