蠔油燜冬菇雞全翼 + 蕃茄南瓜粟米湯 ( 16-OCT-2020 )

( 16-OCT-2020  FRI )

感恩一覺瞓天光   臨醒之前個夢係去泰國兌換錢   比人呃咗 100B 呀   之後仲叫我兌換錢去新加坡   話買一送一   但我話依家疫情   邊度都去唔到啦   心諗呃我錢仲叫我再兌換錢   咁唔老實搵幫襯你咩   之後就鬧鐘響 ~

好搞笑喎   發夢都記得依家疫情   不過尋晚發嘅夢   全部場景都唔係香港   有個夢就喺酒店食嘢   成個場無人呀 ~

今朝早咗一班車   所以去麥當勞買早餐 ~

麥芝蛋包套餐只係 $14   我用埋 $3 支付寶印花   早餐只係 $11 咋   勁抵   但咖啡唔夠熱   如果唔係就更好

菇場忙呀   所以好快就到 Lunch Time ~

時間一到就去萬寧買嘢   之後買埋粉果 + 炒麵就番菇場喇 ~

開始食到有啲悶   哈哈

等過馬路嘅時候   家姐打嚟問我搭地鐵去佐敦   係太子定旺角轉車 ?!   我諗咗一陣話旺角   umm   佢又會打嚟問個路盲都有嘅   之後行到菇場附近   又有人問呢度係咪 xx ?!   做咩今日咁多人問我地方點去嘅 ?!   唔通我今日個樣好 Smart ?!   哈哈哈哈 ~

仍然忙   好在放工前搞掂哂 ~

放工即走   番到屋企沖涼抖陣   今晚翻熱啲餸就可以 ~

里奧大人 6 點半放工   之後同我講話今晚開會   佢連自己都唔記得呀   好在佢同事提佢咋   我話一早預備好餸   唔駛急 ~

我覺得好似神一早安排咁   因為我上次係突然間想整雞翼   咁又唔想兩日都焗   所以就整個燜餸   如果唔係尋晚整好咗   我真係會好緊張㗎    真係感謝神嘅保守 ~

是日懶餐 - 蠔油燜冬菇雞全翼 + 蕃茄南瓜粟米湯

蠔油燜冬菇雞全翼 - 今次啲雞翼唔上色   唔通太少老抽 ?!   本身係雞全翼   但驚翼尖位於醃唔到   所以尋晚剪起再焗熱食   雖然啲色唔夠   但好入味㗎   送飯一流 ~

蕃茄南瓜粟米湯 - 呢個湯飲足 3 晚真係唔錯   哈哈哈哈 ~

洗埋碗就沖涼   搞掂哂就休息 ~

里奧大人 8 點開會   9 點左右就完畢   但之後仍然要做公司嘢 ~

睇多陣電視   11 點幾都瞓 lu ~