泰巷 + 明記甜品 @ 荃灣 ( 26-JUN-2018 )

金不換香辣肉碎炒四季豆 ($58) - 完全無金不換味道喎   指天椒又唔辣   呢下先勁啊  



招牌無骨海南雞飯 ($59) - 個椰香雞油飯難食到暈   唔熱已經衰   口感勁難食   同埋最奇怪食落無黏性咁樣   我唔識形容添   但感覺係好似去大陸旅行團   最山卡拉景點嘅酒樓食嘅飯咁



泰式風味拚盤 (脆炸泰式蝦餅 / 脆炸泰捧野菜卷 / 燒沙爹雞肉串) ($68) - 睇個賣相已經唔開胃啦   野菜卷都 OK   其他唔掂

木瓜蟹籽沙律 ($42) - 我同表妹食咗 2 啖覺得有怪味   但又唔係臭   平時食嘅唔會咁囉   回味果下味道好怪呀

叫侍應換啦   佢話係咪食咗覺得壞 ?!   我想話頭先我話食咗覺得有怪味囉   都唔聽人講嘢   但佢係都唔肯換咁款   仲望住隔離枱   想人打救佢咁   人哋彩妳都傻啦

之後又話唔可以隨便取消 Order   咁我明   但我咪話怪味囉   無問題我都唔會叫妳換啦   之後佢話同經理講   搞咗成 10 分鐘先過來   同我哋講話師傅試咗無怪味   可能落咗蒜頭   我心諗   成個木瓜比妳整到蒜頭味 ?!   不過都費事同佢講咁多   我話妳取消咗就得㗎喇   唔該

泰式芒果薄荷梳打 ($12 優惠價) - 呢杯 OK 呀   呢期好鍾意飲梳打
表妹要凍咖啡   仲話今日已經第 3 杯 

@ 明記甜品
我食芒果撈珠



表妹食芒果豆腐花



( 26-JUN-2018  TUE )

尋晚一覺瞓天光   因為之前一晚瞓得勁差   哈哈 ~

早餐食吞拿魚治烘底   好耐無食   啲料少咗一半有多喎 ~

菇場忙呀   要快快手做哂去   不過起碼要做一日呢 ~

Lunch Time 出去買飯   其實唔餓   但同阿 mi 有嘢傾   所以食飯就最好   一放入口就得   食麵就要吹幾吹嘛   麻煩啲呢   哈哈 ~



仍然忙呀   好在 5 點搞掂咋 ~

放工即走   感恩即刻有車   依家坐小巴都會扣安全帶   但其實好多時都唔記得自己扣咗   係走嘅時候先記得解開 ~

咁坐我隔離個男人   佢叫咗落車   但起身先醒起扣安全帶   之後即解開啦   咁有個人落完車   佢都仲未解到   司機就關門慢駛出去啦   佢就同司機講未呀未呀   但司機聽唔到   佢再話未呀未呀   之後司機停車問未咩呀 ?!   佢話未落車   咁佢落咗車之後   司機話佢咁大個人講嘢都唔識講   咩未呀未呀   講真   我覺得幾好笑   但唔明點解佢可以搞咁耐都解唔到囉 ~

6 點 20 分落車   即飛去表妹度喇 ~

之前訂咗 2 支洗頭水   以為 $120 有兩支   點知原來係 $120 一支   不過我都照買㗎啦   因為我覺得佢幾好用嘛   用咗無甩咁多頭髮咁呢 ~

7 點半可以走人   依家表妹要減肥   所以唔打邊爐唔韓燒   哈哈 ~

大鴻輝又全部都係重量級食物   佢話去荃新天地喎   聽阿 mi 就聽得多   聽表妹講荃新天地好唔慣   哈哈 ~

佢雖則減肥   但會照睇零食   所以又去馬莎睇喇   但我哋覺得   減肥太抑制   之後食得仲勁 ~

咁我話佢要學水姑咩食物都浸水嘛   浸到啲食物變白色或者原色先好食   佢話好核突   唔比我再講   呵呵 ~

同佢行去睇啲 Outdoor 背囊同露營嘢   佢原來識好多嘢㗎   問咩都答到   之後我話今晚真係長智識了   佢話佢個朋友又係咁講   哈哈哈哈 ~

行到差唔多 8 點   見到水牌嘅泰巷好似唔錯   咁去食啦 ~

一坐低呢   我個頭好痛   可能餐廳比較焗   但費事轉來轉去啦   感恩抖咗陣就無行 ~

一路食一路傾   佢話去清邁玩咗激流   之後成日問人幾時到幾時到   又話多蚊又悶   我話係咪行去嗰陣呀 ?!   佢話係玩緊激流嗰陣呀   笑死我   好少聽見激流話悶家嘛   同埋嗌都嗌到黐咗啦   都無機會問咁多嘢家嘛   哈哈 ~

佢仲勁   同朋友由古城行去尼曼區   佢話因為食飽早餐   所以咪叫朋友一齊行啦   行咗 1 個半鐘   行到 Maya 入面   仲玩咗個籃球 Game   之後再行啦   佢朋友話有啲暈   我表妹話咁食啲嘢先   但佢話唔食   有啲唔舒服   咁表妹見佢面色都差咗   拿拿聲坐雙橋番酒店   200B 呀   擺明呃佢啦   我話坐 TUK TUK 都係 160B   何況雙條   最多30B/人   因為架車寫住 ~

佢朋友一入酒店又屙又嘔   我話佢中暑定啦   之後表妹都話可能係呀   但因為係星期日   一定要去 Sunday Market   如果唔係等如無去過清邁   咁表妹自己一個人行囉   因為佢朋友仲瞓緊   瞓到佢行完番嚟都仲瞓緊喎   表妹話因為佢朋友成日都話攰話暈   所以無留意   點知今次咁大鑊   oh ~

佢哋去千人 BBQ   咁食海鮮就加多 100B   咁佢哋加啦   最後一粒海鮮都無食   笑死我   原來佢朋友以為表妹鍾意食   表妹又諗住食下魷魚呢啲   所以加錢囉   我話妳朋友都應該幾錫妳   佢話係中學同學   我話我無哂中學同學啦 ~

之後話有次同佢哋去旅行   去機場前佢朋友話想去大家樂食嘢   我表妹話入機場先食啦   點知大家樂居然裝修   佢朋友即怒啤佢呀   哈哈   我話妳都好克住妳朋友喎 ~

嘩   邪到吖   頭先同表妹一齊傾偈   話喺香港好難食到唔好味嘅泰菜   今晚終於遇到啦   呢間唔係唔好食咁簡單   而係好難食呀   頂 ~

咁我請食飯啦   我預咗嘛   佢話唔好唔好   仲拎埋銀包出來   之後我話下次佢啦   佢又話要請我食糖水   咁行陣先食啦 ~

陪佢去買零食同車厘茄   我唔想去滿記呀   所以行陣去路德圍附近食糖水 ~

一睇個餐牌   我叫表妹千奇咪食生果拚盤呀   我話自己整都得啦   之後整鬼佢   叫佢熱糖水走甜囉   佢真係好認真問得唔得   哈哈 ~

我哋都話好羨慕啲人食極唔肥   但我話我望嘢都會肥呀   笑到佢黐咗線   話我誇張   哈哈 ~

食完都成 10 點   佢陪我行去搭小巴   因為我成日話食完飯要帶我搭車   我認唔到路 ~

10 點 45 分番到屋企   即沖涼喇   里奧大人就瞓覺了 ~

食到好飽   唔係點眼瞓   所以差唔多 1 點先瞓呀 ~