蝦卷 (外賣) + 豆苗 + 炒麵 ( 15-FEB-2017 )

( 15-FEB-2017  WED )

尋晚瞓得唔錯   咁今朝里奧大人 6 點起身上大陸   佢鬧鐘響完   我都瞓番 lu ~

天氣仍然凍凍哋   咁都唔錯   香港都就嚟無冬天㗎喇   所以要好珍惜香港嘅凍天氣呢 ~

早餐食芝腿治   如果佢哋啲麵包日日都係軟糯   其實唔烘底仲好味   不過我唔博喇   哈哈 ~



菇場唔太忙   可以 Hea 過喇   爽 ~

Lunch Time 勁想去 KFC 食炸嘢   但驚熱氣   所以如果要排隊就唔食   唔駛排隊就食啦   估唔到唔駛排隊   呵呵 ~



食到一半已經唔想食   但無理由咁嘥囉   大拿拿 $38.5   算好豪㗎喇   幾大都食埋去囉 ~

行陣先番菇場   番到去即食幾粒話梅肉消滯   如果有檸檬   我直頭會切片咬添呀 ~

仍然 hea 到放工   今晚去牛頭角街市買埋餸   同埋去惠康買生果   好耐無咁買法   重鬼到呢 ~

里奧大人話今晚食麵好無 ?!   咁無問題啦   我已經一早諗定炒麵或者係辛辣麵呢 ~

番到已經 6 點半 lu   所以即開機洗衫 ~

浸完菜就抹嘢   7 點半里奧大人話已經喺九龍塘   要預備煮嘢喇 ~

是日晚餐 - 蝦卷 (外賣) + 豆苗 + 炒麵

蝦卷 (外賣) - 好耐無食喇   所以買嚟食   半磅 $22 都 OK 抵   我覺得好過食排骨   哈哈 ~  

豆苗 - 一斤 $12   超勁抵   本來如果煮辛辣麵就會蒜蓉炒豆苗   但唔想所有餸都係煎炒嘢   所以灼就算喇   再加埋芫茜同蔥同指天椒同煲仔飯豉油   咁都好好味呢 ~           

炒麵 - 就咁用豉油 老抽 ABC 甜豉油炒咋   反正都蘸甜醬辣醬   唔想再加肉   里奧大人食第一啖嘅時候無啦啦呆咗   都估佢哽親啦   之後我話好食都要慢慢食㗎㗎   佢喺度笑   我都忍唔住笑   哈哈 ~

洗埋碗就再開機洗衫   衫褲太厚喇   一機唔係洗得幾多件咋 ~

沖埋涼就切生果比里奧大人食   佢仲做緊公司嘢   好在 10 點幾都做完咋 ~

睇多陣電視都瞓喇   夜晚好似暖番少少咁   今晚唔駛冚珊瑚絨被 lu ~