蜜桃咕嚕黑豚肉 ($88) - 兔兔叫㗎 同里奧大人一樣鍾意食咕嚕嘢
蠔皇花菇鵝掌煲 ($88) - 呢個我叫㗎 不過里奧大人唔係鵝掌嘅 咁我叫 CC "啜" 埋去啦 佢話啜咩 我話啜腳呀 佢話佢係講 "蒜" 腳 唔係 "啜" 腳 哈哈
黃金炸豆腐 ($68) - 兔兔叫㗎 佢真係好鍾意食香口嘢 同我一樣
魚香茄子帶子煲 ($88) - 里奧大人叫㗎 但原來都無帶子嘅 搵笨
竹笙菌皇雜菜煲 ($78) - 我話白雪雪啱哂 CC
( 14-FEB-2017 TUE )
尋晚半夜熱醒呀 里奧大人啦 成日迫我着長袖睡衣褲 佢特登喺淘比我㗎 淘咗先話比我聽 佢見我成日着睡裙 摸到我膝頭哥好凍 驚我冷親 但其實我唔慣着褲囉真係 我熱底嘛 覺得着褲好熱呀 ~
早餐食腿蛋治 今朝嘅麵包好新鮮呀 正 ~
菇場唔太忙 可以做下自己嘢 呵呵 ~
Lunch Time 幫里奧大人買麵包 之後再買酸辣米線番菇場食 明明食開豬軟骨 唔知做乜鬼走去叫咗豬腩肉 激死我 今次又係無酸辣味道 已經第 2 次喇喎 咁搞法真係唔想再幫襯囉 ~
好在仍然 Hea 過 放工準時走人 今晚約咗 CC 同兔兔食飯呀 勁開心 因為實在好耐無見 CC 喇 ~
我行陣 APM 再去 MUJI 買 2 包泡菜味點心麵比里奧大人 當做情人節禮物啦 ~
買完都 6 點 40 分 要即飛去酒樓喇 因為我 Book 咗 6 點 45 分呢 ~
坐低無耐 CC 兩公婆就到喇 同 CC 傾陣密偈先啦 又有啲嘢令我諗通咗 ~
CC 送比我㗎 居然有情人節禮物 開心開心
里奧大人 7 點半先放工囉 好在我哋已經諗定食咩 叫里奧大人喺彩虹就打比我 我哋就落單 佢嚟到無耐 啲餸就嚟齊哂 lu ~
本來想叫啤酒 但只係得細罐裝 仲要 $25/罐 我覺得好貴呀 所以叫佢哋唔好飲 哈哈 ~
食下傾下 講起淘寶 之後又講起籌碼 即諗起之前玩魚蝦蟹大細 問兔兔點玩 佢即答到 咁再問三公同射龍門點玩 再問佢識唔識鋤大 D 點贏 Place 佢果然一一答到 又話頭果個咩 9 隻就炒 又咩尾門要點出咁咁咁 同阿喂講嘅一樣 不過講完我都唔明㗎 哈哈 ~
講開麻將 兔兔兩公婆有時會入打鼓巔同朋友打牌 咁呢晚就唔會番出嚟 會打通宵牌 之後第日就瞓一日 CC 就話點解唔第日中午打 ?! 反正啲時間都係用嚟瞓 話不如早啲打好過啦 咁又係喎 我哋呢啲老餅 通頂一晚好辛苦㗎 我寧願朝早 6 點開枱 咁起碼我前一晚都有得瞓吖 ~
咁 CC 有次睇佢親戚打牌 有個親戚食糊 佢有一枱花食糊 但佢無出聲話一枱花 所以只計佢有 1 隻花 咁我又覺得係喎 要是對方有花已經係 2 番 加埋啲牌可能已經係 4 番 而我自己得 1 番 我都唔會打出博妳囉 所以要出聲先啱囉 ~
同埋有時啲人會問我之前打咗隻咩 我真係唔記得 而 CC 同里奧大人都話真係唔會記得喎 因為我地打牌唔係叻 只係記自己想要嗰啲 唔要嗰口啲就即刻打哂㗎啦 鬼得閒記住係啲咩囉 哈哈 ~
佢哋話依家去賭場 如果贏多幾舖 個荷官會抽水㗎 但就無指定抽幾多 總知個荷官鍾意抽幾多就幾多 咁又講番起做莊家 兔兔話做莊多數贏 呢下笑死 因為即諗起里奧大人嗰晚輸到面臨破產 所以兔兔都好驚訝原來做莊家會輸 哈哈 ~
講起賭局 真係越講越興奮 遲啲等我再睇下啲啤牌機幾錢先 同埋想淘啲大銀碼籌碼呀 好似 100 萬一個嗰啲呢 好想試下一次推哂啲籌碼曬冷 因為現實世界係無可能咁做嘛 哈哈 ~
見到酒樓啲人開始執枱 咁好奇怪有幾張咁細嘅 2 人枱 原來呢間酒樓係無得比人搭枱 咁如果張張兩個人坐 4 人枱 咁就真係蝕喇 咁我話 咁放哂 2 人枱咪得囉 佢哋 3 個好驚訝咁望住我 再同我講話咁有啲人會 4 個人嚟飲茶家嘛 哈哈 係喎 真係黐咗線
10 點走人喇 約定下次會打邊爐 里奧大人同我講話又打邊爐 我話 CC 話打㗎 但因為搵唔到地方 所以先食中菜 咁之後我話下次都係打邊爐好啲 佢好奇怪話我 同親邊個食飯都話打邊爐 哈哈 咁又好似係喎 同家姐阿 mi 又係話打邊爐 原來同 CC 都係咁 無計啦 我實在太鍾意蒜頭辣椒豉油喇 哈哈 ~
番到屋企即沖涼 睇多陣電視都瞓覺喇 里奧大人聽朝 6 點要起身呢 ~
沒有留言:
發佈留言