( 12-JUN-2013 WED )
今日係端午節假期 又有放假 實在太好喇 ~
里奧大人今朝 8 點幾起咗身 不過我就瞓到 10 點 但係咁發夢 唉 ~
梳洗之後就去大快活食早餐 食完就番屋企 lu 里奧大人做公司嘢 我煲埋中藥就專心睇飲食男女喇 ~
2 點半去食 tea 今日試新嘢 不過呢間食店好鬼凍 但又唔可以叫佢地開細 d 因為如果開細 d 近門口位係好焗 所以食完出黎 我同里奧大人隻手係凍冰冰呢 ~
蜂巢芋角酥
潮州粉果
魚肚滑雞扎
什菌上素鮮竹卷
香茜牛肉腸
流沙奶皇包
冰花脆糖蛋散
里奧大人番到屋企就瞓覺 而我今日就勁有 mood 開焗爐嘢呀 同埋想清哂 d 朱古力 但如果就咁焗 Brownies 咁會剩番好多牛油 已經係用細罐 所以要焗埋曲奇 清哂 d 牛油 不過我焗完 Brownies 之後再預備曲奇材料 整好放入雪柜 留番今晚先焗 ~
今次又失敗 好硬呀 但有 d 又有蛋糕口感喎 跟足食譜架啦 唔通用錯焗盤 所有 d Brownies 太薄 無哂口感 ?! 我真係好怕焗嘢 唔通真係要比錢上堂學 ?!
焗完到差唔多 5 點 又要準備晚餐喇 忙過番工 ~
是日晚餐 - 手撕雞 + 美心裹蒸糭 + 生菜
手撕雞 - 今次用雞肶 蒸完再用光波爐 雞皮脆卜卜好正呀 配埋醬汁 超好味 最緊要夠簡單 下次可以再整 ~
美心裹蒸糭 - 家姐比架 蒸咗 40 分鐘先全隻熱哂 不過真係好巨 同里奧大人 share 食都食唔哂 要做 lunch box 我覺得美心麻麻地 d 糯米唔煙韌 同埋 d 豬肉超級鞋 真係得個巨字 無咩特別 ~
生菜 - 今次唔腐乳喇 點雞嘅醬汁 一樣好味道 不過其實就咁食生菜都好好食 清清地嘛 ~
食完洗哂碗又開始焗曲奇 好有心機用花花模印曲奇架 不過貪心得滯 一次過焗得太多 所以變哂形 里奧大人仲以為我特登焗到咁添 之後試味 都 ok 啦 不過里奧大人話唔鍾意杏仁味 衰得佢試完半塊即刻話反胃 係咪咁快有反應呀 衰 好在我有家姐幫我清咋 唔係應該掉嘅多 因為我對曲奇同蛋糕真係無咩興趣 其實家姐真係超級慘 成日迫佢食我焗嘅嘢 ~
沒有留言:
發佈留言