咖哩雞扒 + 西蘭花 ( 2-JUN-2013 )

( 2-JUN-2013  SUN )

9 點 45 分起咗身   梳洗之後就去食早餐 lu ~

食完早餐番屋企抖陣   沖埋涼就出發番崇拜喇 ~

今次聽道真係有得着呀   如果當一個人有憂愁嘅時候   好多人都會講 "祝福妳 願妳平安" 之類嘅屬靈說話   但其實咁樣係唔得   係人都識講   其實呢 d 說話係忽略自己責任   知行善而不行善便是罪呢 ~   

同埋我唔想自己係虛假嘅信心   即係妳認同人地嘅做法   但當要自己做嘅時候就退縮   我要真實嘅信心   所有人都可以因信稱義   而有生命者必然會有活動   即係信心會引發行為 ( 生活嘅改變 )   神給我每日厚厚嘅恩典   所以我要將神比我嘅祝福黎祝福所有嘅人呢 ~  

崇拜完畢去日本城買吸濕包   依家遇到啱嘅嘢真係會買定多 d   因為下次買就會加咗價   加一蚊五毫都算架喇   但一加就加二至三蚊喎   真係好過份囉 ~

之後去買花   順便叫里奧大人陪我去百佳買菜   點知比佢發現 Stella 啤酒買三送一   咁佢又買 12 支   不過要佢番屋企拎環保袋先可以買   唔係無手拎   真係唔拎環保袋反而有嘢買   邪呀 ~

2 點半去美心快餐食嘢   以前美心快餐好食架   依家真係差咗好多囉 ~

番到屋企抖陣就煲中藥   之後再飲湯   預備埋晚餐就搞掂哂   可以睇下電視喇 ~

是日懶餐 - 咖哩雞扒 + 西蘭花

咖哩雞扒 - 今次真係臨時臨急先諗煮咖哩咋   所以懶到薯仔紅蘿蔔都唔買   就咁加 2 條雞肉腸就算喇   最緊要係清埋罐咖哩醬   因為 expiry date 係 5 月 28 日   所以食埋去啦   咁煮嘅時候用中火   之後掛住同里奧大人揀相   再入廚房見到煲咖哩無哂汁呀   差 d 燶添呀   之後唯有加水   再加 d 利川咖哩醬啦   唔係無味都似   唉 ~

西蘭花 - 百佳買架   $3.9/個   細細個咋   買咗 3 個 ~

今晚早食飯   所以可以早 d 休息   我好鍾意睇飲食節目   里奧大人話我睇飲食節目係睇到好入神   但我今晚睇咗 "MAY 姐有請" 唔夠 10 秒   我即轉台   真係好怕 d 人係又笑唔係又笑   自己鍾意食雞又笑   見妳鍾意食雞都會笑   我真係唔知有咩好笑囉 ~

11 點就瞓覺   星期日就真係要早 d 瞓架喇 ~