梅菜蒸鯇魚 + 金腿瑤柱蘿蔔糕 + 西生菜 ( 21-FEB-2018 )

( 21-FEB-2018  WED )

大回南天喇   天色昏暗加潮潮濕濕   固然就架梗啦   最怕啲嘢好似立黐黐咁   好在前兩日抹好哂嘢咋   感覺無咁污糟咁囉 ~

早餐食米坋餐   咁晏畫就要食輕盈餐咯   不過依家都唔比自己食咁多嘢   唔想食大個胃 ~



菇場忙架   因為要清哂啲煩嘢 ~

無啦啦搞肚痛   去到廁所一坐低已經暈暈咃添呀   其實都應該係暈咗了   因為我一開眼   完全係斷咗片咁   之後好努力咁不斷祈禱唔好再暈   但又再暈多嘢   再起身已經標哂冷汗   勁驚呀   雖然我次次搞肚痛都暈   但未試過暈兩次同標冷汗囉 ~

再望下自己個樣   成個咀唇白哂   勁似比鬼上完身咁㗎   勁恐怖 ~

坐番埋位即搽薄荷膏同食糖   咁好似好少少 ~

Lunch Time 出去買吞拿魚包番菇場   仍然頭暈暈咁   如果唔係都想行多陣 ~

個人好攰呀   完全無做過嘢 ~

放工去街市買餸   之後即番屋企 ~

里奧大人 6 點 15 分放工   我都係啱啱番到屋企無耐咋   所以要即刻煮嘢呢 ~

今晚食麵   其實食飯最好   因為唔駛等嚟等去   不過里奧大人話無胃口食飯   咁是但啦 ~

是日懶餐 - 梅菜蒸鯇魚 + 金腿瑤柱蘿蔔糕 + 唐生菜 

梅菜蒸鯇魚 - 呢件好細件咋   都要 $24   依家啲嘢真係好貴 ~

金腿瑤柱蘿蔔糕 - 里奧大人唔舒服   所以要蒸啦   不過蒸有蒸嘅好食   同埋勁方便   唔駛煎到成身油   哈 ~

唐生菜 - $10 有 4 棵仔   呢度 2 棵   依家唔鍾意喺屋企食菜   好奇怪 ~

搞掂哂都 8 點   里奧大人就沖涼先   之後我開機洗衫就沖涼休息喇 ~

里奧大人 9 點就食藥瞓覺   頭先佢一番嚟就話食完飯沖涼瞓覺   我話唔駛講   佢好好奇咁問點解話唔好講   我無答佢呀   因為佢成日話瞓都講幾十次先瞓   講到我都煩   同埋佢成日講到要早瞓   我煮嘢好大壓力囉   就算蒸嘢都要時間   所以頭先煮緊嘢都唔想講嘢   唔係我會發脾氣 ~

我就睇 Youtube 啦   又打下機   11 點半都瞓 lu ~