BBQ @ 咖啡灣 + MIMI 屋企 ( 11-FEB-2017 )

( 11-FEB-2017  SAT )

難得每月一 Off   所以一早約定阿 mi 去 BBQ 呢   今日仲得 13 度添   勁正呀 ~

今朝 8 點 45 分起身   好在校早 15 分鐘   因為里奧大人臨出門口先話要去廁所   但最後都遲咗 15 分鐘   真係唔好意思添 ~

本來想去麥記買杯咖啡都無得買 lu   好在尋晚瞓得好   同埋有得玩   應該唔會眼瞓呢 ~

我地約咗阿 mi 阿喂喺巴士站等   之後一齊入去咖啡灣   咁去到巴士站附近   里奧大人同阿 mi 揮手   之後里奧大人同我講話 "快啲行   有車呀"   嚇到我即刻衝呀衝呀   去到等咗 1 分鐘就有車   勁感恩呀 ~

之後阿 mi 講咗幾句嘢   里奧大人問佢係咪喉嚨唔舒服   果然真係啊   仲話尋日頭痛   所以要分兩轉買嘢食   唉   真係唔好意思添   好在今日好番哂咋   唔係咁凍都幾難頂呢 ~

個拖箱好重呀   始終裝咗 4 人份量   好在真係 Join 埋一齊去   咁里奧大人可以幫手一齊拎上車   佢地都話重   咁真係好重囉 ~

阿 mi 成日話要燒嘢食但唔熱氣   原來佢真係想買 100 Plus   不過華潤無得買   哈哈   我同里奧大人講嘅時候   話阿 mi 驚佢熱氣   所以諗咗個方法令到唔熱氣   里奧大人話唔係買 100 Plus 呀嘛 ?!   哈哈   果然同一類人   呵呵 ~

里奧大人應該影完呢張相就即刻跑番去幫阿喂呢   呵呵   呢日勁凍   個個唔係厚褸就係帶帽  

去到咖啡灣只係 11 點 15 分   去到無人   可以任揀爐   呵呵   咁一邊無咁曬   另一邊就曬啲但個景靚啲   咁我叫里奧大人決定啦   佢話揀無咁曬果邊呢 ~

咁我着厚褸嘛   阿喂話唔驚索哂啲味咩 ?!   嚇到我唔敢着褸   之後里奧大人話有味就洗囉   因住冷親   講幾百次   之後阿 mi 話佢同里奧大人係同一類人   凍就更係着褸啦   好過病嘛   但我同阿喂係因為驚有味而唔着褸   哈哈   其實今日都好凍下   所以我間唔中都走去爐邊搓搓手呢   里奧大人見到就拎條兩用頸巾比我   咁又真係暖好多嘅   哈哈 ~

里奧大人話燒嘢食關係   唔方便帶長嘅頸巾絲巾   驚唔小心燒着   所以帶咗 4 條兩用勁巾   到時每個人凍都有得用嘛   估唔到阿喂最後都要用到   即係佢都凍啦   真係同我咁似 ~

風平浪靜   

揀好位   阿 mi 同阿喂就抹枱同抹櫈   我真係無諗過原來要抹嘢架   抹出黎真係成張濕紙巾黑哂   抹完就舖枱布放食物   醬料同杯碟 ~

我地坐最邊位   其實有邊行嘅位置好窄   但我覺得邊位最好   因為多人黎嘅時間   只係一邊嘈   如果坐中間   兩邊都會好嘈囉  

我哋坐嘅位置唔會曬  

里奧大人無啦啦行去另一邊 8 下   話有班南亞裔燒嘢食   但比較嘈   好似開 Party 咁   所以話揀呢個位正喎   呵呵 ~

呢到要比 $100   有人幫你開爐   不過我覺得好曬   同埋啲櫈好矮   坐得耐好辛苦

里奧大人話呢嚿石似隻青蛙   

行前啲就係另一邊燒烤位置喇   望住海   但好曬囉  

成個箱裝到滿哂   再加埋一包炭同其他嘢   真係好重

阿 mi 同阿喂拎哂所有食物用具出來   我依家睇番啲相   我係全程無幫手做嘢添 

本來諗住今朝一齊買嘢去燒   但阿 mi 尋日走咗 2 轉買嘢   話咁我地一黎到就直接入咖啡灣   唔駛行黎行去   但睇啲食物份量咁多   一個人拎真係好重下   里奧大人即刻話我麻煩   咩都要食   搞到人地要買要拎   係嘅係嘅   今次我都覺得自己好衰 ~

見到泰汁同蒜蓉就已經流緊口水   哈哈

擺好哂餐具    

初初以為係咁多食物咋   因為已經放哂成張櫈嘛  



我行開咗一陣唔知去做咩   一番黎就見到原來咁多食物   覺得好重囉   難為了家嫂



里奧大人居然影食物    之後見佢仲不斷 Send 食物相比晴晴添呀   咁我相信佢係開心   如果唔係佢唔會咁做   哈哈

我無影到蜆   但佢居然有影   呵呵   

墨魚丸 / 腐皮蝦卷 / 玫瑰腸 - 阿 mi 切定哂   同埋將丸同卷切粒   咁樣快熟啲   勁細心        

金沙骨 / 豬展骨 / 豬扒 / 雞中翼 / 牛扒 / 蜜汁多春魚 - 最後食剩好多肉呀   要阿 mi 分咗幾餐食呢   下次都係唔好買咁多喇   哈哈      

12 罐啤酒 + 4 罐汽水 + 2 支茶 + 2 包檸檬茶   好似飲唔哂啲啤酒

呢日都大風呀   所以里奧大人扮 Model Post 擋風       

再加埋報紙一齊起爐   阿 mi 扭到啲報紙好似丹麥條   之後又比佢話成日都掛住食

放好粟米同蕃薯

搞掂哂喇

里奧大人同阿 mi 呢類凍型人一定要帶帽   



我一掂啲鍚紙盒就有靜電呀   電咗 2 次   之後我話唔敢再掂錫紙盒   衰喂陰陰咀笑住同里奧大人講   話我呢啲咪醒目囉 (即係唔駛做)   衰得佢吖   之前我喺菇場又係咁   一影印就比部影印機嘅靜電   電到死死下   連續電咗幾次呀   電到頭都痛   但唔影又唔得喎   勁慘 ~

不嬲都知阿 mi 份人好細心   但果時只見字不見人家嘛   感受唔到佢嘅細心   識咗佢之後   真係完全感覺到   等如我見佢啲相包實哂啲食物   我覺得無咩嘢   但當我親眼見到   再親手拆開   係感覺到佢嗰份細心   份份嘢都包到好 "實正"   真係無一樣嘢係 Feel 到佢係求求其其咁包   我自己包嘢   包多幾包就求其包   所以佢成日話我好無耐性   呵呵 ~

準備開餐   阿 mi 整咗無咁辣嘅泰汁比我同里奧大人   佢試咗阿 mi 嘅泰汁   話辣好多      

開始燒喇   



初初以為個火好細   有排燒添     



話咁快啲玫瑰腸都差唔多熟哂   啲顏色勁靚   之後我就將啲腐皮蝦卷打直燒   咁就脆口啲   口感正好多口㗎   哈哈  



玫瑰腸勁好味   又唔鹹   蝦卷又係好味   所以墨丸就失色哂   下次我唔會再話買墨丸   哈哈   



蒜蓉扇貝   阿 mi 特登將扇貝切粒   咁快熟又易食   呵呵   



勁勁勁好味呀  



阿 mi 特登買 2 塊牛扒比我同里奧大人呀   估唔到咁大塊   金沙骨就係阿喂放嘅   阿 mi 話點解 3 件嘅 ?!   係呢可   邊個無得食先 ?!   哈哈          



證據確鑒   兩個男人就雙手插袋   咩都唔做   就咁睇住阿 mi 燒嘢食   



用心搽蜜糖   哈哈  



燒燒埋埋又一盤了



牛扒好 Juicy 呀   同埋有啲辣辣哋   勁正   金沙骨就無食呀   食唔切   哈哈哈哈  

阿 mi 喺 AEON 買嘅菠蘿   之後再自己切粒   我以為佢買現成嗰啲咋   呢個菠蘿勁甜   又香喎   連里奧大人唔食菠蘿嘅都食呀   所以呢盒生果好快清哂   呵呵



阿 mi 驚里奧大人熱氣   所以用盤裝住啲蜆嚟燒   咁好多都開咗口   以為熟   原來唔熟   同埋仲係好多沙   所以阿喂拎咗去沖沖   之後再燒   勁腥呀   同埋 mi 話都有啲唔熟   所以直接放網燒算喇   


咁睇真係以為熟哂  



加埋牛油同沙糖   好好味呀



好大條魚   



個場仍然好靜    



差唔多 2 點幾   有個尼泊爾家庭嚟燒嘢食   爸爸負責開爐   母女就走去沙灘玩

阿喂話佢落哂一包炭

個火咁靚   再加其他嘢一齊燒   



阿 mi 帶埋帽   勁似佢成日喺群組度   出好凍嘅公仔個樣咁呀

芝士泡菜豆卜 - 我話要加泡菜   味道都 OK 呀   當堂變得有口感   哈哈



條魚差唔多熟喇



起勢影   哈哈哈哈



咁大條   夾上黎都有難度㗎



開魚聖手   



啲蜆都熟哂 lu   但變咗啲肉脆卜卜添   嘥哂   牛油排包又因為燒燶咗   所以 2 塊變 1 塊     

唔知我哋望緊咩呢 ?!  



諗咗好耐   我唔知點解做呢個動作 ?! 
 

有人仲睇緊人哋個爐起成點   

                        

阿 mi 好多時都忍唔住出手   哈哈  

咖哩燒汁粉絲魷魚 / 豬展骨   

呢期勁想食魷魚   估唔到有得食   勁開心   我食嘅時候覺得鹹   但我覺得可能頭先食咗塊排包   之後阿喂直頭話好鹹   好在頭先阿 mi 落一半汁咋   唔係仲鹹呀   哈哈    



蕃茄 / 豬展骨 - 豬展骨真係要由阿 mi 燒咯   因為厚身   我驚我燒唔熟呢        

阿 mi 話我食咗   但完全唔記得咩味道同口感添   

佢終於起咗爐喇   個火大到呢   

起完又唔係即刻燒   仲要食薯片   咁點解唔燒嘢食呢 ?!   之後見佢燒咁一半炭先開始燒啊   仲要係放滿哂成個網   但燒到燶唒咁囉   之後再見佢燒   又係放滿哂同埋燒到好燶   佢哋一家三口咋喎   食得咁多肉嘅




2 點半已經有得食蕃薯喇   因為阿 mi 話聞到蕃薯香   



好正呀   凍冰冰嘅天氣食熱辣辣嘅蕃薯  




里奧大人肯定見我食得好滋味   唔係唔會無啦啦影人食相呢   呵呵  

好記得阿 mi 話大虎蝦好難燒   所以由佢包辦喇   就咁睇就唔係好大隻   但睇真身係好大隻   



真係好好食呀   又彈牙   依家睇見都流口水呢

阿 mi 一見到就話點解啲魚擺成咁㗎 ?!   衰阿喂就即刻笑住走開   咁其實阿 mi 都知邊個擺啦   因為佢唔會咁話我同里奧大人架㗎   哈哈哈哈   之後阿 mi 再排番靚靚咁燒   有條好瘦又軟 lai lai   阿 mi 索性掉咗   同埋真係超級勁難燒   勁黐爐呀   所以最後食得嘅只有 4 條   嘥咗心機同錢啦   哈哈   所以里奧大人話下次唔準買多春魚   話我麻鬼煩喎         



第一轉嘅粟米   有半條係黑色㗎   笑死      



第 2 轉呢條粟米就正喇   所以我食咗   呵呵     



烤蕃茄 - 係我話要食嘅   阿 mi 買咗 4 個   我一拎上手都好重   下次真係唔好咁多口喇   哈哈 



蒜片焗啡菇好味呀   但可惜太飽   食咗好少咋   



牛油焗金菇又係好味   但真係太飽   食咗好少   所以比里奧大人話鬼我   話下次唔好再話食金菇



我真係已經好飽   但覺得 BBQ 要燒雞翼先似 BBQ 嘛   咁我負責燒啦   但就唔食   呵呵   阿 mi 話豬扒口感似豬肉乾   咁我試啦   又真係喎   我覺得口感似豬頸肉添呀   咁都好   我其實好怕食厚切肉類呢  



食下傾下燒下   話咁快就 5 點半   咁要去洗碟喇   洗完之後對手凍到呢   我覺得啲手指就嚟伸唔直添呀   咁我掂下阿喂隻手   佢直頭想打我呀   因為隻手真係好似冰咁凍   之後我再掂阿 mi 隻手   佢都無我咁凍呀   第一次咁㗎咋   佢次次一定冰過我家嘛 ~

                      

周圍影下相先

一睇就知女仔玩呢   



細路仔真係好鍾意玩水 



呢班就係喺另一邊燒烤嘅南亞人呢  



最衰無人看住啲袋啦   如果唔係我哋都可以喺沙灘自拍 

好想玩沙呀   不過驚污糟   

下次再見  



咁影埋日落   Hea 多陣就走喇   唔經唔覺咁就玩咗接近 7 個鐘   時間過得勁快 ~

6 點左右預備走人   咁阿喂同里奧大人負責拎箱   阿 mi 就話記得拎背囊   但阿喂居然無拎   咁我一定會幫佢拎埋啦 (諗住整鬼佢)   點知阿 mi 見到即話做咩幫阿喂拎   我話阿喂完全望都無望背囊呀   阿喂話諗住阿 mi 幫佢拎喎   真係好在我見到咋   最驚係妳以為我拎   我又以為係妳拎   點知原來大家都無拎呢 ~   

6 點半到巴士站   唔夠 3 分鐘就有車呢   感恩 ~

我同阿 mi 落車先   都差唔多 7 點 lu   我哋要買柿   因為阿喂想食   可惜無柿   哈哈 ~

之後去 Crostini 買 Cake   咁阿 mi 等緊期間   我見到有日本城   就即入去睇下有無 "魚蝦蟹"   估唔到居然有   我之前去咗 3 間日本城同 2 間家品店   佢地都話無貨囉   咁問咗里奧大人佢哋玩唔玩先   佢地話好   咁即買喇 ~

$39.9/份   之前執屋先掉咗   依家又要買番



我地番到屋企   見里奧大人一個人坐喺梳化   原來阿喂喺廚房洗緊 "寶貝"   又強調話由入屋開始洗到依家   我咪話囉   唔駛做呀 ?!   我話阿 mi 夠日日做成日家務啦   里奧大人笑而不語   哈哈   佢兩條友成日幫來幫去   好在我同阿 mi 都唔弱   哼 ~

阿 mi 幫我買咗 3 包薄荷糖   唔該哂 33



咁阿 mi 去沖山渣玫瑰花茶   之後再開機洗衫   咁我哋就分工合作擺陣分籌碼   我問阿喂籌碼喺邊   佢話妳新嚟㗎 ?!   哈哈   大佬   佢同里奧大人真係以為我熟哂駕步咁噃 ~

搞掂哂阿 mi 就啱啱好出嚟   咁阿 mi 問邊個拎籌碼出嚟 ?!   咁我話係我呀   之後阿 mi 指住個開咗嘅櫃桶   阿喂即刻指住話係我開呀   衰到吖   其實我以為阿 mi 問邊個由個膠盒拎啲籌碼出嚟呀 ~

我哋玩住魚蝦蟹先啦   阿喂做莊   等埋 mi 出嚟又再繼續玩 ~

我每次最多 $300 架咋   阿喂做莊贏唔少   所以比里奧大人做莊   點知輸唔少   哈哈哈哈   咁我話玩大小啦   多啲嘢玩咁   哈哈 ~

每人輪住做莊   咁阿喂次次做莊就贏唔少   所以比里奧大人又做下   但一到佢做莊    無幾耐我就贏咗舖圍骰   佢要賠 $15,000 呀   之後阿 mi 又贏佢唔少   所以佢差唔多輸到破產呀   笑死我   話如果真係佢做荷官   比人踢走幾年呀   哈哈 ~

贏圍骰真係好開心㗎   因為我覺得好難囉

之後到阿 mi 做莊   又係贏唔少   佢又比我做下莊   呵呵   但我計得好慢   同埋好驚呀   阿喂又成日一大揀籌碼放落嚟   我無咁多籌碼賠呀   比佢咁嚇一嚇   真係輸人又輸陣咯   哈哈 ~

好喇   我行開咗一陣   唔見咗兩個 1 萬籌碼呀   好記得一棟 5 萬係賭本   其中有 1 個 1 萬籌碼   之後贏咗圍骰   有 1 個 1 萬籌碼   但無啦啦無咗   咁里奧大人居然有 3 個 1 萬   肯定佢拎啦   所以我拎番佢 2 萬   佢又無反應   阿喂又唔阻止   好有可疑囉   但依家睇番相   我應該數錯   因為我記得有 8 個 $5,000 + 1 個 1 萬   即係 5 萬啦   哈哈   等我仲拎走里奧大人兩萬添   仲怪錯埋阿喂添   Sorry Sorry ~

之後阿 mi 做莊   阿喂次次唔數就成棟籌碼買大小   但佢好彩好多舖都贏囉   之後阿 mi 唔做莊啦   仲話就黎要出 $10 架喇   笑死我 ~

阿喂做莊又蝦阿 mi   明明 $2,000 就賠 $1,500   好在阿 mi 數咋   所以我都好驚佢呃我   咁我又好緊張  成日自己推開啲籌碼嚟睇   睇佢有無漏   阿喂話唔好郁   等莊家數   哈哈哈哈哈哈 ~

相隔兩個鐘又再贏舖圍骰   仲要又係開圍添 5 呀   咁爭阿 mi 未比我圍 5   我話我最多要一半   不過佢話唔制   哈哈 ~      

我叫阿喂唱 $2,000 一百蚊   佢比 4 個 $500 呀   話一百蚊太少喎   賭大啲啦   我同阿 mi 係慢慢拻嘛   我多數買圍骰同最大最少   咁贏得多啲嘛   但其實陪玩多囉   哈哈   里奧大人就滕雞型   無計啦   佢做莊家輸得面臨破產   哈哈   雖然唔係真錢   但都真係好緊張㗎 ~

10 點食蛋糕喇   好味呀   不過阿喂就真係唔太鍾意食咁   唔緊要   我哋幫口食   哈哈 ~

紅桑子石榴慕絲  / 法式芝士
香芒熱情果慕絲 / 紅橙特濃朱古力脆脆



黃色嘅熱情果慕絲   酸咪咪好正呀   另外朱古力甜度又啱啱好   我覺得個個都好味道呀
     


今次又係笑死呀   阿喂話最後嗰舖一定要盡地一舖嘛   我就真係清哂枱面嘅 $35xxx   但居然比我贏番 $60,000   阿 mi 仲勁   加加埋埋贏咗十幾萬   里奧大人就贏咗 3 千幾   但可惜阿喂無錢賠   哈哈 ~



最後一舖先會見到 1 萬同 5千籌碼㗎咋   哈哈

如果頭先用 1 萬買圍骰   真係贏咗   莊家要賠百五萬   真係加加埋埋都唔夠賠呀   因為每人賭本只係五萬咋 ~

本來講好 11 點走   但玩下玩下又變咗 11 點 20 分先走   Call 埋車就 11 點半落樓 ~

今晚又係勁開心呀   阿 mi 阿喂仲要包埋我同里奧大人全日飲食   係都要話幫我慶祝生日   太客氣喇   真係好多謝佢哋咁有我心 ~

番到屋企都 12 點左右   即沖涼喇   因為好鬼凍呀  哈哈 ~

搞掂哂就諗住瞓覺   估唔到里奧大人食童星點心麵   我以為佢餓   佢話口痕喎   所以最後差唔多 1 點先瞓呀 ~