火雞肉出前一丁 + 自家制麵包 ( 17-OCT-2020 )

( 17-OCT-2020  SAT )

今朝同里奧大人一齊 10 點自然醒   我就梳洗後等食 ~

食完就抖陣   里奧大人就做公司嘢   本來今日佢番早   但同事想佢夜晚幫忙   所以佢番夜晚   咁啱姐夫今日唔得閒   咁我可以陪家姐   嘻嘻 ~

熨咗 3 機衫   估唔到又唔係好攰喎   但原來都已經 12 點幾   要整芝士肉鬆三文治比里奧大人   等佢食埋就番公呢 ~

麵包唔脆嘅   因為整嘅時候痴底   我唔敢烘咁耐   咁我整咗 2 塊芝士+大量肉鬆   我話呢件三文治可以頂到 8 點   里奧大人話可以頂到 11 點   哈哈

    

里奧大人 1 點唔夠都出門口   家姐就 1 點 15 分左右接我 ~

一開門就見到 Berry 縮入梳化底   我估佢聞到唔係家姐陣味   所以好驚   但我一入屋又係咁撲我   家姐話佢好似廿年後同主人重逢咁   超級勁熱情 ~

家姐話有啲餓   咁我都整三文治佢食喇   我全程用手壓住件多士   佢勁驚我辣親   我話放心   太熱就肯定唔會落手啦   妳估我係吳剛師傅咩 ~

呢件好靚仔喎   點解整比里奧大人嘅唔脆㗎   激死我

家姐話好味   仲話如果喺佢   佢一定唔整   又話我鍾意煮嘢食   我話睇煮比邊個咋   同埋我唔抗拒煮   但唔係話好鍾意煮   哈哈   因為我好憎洗碗 ~

Berry 望到家姐實一實   因為佢食緊三文治呀   之後仲成個身瞓喺家姐度   但個鼻就係咁索件三文治   醒到呢   不過我哋唔會比佢食呢啲鹹嘢

又影下佢   我手機最多就係佢嘅相   哈哈

抖到差唔多 3 點   係時候又幫家姐執櫃桶喇 ~

今次執 3 個衣櫃桶   其中 2 個係擺褲   起碼 50 條   我已經幫佢掉咗 2x 條   但仍然有 2x 條   但點解平時着來着去都果幾條㗎   所以我將新嘅放到最出   咁唔會唔着喇啩 ~

頭先我叫家姐一齊睇有咩褲唔要   不過我就一路執一路話唔要   家姐話咁其實都唔需要問佢要唔要囉   哈哈哈哈   我就係知佢咩都想留番   所以我先咁做咋 ~

搞掂哂就幫佢執文件   呢啲真係要問佢要唔要喇   話哂私人信件   我唔會亂掉呢 ~

家姐話想瞓陣   又話好似好衰   我話瞓就瞓啦   衰乜鬼   反正我執嘢唔得閒理妳囉 ~

我望下 Berry 有無瞓覺   咁我個頭慢慢向下望 (好似鬼)   咁我見到佢對眼白越來越多   好搞笑呀   佢心諗做乜鬼咁望佢

都唔知家姐瞓幾點瞓同咗幾耐   因為我無望時間   只係好專心將文件分類 ~

之後家姐瞓醒   出嚟就話係咪好大風 ?!   因為話我啲頭髮亂哂   哈哈哈哈   我真係無理到呀   只係專心咁執執執 ~

咁幫佢分保單   佢居然好開心咁話: 原來呢份喺度呀   仲話未交保費   我話妳自己擺完喺度都唔知嘅咩 ?!   講真   乜費物費都可以遲交   但保單真係唔可以囉   我真係暈暈地   究竟係妳屋企定我屋企   點解次次都係我搵到妳想要搵嘅嘢嘅 ~

終於幫佢分好哂所有文件   再入哂唔同嘅 Folder   仲寫低埋喺啲咩嘢文件   家姐話我好似佢秘書   我話真係好頂唔順妳啲文件唔執呀 ~

家姐講咗幾次話好反胃   我話係咪滯呀 ?!   佢又話唔係   之後佢話喺房聞到陣味好反胃   我入去聞下   原來有人煮滷水嘢   之後我同家姐講囉   我以為頭先件三文治令妳好反胃呀   成日講嘢先同後調轉   搞到我頭先勁驚 ~

家姐話如果佢唔喺度   記得要幫佢照顧 Berry   我話我會殺死 Berry   家姐聽完之後丫大個口呆咗   哈哈哈哈 ~

下次要執埋一個私人櫃桶同藥箱   咁再涼啲就執另一個雜物大櫃   我就應該唔會有嘢再執㗎喇 ~

家姐屋企除咗佢同姐夫嘅家居服櫃桶無執   其他所有柜都已經比我執到整整齊齊   下次要搵定張紙寫低啲咩寫先   因為我有啲都唔記得   哈哈 ~

佢好多時都係 7 點左右就眼瞓   唔通佢都有飯氣攻心 ?!

瞓到對眼得一粒白色

依張就咪到實一實

差唔多 7 點就番屋企   大清潔廁所再沖涼   搞掂就開機洗衫 ~

里奧大人 8 點幾放工   差唔多 9 點先開餐   本身想唔煮   因為里奧大人兩次唔記得拎火雞肉同麵包   咁今晚拎番嚟   就點都要食埋啦 ~

洗埋碗再沖涼   之後真正休息喇   哈哈 ~

里奧大人 11 點瞓   我今晚 12 點先瞓呀   唔知係咪 5 點幾飲咗盒檸檬茶呢 ~