丸龜製麵讚岐烏冬專門店 @ 九龍灣 ( 8-MAY-2016 )

炸蝦餅 / 炸野菜餅

椒鹽魷魚鬆 / 胡麻雞柳 

醬油烏冬 (大)  熱 & 冷

( 8-MAY-2016  SUN )

今朝瞓到 7 點半就醒咗去洗手間   之後瞓到 10 點半都醒   里奧大人話咁起身 lu ~

食埋早餐   經過 CSL Roadshow   所以里奧大人都順便轉台   搞掂哂都 12 點半喇   我要去街市買料煲湯呢 ~

番到屋企又已經 1 點半   唉   依家啲錢唔見駛   真係要去格價先買嘢   所以用多咗時間呀 ~

里奧大人幫手搞緊 Fat Fat 啲嘢   咁我有啲嘢要問阿 mi 同阿喂   其實我唔鍾意開 Speaker 講嘢   因為好無禮貌咁   但我呢排對所有嘢都好難上心   所以如果里奧大人喺度   我會叫佢一齊聽埋   唔係我真係完全好似無聽過咁㗎   但聽聽下都忍唔住走去喊   所以最後都係里奧大人 Mark 哂資料   好感激阿 mi 同阿喂幫手   我哋就知點樣做 ~

喊完   冷靜完就熨衫   搞掂哂都差唔多 3 點   出去食嘢   諗住食完去德福   用埋張 Cash Coupon   之後里奧大人問美心快餐用唔用到 ?!   我話好似用到   所以去美心   感恩真係用到   唔駛再心掛掛 lu ~

之後教友打嚟問媽咪情況   其實里奧大人好驚有人問我媽咪情況   因為知我實會喊   佢都盡量唔會提   就算佢講媽咪守夜資料   佢都用私人 Whatsapp   唔會喺 Group 度講   知我一睇實喊   今朝姑奶打比佢   佢又行出去講   頭先佢喺書房講電話   佢用手接住細細聲講電話  之後聽到佢話有咩唔好喺 Group 度講   同埋尋晚晴晴 Daddy 打比佢   佢又係出去講   又唔會講乜事   我知里奧大人唔想比我聽到   咁其實我都知係咩㗎喇   依家好多人都打比佢   問侯下我   知我情緒不嬲都唔係咁好   驚我有事   盡量唔會直接搵我   其實我知好多人關心我   所以我都叫里奧大人代我講聲多謝關心   我實在唔想見任何人呀 ~      

食完就再喺德福行下   睇下有無黑鞋   都係搵唔到   之後番到淘大   佢話去睇下嘛   感恩喺 Boutique 買到對黑鞋   仲要係好舒服好平呢 ~

番到屋企就執夏天衫出嚟   里奧大人問我做咩拎咗出嚟又唔執 ?!   我話突然好攰   抖陣先執 ~

我同里奧大人講   啲人成日話回憶係美好   我話回憶係最痛苦先真呀   佢話呢一刻離別係最傷痛   之後再諗番起以前   都係開心嘅   我話我可能要用 20 年時間   先可以無咁傷心囉 ~    

之後收到晴晴 Whatsapp   第一句見到 Happy Mother's Day   我即刻話點解晴晴 Send 呢啲比我㗎   嗚嗚   咁再繼續睇   原來係好有意思 ~

第一句就寫 You are just like my second mum to me   真係好冧呀   寫完一大段嘢   到最後就寫 I know you are having a tough time right now, Just want you to know i am always here for you. I got your back, Love you   佢知我近排好唔開心   佢哋一家都好關心我   但唔敢直接打比我   只係問里奧大人情況點樣   而事實我真係好唔想講嘢   唔知點解 ~

今晚約家姐食飯   我同里奧大人講媽咪走咗   星期日對於家姐嚟講係好慘   因為佢習慣同媽咪去飲茶   所以我話第時家姐星期日約我咃食嘢   我哋都要去   里奧大人實無所謂   因為佢都話第時星期日叫家姐一齊食嘢 ~

我地 6 點半落樓   感恩有 4 人枱   之後家姐都嚟埋 lu ~

同家姐去屈臣氏睇嘢   再買 Muffin 就上我屋企   佢想睇 "太陽的後裔" 同按摩呀   咁我都沖涼先喇   之後再一齊睇   佢差唔多 9 點幾先走 ~

聽日要番工   11 點唔夠都瞓喇   同埋今日都幾攰咁呢 ~