里奧大人要通菜走油 點知連腐乳都走埋 咁佢沖完涼之後見到通菜上面有腐乳 個樣當堂好開心 仲話原來有腐乳 我話係屋企嘅腐乳囉
( 10-OCT-2020 SAT )
今朝起身 里奧大人同我講話尋晚我係咁批踭 我話尋晚真係發咗好多夢呀 發夢朱朱係咁跳來跳去 我要捉住又要抱住佢呀 ~
唔想食麵包同粉麵 所以食吉列魚柳 但真係勁熱氣又好油 下次唔再食 ~
特登叫薯餅比 8 卦食 但唔記得佢係短週 食剩半塊真係食唔落喇
阿齋今朝食腸粉 又讚我好介紹 佢話真係從未食過咁熱嘅腸粉 之後再同阿花同溫總一齊傾 傾咗半個鐘呀 笑到死死下 ~
一坐番埋位 糟糟就打比我話搵唔到家姐 話佢手機直接轉去留言 係咁叫我搵家姐 咁我塊臉又大喎 成日 "high" 到手機嘅 "保留" 我就即刻按番 "通話" 啦 但篤得太快又變番保留 篤來篤去 篤到糟糟直頭收線 之後佢再打比我 話聽到有嘟嘟聲 驚人 Hack 咗我手機所以收線 我話其實係我篤來篤去咋 佢話要我哋兩姊妹救佢就死得 哈哈哈哈 ~
菇場唔忙 做下自己嘢 話咁快就 1 點放工 ~
家姐借咗架車比糟糟 所以今日同家姐一齊買外賣譚仔 之後車埋糟糟番屋企 就再番自己屋企 估唔到都只係 2 點 勁早呀 可以多啲時間陪 Berry ~
今次我第一個入屋 Berry 即刻縮入去梳化底 可能多數一見嘅係家姐 正一門口狗 哈哈 之後我叫 Berry Berry 佢先出來咋 仲要係女仔聲 係非常之刺耳嘅聲 就來要帶耳塞先再入屋喇 ~
重慶酸辣湯底 (3小辣) 過橋米線 ($54) - 好味呀 香香辣辣咁
土匪雞翼 5 隻 ($32) / 麻辣豬耳 ($29) - 勁想食豬耳 但里奧大人又唔食 所以家姐話買譚仔 我即刻話要食豬耳呀
喺天仁茗茶買咗杯凍冰香橙綠 (半糖) 都幾好飲 我將所有嘢放落茶几 Berry 就圍住茶几係咁索 佢真係想食咁款㗎
妹妹 4 點幾嚟咗 話隔離屋隻狗狗落街散步 叫我哋帶埋 Berry 一齊去玩喎 ~
Berry 見到狗狗就係咁吠 家姐話佢無朋友㗎 因為 Berry 有焦慮症 一見狗就吠 唔理大狗定細狗 咁要分開佢哋啦 之後就同街坊傾偈 傾咗 20 分鐘都要走喇 衰女係咁吠 ~
好似 BB 樣呀
慘慘眼
超級勁樣衰 哈哈
我食咗啲啲 真係好香芝士味 怪不得 Berry 咁鍾意食啦
主人 妳硬係要咁望我哋嘅 ?!
家姐喺 DONKI 買咗薯片 我問係咪好抵 ?! 佢話一場嚟到就買番啲嘢走喎 佢比咗 1 Pack Pocky 我呀 實在太好 因為我好想食 哈哈
差唔多 6 點 妹妹又嚟 仲即刻拎家姐部 I-Pad 玩 Game 我見全個版面都係 Game 肯定係妹妹 Download 啦 一係就嚟飲檸檬茶同食雪條 作哂反 ~
今晚比咗啲糖同朱古力比佢 佢都好乖話唔要 我話特登買比佢㗎 咁如果有唔同樣味就會同家姐 Share 食 今朝仲整咗一碗蟹肉蒸雞蛋比家姐 之前又炒蛋比家姐食 佢唔多嘢講嘅時候確實係乖嘅 哈哈 ~
同家姐執衣櫃 我覺得佢想我一齊執 不過又驚我攰果隻 但我其實係記得執衣櫃同套廁嘅 因為我應承咗就一定要做 唔係我會心掛掛 今日又掉咗一大袋衫 下次繼續 哈哈 ~
依家我一坐低 家姐就問我係咪好攰 ?! 自從上次講咗一次之後 佢就成日咁問 真係好後悔講出來 ~
好耐無見呢個動作喇 因為唔叫佢做 Sit 同 Hand Hand 嘅動作都已經有得食 哈哈
6 點餵 Berry 食嘢 今次居然食得好快喎 尋晚姐夫餵佢 衰女包食得好快同食哂呀 家姐餵就揀哂啲肉 最後先食狗糧 真係蝦人蝦到咁嘅 ~
差唔多 7 點就走喇 里奧大人今晚夜放工 我都唔煮喇 ~
番到屋企就大清潔廁所 搞掂哂就開機洗衫 沖埋涼就等食 爽呀 ~
里奧大人 9 點先番到屋企 等埋佢沖完涼先開餐 ~
食完抖陣 再睇多陣電視 11 點幾都瞓喇 ~
沒有留言:
發佈留言