Green Monday 蕃茄什豆扁意粉 ( 10-JUN-2013 )

( 10-JUN-2013  MON )

尋晚半夜條腰好痛呀   唔知係咪又按摩又扭腰又 sit up 激得滯呢   好在後尾都瞓到咋   唔係就慘咯 ~

沖完涼都覺攰   咁今日都應該係好攰架喇 ~

天氣又好焗熱喇   企喺度等車都流汗呀 ~

今日 Green Monday   所以早餐食芝蛋治烘底   要飽 d ~

真係飲咗咖啡都好眼瞓   晏晝真係要出去行下喇   食白粥 + 炸兩   里奧大人同 8 卦一聽見我話食白粥   佢就覺得我好勁   因為咁熱走去食粥   但其實如果慢慢食   真係唔係太熱囉   同埋粥店冷氣都夠   真係唔熱架噃 ~

( whatsapp 比家姐睇   我話我 Green Monday   所以食白粥 + 炸兩   家姐即問同事   油炸鬼係齋黎咩 ?!   我話油炸鬼係麵粉黎之嘛   好在我唔係食牛脷酥啫   唔係真係以為我食牛脷呀 @.@ )  

食完行陣   去咗超市買 2 pack 上海麵就番菇場開工 lu ~

woo   終於等到放工   去完牛頭角拎藥   再去街市買菜同豬肉就番屋企喇 ~ 

里奧大人話生痱滋   所以我煲菊花茶比佢啦   再醃肉同埋浸 d 什豆   之後家姐打黎   問我食咗隻糭未   之後傾下傾下   傾咗 40 分鐘   其實我今晚諗住快 d 煮快 d 食 快 d 沖涼   諗住 7 點半前搞掂   點知 7 點 15 分先開始煮   煮到差唔多 8 點   好在我自己食先   唔係又要等等等 ~  

是日懶餐 - 蕃茄什豆扁意粉

蕃茄什豆扁意粉 - 就咁蕃茄醬 + 什豆咋   我覺得清清地唔錯   唔駛醃肉   整蒜蓉乾蔥蓉同炒   真係慳番好多時間架 ~  

里奧大人番到屋企 9 點幾喇   雖然我今日 Green Monday   但我都分開煮肉醬意粉比里奧大人   佢口話食清 d 無問題   但其實佢根本鍾意食濃味嘢   蕃茄什豆無咩味   更何況我煮   更加無味   所以費事佢咁慘   煮 d 肉碎比佢吊吊味啦 ~


佢食完要做公司嘢喇   我幫佢洗埋碗   睇咗陣雜誌   10 點半就瞓喇   真係好眼瞓呢 ~