鳳爪排骨飯 + 雞扎 (外賣) @ 屋企 + 芒果糯米糍 ( 29-MAR-2018 )

( 29-MAR-2018  THU )

今朝里奧大人上大陸   又好早起身   不過我尋晚瞓得唔好   佢起身之後   我都瞓着   佢出咗門口我都唔知添呀 ~

呢排真係瞓得唔係咁好   有嘢諗呀   真係成日為埋啲無謂嘅賤人瞓得唔好   真係唔抵   識到佢哋真係人生污點   唉 ~

早餐食吉列魚柳   但食完唔覺得飽   8 卦話好少聽我話唔飽   哈哈 ~



菇場唔忙   最緊要唔好忙啦大佬   聽日假期   唔想影響心情   嘻嘻 ~

真係好鬼餓呀   做咩咁架   我係咁同 8 卦講話好餓   一陣 Lunch Time 一到就即飛出去食嘢   8 卦都話我好少話餓   仲要食飯   但真係唔知點解   好餓好想食飯囉 ~

食飯嘅地方又無位   咁轉食車仔麵   都好味道呀 ~





去拉記借書   我借排毒湯嘅書   8 卦以為係排骨湯   今朝 Admin 叫司機帶版   佢又睇到帶飯   同我一樣   滿腦子都係食食食   不過食嘢真係好開心   我呢啲身型   話自己唔鍾意食真係無人信 ~

尋晚里奧大人拎嘢   我聽到膠袋聲   我問佢食咩 ?!   佢話拎嘢咋   之後無耐又聽到膠袋聲   我又問佢食咩 ?!   佢都忍唔住話我真係為食嘅人先對膠袋聲咁敏感   哈哈 ~

番到菇場有啲眼瞓   依家天氣開始熱   無咩必要都唔行咁遠食濕嘢   呵呵 ~

里奧大人要喺大陸食埋 Annual Dinner 先番香港   好在 6 點半開始食咋   咁可以早食早走   話哂喺大陸   唔係尖沙咀囉 ~   

我放工去官塘烘焙店買菜油同牛油   再買其他嘢   買夠 $150   咁再加埋之前啲單   可以做會員   真在太好 ~

咁再行埋一田超市就走人   去唐記買鳳爪排骨飯同雞扎番屋企食   勁似麻甩佬 ~

番到屋企都即刻食嘢喇   好後悔買雞扎   原來就咁食個飯都已經超級勁飽   最後慢慢食啦唯有   但食剩啲芋頭囉   再食埋就唔得掂   個胃會好脹 ~

食完就蒸糯米皮   再炒埋糯米粉就去徑步   徑 20 分鐘算喇   因為要快啲番屋企芒果糯米糍 ~

咁沖埋涼就開機洗衫   之後先開始整糯米糍   今次高難度喇   就係用豬腰芒    細細隻有排切   但豬腰芒就一定甜囉 ~

睇個樣好似好煙韌咁   暗喜



我最怕整粉類嘅嘢   飛到周圍都係   又要大清潔 ~

里奧大人 10 點幾番到屋企   咁啱我整好糯米糍   所以叫佢沖埋涼先食 ~

個皮好煙韌   芒果又甜   超級勁好味   所以勁開心呀



諗住整到長洲芒果糯米糍嘅款   但整到好核突   哈哈  

里奧大人見到芒果糯米糍都好開心呀   佢話正想食甜品 ~

佢仲話好好食   今次仲比 10 分添呀   咁我話最高分係幾分先 ?!   佢話 10 分喎   咁佢真係好鍾意食   咁我自己再試啦   真係超好食   我真係好少覺得自己整嘅嘢好食   哈哈 ~

搞掂哂就休息   睇多陣電視   12 點都瞓喇 ~