煎鯧魚 + 蒜頭豆豉炒皇帝菜 ( 21-NOV-2014 )

( 21-NOV-2014  FRI )

今朝 8 點醒咗   咁去開機洗衫啦   之後再瞓都瞓唔到 lu   不過就懶床到 9 點先起身 ~

去麥記食熱香餅   好耐無食喇   但 3 塊真係好多   可能我落埋糖漿   所以比較漏 d 啦 ~

食食下聽到 d 阿婆講嘢   話食完早餐就去百佳   晏晝就去嘉豪飲茶   同我行程一樣   嘩哈 ~

去到百佳   突然聽到豬肉檔阿姐好大聲講嘢   因為我距離豬肉檔都有 20 尺嘛   佢叫個人唔好用手拎住嚿豬肉比佢磅   有膠袋家嘛   嘩   我覺得駛唔駛咁驚無得買呀   仲有喎   佢都唔知有無逐嚿揀   嚿嚿掂過哂仲駛要嘅   太自私喇   同埋我覺得好嘔心啦   拎完生豬肉又無得洗手   點得架   我次次喺屋企用手掂過 d 生嘅食物   都洗幾次手架   好驚隻手有陣味架 ~       

番到屋企即沖涼   之後抖陣   11 點幾出門口喇 ~

媽咪又係買完餸先到   飲到 2 點   送埋佢地坐車就去行下先   因為勁飽 ~   

鮮蝦菜苗餃

鮮竹牛肉球 - 唔好食   好實

醬皇金錢肚

鹹蛋燒腩雞飯   估唔到 d 燒腩唔錯噃

桂花紅豆糕

去馬莎買朱古力比媽咪   之後再去 MP 行下   去埋莎莎買 Mascara    最後去百佳買埋牛展就番屋企喇   有 d 攰喇   哈 ~

番到屋企都 3 點半   飲埋碗肉汁就抖陣   之後熨衫   全日口手腳都無停過   攰過番工 ~

媽咪特登蒸埋比我食架   我其實都想食糯米粟好耐   不過我知勁飽肚囉   所以無買過黎食呢   今次終於食到喇   口感煙煙韌韌幾得意   同埋真係好飽肚囉   

6 點半煮飯   今晚自己食先喇   食完就沖涼抖喇 ~

是日晚餐 - 煎鯧魚 + 蒜頭豆豉炒皇帝菜

煎鯧魚 - 媽咪買架   佢話呢度都要百幾蚊   我覺得好貴囉   不過媽咪話新鮮係咁上下價錢   我就唔識喇   我好小買黎食   今次勁喇   晏晝已經擺好 d 生粉罐出黎   因為好實在太耐無煎魚   唔記得落生粉就嘥料架喇   所以今次都煎到脆皮   再蘸沙律醬   好好味呀 ~      

蒜頭豆豉炒皇帝菜 - 媽咪買架   佢記得我鍾意食皇帝菜   我一話鍾意就會買比我   我已經話牛頭角咩都有   佢係都要買   真係好錫我啦   嘻嘻 ~

里奧大人 8 點半放工   等埋佢食完   再沖埋涼先一齊睇電視 ~  

好攰呀   睇完新聞即瞓喇   好在都係 11 點幾   呵 ~