四式芝士薄餅 + 春卷 SHAKE 脆 (外賣) + 自家制蕃薯麵包 ( 11-OCT-2020 )

( 11-OCT-2020  SUN )

今朝 9 點起身   沖埋涼就去食早餐 ~

食完就要去里奧大人公司幫手  鼎爺又比麵包比我呀   之後話叻叻都搵我   我嗰下都覺得奇怪   唔通佢有嘢問我 ?!   之後我同里奧大人講話叻叻搵我呀   佢話我係咪聽錯   哈哈 ~

咁啱我同里奧大人都見到叻叻   我即問佢搵我乜事 ?!?!   佢比咗樽柚子茶比我呀   嗰下我真係有啲愕然   里奧大人反問點解佢無 ?!   之後好唔願意咁比多樽里奧大人   咁當然唔會要啦   我已經有啦嘛   旨在整鬼佢   哈哈 ~

依家堅搞笑   如果我星期日來   佢啲同事係直接比嘢我   唔再經里奧大人   以前會叫里奧大人比太太咁架 ~

幫完手就番崇拜   見到鴛鴦媽媽又傾咗 20 分鐘   呢下真係估唔到咁好傾   雖然成日見面   但都真係打完招呼就要走   今次可以企定定傾計   感覺好唔同 ~

崇拜之後就去姑奶屋企拎嘢   飲咗碗湯   之後傾咗接近一個鐘   原來已經 3 點   咁我正想走嘅時候   里奧大人就啱啱放工 ~

里奧大人話去南記   咁無所謂啦   佢講得出南記就係好想食㗎喇 ~

幾乎連續 3 餐食米線   好在個個湯底都唔同咋   哈哈 ~

食完就番屋企   里奧大人 5 點幾瞓到 7 點   咁佢起身   我就預備晚餐 lu ~

是日懶餐 - 四式芝士薄餅 + 春卷 SHAKE 脆 (外賣) + 自家制蕃薯麵包

四式芝士薄餅 - 之前喺 759 買㗎   芝士味都 OK   但餅底唔夠脆 ~

春卷 SHAKE 脆 (外賣) - 頭先喺南記買嘅   我要海苔椒鹽粉   但居然無比我   嗚嗚   咁唯有蘸泰式甜辣醬啦   我仲搞嘢   同里奧大人講話炸雞   點知原來係炸春卷 ~

自家制蕃薯麵包 - 里奧大人同事嘅媽媽整㗎   話係蕃薯包   因為係季節性   所以唔係成日有㗎 ~

洗埋碗就開機洗衫   之後沖涼   搞掂哂就食生果 ~

金奇異果 + 士多啤梨乳酪   已經特登買甜嘅乳酪   但仍然都係食到金奇異果嘅酸

睇下電視   差唔多 11 點半先瞓   可能晏晝飲咗可樂呀 ~