百樂門國際宴會廳 @ 九龍灣 ( 16-FEB-2018 年初一 )

黑椒牛仔骨 ($128) - 我鍾意食牛仔骨   因為無咁多肉 



瑤柱扒豆苗 ($128) - 份量都多呀   但味道麻麻  



脆皮燒雞 (半隻 $90) - 好鹹呀   之後姑奶又起勢浸   其實真係好失禮人   妳係因為驚肥已咁浸   咁點解妳又叫嚟食呢 ?!   但老人家浸就無可厚非   始終對身體唔好   不過要是比老人家浸脆皮雞   我會索性叫白切雞佢食   咁浸其實無意思

鳳梨咕嚕肉 ($108)



派完利是就有生果盤 



( 16-FEB-2018  FRI  年初一 )

今朝 10 點 20 分都自然醒   梳洗完就去食早餐喇 ~

呢啲大時大節   我好掛住媽咪呀   所以都喊咗   不過好快無嘢 ~

番到屋企抖陣都沖涼   之後我叫里奧大人抓銀   佢抓完之後   我叫佢比我抓番   佢笑到成個身震哂   哈哈 ~

之前買咗 $10 黑瓜子   點知食到停唔到口   所以再買 $10   又係好快食哂   最後買夠 $20   如果唔係就無瓜子過年㗎喇    花生酥糖就買咗 $10   估唔到里奧大人都鍾意食   雖然好甜   但真係好香花生味   



我話點解佢中獎唔比利是我 ?!   佢話我終於開口喎   我話咁係嘛   我次次中獎都有比你啦   之後佢原來係諗住今日比   我拆開話唔夠呀   比多啲   其實係整鬼佢   估唔到佢好認真問係咪唔夠 ?!   個樣仲係好慘嗰隻   哈哈   佢真係諗住再比   但加多句話我同教會爭   咁我話喺家用到比番咪得囉   佢當堂眼突   因為以為我話唔駛   哈哈 ~

最估唔到連家姐都有利是添呀   算佢啦   講真   家姐真係好錫佢架   次次有筍嘢   第一時間都會話: 比妳同里奧大人食㗎   但佢就唔會成日講對我哋點好點好   唔似某啲人成日開口埋口話對我點好點好囉 ~   

今日同婆婆拜年   所以 12 點都出門口喇   差唔多去到酒樓   家姐打黎話姐夫又屙又嘔又暈   所以佢唔嚟飲茶喇   但佢其實已經到咗九龍城   仲以為佢約我喺邊度等添   哈哈 ~

咁我約埋剪髮表妹一齊去酒樓嘛   兩次正想打比佢嘅時候   佢咁啱又打比我   咁我第一句就話 " 咁啱想打比妳"   佢話: 細表妳成日都講呢句嘅   咁我話我真係想打比妳家嘛   佢成日以為我講笑   真係慘   個個都唔信我   哈哈哈哈 ~

今年初一最特別   因為大細舅父一齊黎飲茶   其實年年都係分開   阿姨佢地就會初二同婆婆飲茶   今日只係得大姨大食同剪髮表妹   表妹夫加個女   一圍搞掂哂 ~

炒飯炒麵

仲有隻雞   舅母好似話叫咗個套餐   再加啲點心  



呢餐根本就係晚餐   哈哈哈哈    



好少咁早食生炒排骨



里奧大人話好味道   居然食咗 2 粒添呀   不過其實佢可以食哂成碟   因為剩咗無人食

差唔多食到一半   剪髮表妹叫我陪佢買奶茶   佢話勁眼瞓喎   因為佢瞓咗 5 個鐘咋 ~

飲到 3 點就走喇   我同表妹佢哋就上去婆婆屋企坐一陣 ~

我好鍾意見到全盒

婆婆屋企一定有金莎朱古力



好似好大粒嘅金莎   



一開原來係咁嘅   朱古力係食得嘅   我初初以為假添   哈哈

入面再有 2 粒金莎



婆婆成日叫我打比佢   又話我無聽電話   估唔到剪髮表妹即問婆婆打幾電話呀 ?!   有無打錯呀 ?!   哈哈 ~

我哋同剪髮表妹一齊 3 點 45 分走   大食就繼續陪婆婆 ~

咁剪短頭髮之後   我真係好驚啲風攝親條頸   咁好易病㗎   同埋一到咁上下就會覺得凍   咁諗住着番件褸   點知原來漏咗喺婆婆屋企   咁諗住自己出閘啦   先記得大食未走   所以叫佢拎比我   最搞笑我勁唔好意思嘛   佢反而話好呀   佢都想出去抖下   哈哈 ~

去 MCL 買戲飛   再去美心買杯咖啡   之後就去舖頭幫手喇 ~

假期就好想飲咖啡   咁去美心 MX 買啦   $18一杯呀   咁貴嘅 ?!   上次喺荃灣間美心只係 $13 咋喎   真係心都痛埋

做到 8 點   再同埋水姑食生日飯   咁里奧大人話喉嚨唔舒服   諗住去超市買涼粉   不過好早收舖   咁買椰汁西米露同綠豆沙啦 ~ 

番到屋企都即沖涼喇   原來已經差唔多 10 點呢 ~

剪髮表妹送比我同家姐㗎   我要桃紅色   我話點解送比我哋嘅 ?!   佢話我成日請佢食飯喎   但今次大食無送朱古力比我嘅   梗係知阿妹送   佢就唔送啦

最鍾意細細粒又唔同款嘅朱古力

難得放幾日假期   唔駛咁早瞓   咁梗係睇戲啦 ~

咁我食咗幾啖西米露   隔咗半個鐘之後個胃勁辛苦   係勁想嘔   不過忍住   忍到係咁流口水   哈   我估我食唔到西米   唉   又食少一樣甜品了 ~

個胃成晚頂住又唔敢咁快瞓   所以 1 點幾先瞓呀 ~