醬式辣汁焗鯖魚 + 粟米蛋花湯 ( 7-FEB-2018 )

( 7-FEB-2018  WED )

今朝都凍凍哋   但最緊要有陽光囉   但今日仍然係無 ~

早餐食米粉餐   超級勁飽呀 ~



菇場忙呀   所以想匆匆搞掂 Report   之後就做埋其他嘢 ~

Lunch Time 唔餓   咁周圍行下   再買埋菠蘿包同雞尾包就番菇場喇 ~

差唔多 2 點先食個菠蘿包   雖然肥   但好想食甜包 ~

4 點幾開始眼瞓   所以食埋個雞尾包   食完又精神啲咁喎 ~

放工即走   今晚就咁焗嘢   醃完條魚就可以抖喇 ~

買咗十蚊蘭州黑瓜子   估唔到又幾好味喎   個殼甜甜哋咁   仲以為係鹹添

里奧大人 7 點打嚟話今晚好夜放工   咁我 7 點 15 分預備煮嘢   自己食先喇 ~

7 點 50 分搞掂   諗住食啦   咁啱家姐又到咗   咁我唔食住喇   唔係佢會好趕住走咁 ~   

佢數完銀紙又問我要唔要瓜子冬薑乜乜乜   我話唔要呀   全盒都比我掉咗啦   之後佢個樣好慘咁   因為諗住比啲我   哈哈哈哈 ~

佢買咗架手推車比麥包   又拎一袋嘢   所以我陪佢行去巴士站   佢係都話唔駛   我話比我行下仲好啦   個人無咁凍 ~

我番到屋企都 8 點 20 分   諗住早啲食   依家又係 8 點幾食   哈哈 ~ 

里奧大人 8 點 45 分放工   所以我依家都唔想等佢一齊食   真係太夜   同埋等埋佢先煮   真空咗一段時間咁   我倒不如煮完食完休息好過   今時唔同往日啦   依家菇場又忙到死   真係好想快啲休息   唔想朝 9 到晚 9 都係做緊嘢呀 ~

是日懶餐 - 醬式辣汁焗鯖魚 + 粟米蛋花湯

醬式辣汁焗鯖魚 - 次次焗魚   魚皮都唔脆   但我唔想煎   煎完好大陣魚味   好鬼驚 ~

粟米蛋花湯 - 家姐上次比咗盒粟米湯比我   係時候清埋去啦   好似好耐無飲了   哈哈 ~

洗埋碗就沖涼   之後休息喇 ~

里奧大人 10 點半瞓   我未眼瞓   所以睇多陣電視   11 點 10 分先瞓 ~