蒸鯪魚球 + 蒜蓉豆豉炒青豆角 + 蒜芹炒米粉 ( 27-JUN-2013 )

( 27-JUN-2013  THU )

雖然有太陽   但又見到鳥雲   真係唔想帶縮骨遮都唔得   同埋好邪架   唔帶就落雨   帶咗就唔落雨咁囉 ~

早餐食奄列餐   真係幾好味   我鍾意呢間茶餐廳真材實料   唔會求求其其咁呢 ~

番到菇場   隔離同事同我講話做埋聽日   因為佢係 part time 嘅   間唔中都會抖一個星期   但今次真係唔做喇   話爸爸身體唔係咁好   所以想多 d 時間照顧佢   好孝順呀   我就慘 d 啦   又無咗個啱傾嘅同事 ~

今朝好飽   所以 1 點先食個丹麥奶油酥   終於覺得食到有 d 驚喇 ~ 

放工去街市買餸   好似好耐無試過連煮 4 日   勁想唔煮   不過我又覺得自己好衰啦   又無咩唔舒服   無理由又唔煮家嘛 ~

番到屋企即預備晚餐   再開機洗衫   抖咗半個鐘就開始煮喇 ~

我自己食先喇   因為里奧大人成 8 點幾先放工   我唔想 9 點先食飯囉 ~

是日晚餐 - 蒸鯪魚球 + 蒜蓉豆豉炒青豆角 + 蒜芹炒米粉

蒸鯪魚球 - 想整好耐架喇   買咗半斤鯪魚肉   今次加埋蝦米黎釀   學人用豆角綑住   不過我無咩心機整   因為我好餓   想快 d 整快 d 食   哈 ~

蒜蓉豆豉炒青豆角 - $5 有 2 扎   但 1 扎就要 $4   咁我當然買 $5 啦   因為之前成 $20 斤架   我依家用 $5 買到 $20 嘅嘢喎   係咪好抵先 ~

蒜芹炒米粉 - 芹菜可以補血   所以買咗 $ 9 蒜芹炒米粉   今次煮 1 個米粉   估唔到原來係夠 2 個人食   實在太好喇 ~

里奧大人差唔多 9 點番到屋企   我今晚有 d 攰都唔出去散步喇   休息下好過呢 ~

( 青 BB 晚餐   里奧大人食剩半碗豆角   話好油   咁其實真係好油   因為我自己都覺今次好油呢 @@   鯪魚球食剩 1 粒   呢下我衰啦   因為唔想影出黎白雪雪   所以落豉油   但一倒就倒咗好多出黎   唉   所以真係好鹹 @@   米粉最正常  但又剩番 1/3   好煩啦   我成日話架   你食嘅嘢全部係熱辣辣   我就次次洗埋碗先食   出黎食已經唔熱   我又要分開裝比你   又要洗多 3 個兜   仲要成日依樣果樣   又食唔哂   真係好煩 )