豪宴皇宮 @ 大埔 ( 23-JUN-2018 )

今次影咗幾張相   費事又問問問







( 23-JUN-2018  SAT )

今朝同家姐食早餐   勁開心 ~



今次食芝腿治   煎過嘅火腿真係好味好多   哈哈

之前家姐嘅肥仔同事喺公司樓下氣促   但係都要家姐陪佢入院   原來本身有個女同事 V 拎哂嘢   諗住陪肥仔入院   咁家姐就落去大堂先   同肥仔講話 V 陪佢入院   肥仔聽到就碌到對眼好大   仲好似抖唔到氣咁   嚇到家姐以為咩事   之後家姐話佢陪啦   佢就鬆一口氣   笑死我呀   因為家姐做埋佢碌大眼個樣 ~

咁前排家姐都有去醫院探佢   原來佢輕微中風   佢好後生㗎咋 ~

咁果晚肥仔細佬同媽咪都有嚟   仲話要請家姐食飯   多謝佢陪肥仔入院   但家姐話唔駛咁客氣啦   大家同事嘛 ~

之後肥仔細佬講話佢地爸爸就係突然間走咗   所以佢怕阿哥有事   仲講到喊添呀   佢真係好驚失去阿哥呢   講到呢度我都差啲喊   嗚嗚嗚嗚 ~

肥人真係比較多病痛   因為多數都係鍾意食又唔願郁   所以我都要徑步   雖然唔係大運動量   但都要比自己郁下囉 ~

傾下傾下   原來已經 8 點 50 分喇   即走啦   感恩去到巴士站即有車呢 ~

菇場唔太忙   但都盡量清哂手頭上嘅嘢囉 ~

放工即走   今日 2 點半有人嚟整廁所水龍頭   所以我去買外賣番屋企食 ~



食完又抖下   好鬼攰咁   最後 4 點幾都瞓着咗   瞓咗 1 個鐘呀 ~

6 點出發去大埔   里奧大人姐夫有個感恩飯局 ~   

食就食啦   又影相又講成半個鐘頭嘢   8 點先開餐   麻鬼煩 ~

9 點幾都走人   好在里奧大人姐夫車我哋番屋企 ~

沖埋涼就睇波   不過睇咗半場都頂唔順要瞓覺   叫里奧大人自己睇喇   呵呵 ~